Ձեր վստահելի աղբյուրը

«Երկրում սպառվել և մաշվել է հրապարակային ու փողոցում կանգնած դժգոհության արտահայտման և այդ դժգոհությունը գործողությունների վերածելու պրակտիկան», -Panorama.am-ի թղթակցի հետ զրույցում հայտարարեց ազգագրագետ Հրանուշ Խառատյանը՝ խոսելով «Հիմնադիր խորհրդարանի» անդամ Ժիրայր Սեֆիլյանի նախաձեռնած գործողությունների մասին:

Այնուհետև շարունակեց. «Բայց մյուս կողմից ես նույն կարծիքին էի 2008 թվականին, սակայն այդ տարի ընտրություններից հետո իսկապես հզոր կամք ցուցաբերեց հանրությունը՝ իր հրապարակային բարձրաձայնումը արտահայտելով»:

Հիշեցնենք՝ օրերս «100-ամյակը առանց ռեժիմի» շարժման առաջնորդ, Հիմնադիր խորհրդարանի քարտուղարության համակարգող, Շուշիի առանձնակի գումարտակի հրամանատար Ժիրայր Սեֆիլյանը հայտարարել էր, որ «ռեժիմից ազատվելու համար» ապրիլի 24-ից սկսելու են հրապարակային պայքար:

«Որդեգրել ենք այնպիսի մարտավարություն, որը կկրի խաղաղ բնույթ: Մենք հասնելու ենք մեր նպատակին ժողովրդին մոբիլիզացնելու միջոցով: Նման դեպքում հակառակ կողմն ուզի, թե չուզի կամ պետք է գնա կոմպրոմիսի, կամ դիմի բռնի ուժի: Եթե համաձակվեն բռնի ուժ կիրառել, կստանան համապատասխան բռնի պատասխան: Հավանականությունը քիչ է, որ բռնության կդիմեն: Մենք այդ օրը դուրս ենք գալու այլևս տուն չվերադառնալու պայմանով: Շուրջօրյա հավաքներ են լինելու: Կվերադառնանք տուն այն ժամանակ, երբ հաջողվի ձերբազատվել այս ռեժիմից: Կարծում եմ՝ օրերի հարց է», -ասել էր Սեֆիլյանը՝ ընդգծելով, որ ապրիլի 24-ին որևէ խժդժություն չեն անելու ոչ Երևանում և չեն խանգարելու միջոցառումներին:

Բացատրելով այդ գործողությունների իմաստը, տիկին Խառատյանը չբացառեց այն, որ ապրիլի 24-ին արդեն իսկ մեծ բազմություն է դուրս գալիս և այդ բազմության մեջ անպայմանորեն կգտնվեն մարդիկ, ովքեր դեմ են ներկայիս իշխանությունների քաղաքականությանը:

«Սկզբունքորեն այդպես է, որ արդեն իսկ հրապարակ դուրս եկող մարդիկ կարող են իրենց մեջ կրել բացահայտ արտահայտվելու ցանկություն և կամք»,- նկատեց տիկին Խառատյանը:

Հարցին, թե արդյոք նա պաշտպանում է «ռեժիմից ազատվելու» նման մոտեցումը, ազգագրագետը պատասխանեց. «Ես բացահայտ պաշտպանում եմ այն մոտցումը, որ Հայաստանի Հանրապետության քաղաքացիների քանակական մեծամասնությունը ճնշված է մեր իշխանությունների պարագայում թե´ իր հասարակական կյանքի, թե´ իր անձնական կյանքի կառուցման հնարավորություններից: Որ նրանք դժգոհ են, դա կարող եմ բացահայտ ասել իմ դաշտային ուսումնասիրության արդյունքներից ելնելով: Բայց հայտնի չէ, թե քանիսը կարող են իրենց մեջ կամք, կարողություն և համարձակություն ունենալ հրապարակային ու շարունակական պայքար մղել, չեմ կարող ասել»:

Հետաքրքրվեցինք նաև, թե արդյոք տիկին Խառատյանը այդ պայքարում կլինի Ժիրայր Սեֆիլյանի կողքին, նա պատասխանեց. «Ես կլինեմ Սեֆիլյանի կողքին»:

Ինչ վերաբերում է Սեֆիլյանի կոչին քաղաքացիական անհնազանդություն դրսևորել և հրաժարվել մարել վարկային պարտավորությունները, տիկին Խառատյանն ասաց, որ դա ընդամենը կոչ է. «Այսպիսի տոկոսներով ու այսպիսի պայմաններով վարկեր աշխարհի ոչ մի երկրում չի լինում: Սա բացարձակ վաշխառություն է, ոչ թե վարկային քաղաքականություն, սա տնտեսական կործանման քաղաքականություն է: Այդ կոչը քաղաքացիական անհնազանդության ձև է, և իհարկե, պետությունը քայլեր կձեռնարկի պատժելու, ունեցվածք խլելու մարդկանց ձեռքից: Բայց ամեն անձ ինքը կարող է որոշել՝ ինչ է անում: Եվ մարդիկ եթե կարծում են, որ այս վիճակին հնազանդվելը ձև է, ի՞նչ կա որ, ճորտացումը ևս կյանքի ձևերից մեկն է»:

Նախորդող հրապարակումներ՝
Սեֆիլյան. Ապրիլի 24-ին դուրս ենք գալու փողոց, իսկ կվերադառնանք տուն ռեժիմից ձերբազատվելուց հետո (տեսանյութ)
Ժ. Սեֆիլյան. Վարկերը չվճարելու իմ կոչը տարաբնույթ մեկնաբանությունների տեղիք տվեց