Ձեր վստահելի աղբյուրը

«Նաիրիտ» գործարանի աշխատակիցներն այսօր բողոքի ակցիա էին անում նախագահական նստավայրի դիմաց՝ պահանջելով իրենց մեկ տարուց ավելի կուտակված աշխատավարձը։

Որոշ ժամանակ այնտեղ մնալուց հետո նաիրիտցիրները շարժվեցին Ազգային ժողով: Նրանց մոտացան ԱԺ ՀԱԿ խմբակցության ղեկավար Լևոն Զուրաբյանը, քարտուղար Արամ Մանուկյանը:

«Մեծ հույսեր չկապեք այս հանդիպման հետ: Բոլոր խմբակցությունին տեղյակ եմ պահել, որ դուք այստեղ եք, որ իրենց ներկայացուցիչներն էլ մոտենան ձեզ: Սպասենք, տեսնենք, կգան, կգան: Մենք ոչ մեկին չենք կարող թելադրել»,-ասաց Ա. Մանուկյանը:

Դիմելով նաիրիտցիներին՝ նա նշեց, որ պետք է հանդիպել քաղաքական ուժերի, քաղաքացիական նախաձեռնությունների հետ, չթուլացնել պայքարը. «Նաիրտցիներն այսօր պայքարողների ամենամեծ թիմն են: Վարչապետը, նախարարը ոչինչ չեն կարող անել, եթե դուք ամուր կանգնեք»:

Լևոն Զուրաբյանն ասաց, որ իրենց տնտեսական հանձնաժողովը քննարկել է «Նաիրիտ» գործարանի վիճակը, առանձնացրել են երկու կարևոր հարց՝ աշխատավարձերի վերադարձ և «Նաիրիտի» վերագործարկում:

«Բացի այս, մենք այլ անհրաժեշտ ինֆորմացիա ունենք, որի հիման վրա նամակ ենք գրելու վարչապետին: Պատասխանը ստանալուց հետո Հայ ազգային կոնգրեսն արդեն կմշակի իր պահանջների ծրագիրը: Աշխատանքներին կփորձենք մասնակից դարձնել Ազգային ժողովի այլ խմբակցությունների: Զուգորդելով ձեր պայքարը փողոցում, մերը՝ Ազգային ժողովում, պետք է հասնենք խնդրի լուծման: Սա է տարբերակը: Մենք նաև այլ տարբերակ էլ գիտենք՝ արմատական փոփոխություն: Փետրվարին փորձեցինք անել, սակայն տեսաք՝ ինչ եղավ: Տապալեցին մեր պլանը, որ մենք նախագծել էինք: Այս պահին նոր գործընթացի վերաբերյալ մտմտում ենք ու մի օր անելու ենք, բայց մինչև հասունան այդ ծրագիրը, ինչպես կարող ենք կօգնենք ձեզ»,- ասաց ՀԱԿ խմբակցության ղեկավար Լևոն Զուրաբյանը: