Ձեր վստահելի աղբյուրը

«Հայաստանին սպասվում է իսկապես թեժ քաղաքական աշուն»,-լրագրողների հետ հանդիպման ժամանակ անդրադառնալով ներքաղաքական հնարավոր զարգացումներին, նման տեսակետ հայտնեց քաղաքագետ Սերգեյ Մինասյանը:

«ԲՀԿ-ի շուրջ ստեղծված իրավիճակը բերեց նրան, որ այս պահին և մոտակա մի քանի շաբաթների ընթացքում կունենանք չափազանց հանգիստ ներքաղաքական իրավիճակ: Առնվազն մինչև աշուն իրավիճակի որևէ սրացում, իմ կարծիքով, չի լինի», - նշեց Սերգեյ Մինասյանը` հավելելով, որ հնարավոր բոլոր զարգացումները կրելու են զուտ տեխնիկական բնույթ և որևէ կերպ չեն ազդելու ներքաղաքական իրողությունների վրա:

Քաղաքագետի կարծիքով` սպասելի էր, որ ներքաղաքական դաշտը պետք է հայտնվեր շոկային վիճակում այն բանից հետո, երբ մի քանի օրերի ընթացքում գրեթե վերացավ մարդկային և ֆինանսական ամենալուրջ ռեսուրսներին տիրապետող գլխավոր ընդդիմադիր ուժը:

Միևնույն ժամանակ ըստ քաղաքագետի` իրավիճակի հստակեցումից հետո, մասնավորապես` աշնանը ընդդիմադիր դաշտում նշանակալի զարգացումները գրեթե անխուսափելի են: Ըստ Սերգեյ Մինասյանի` դրան են նպաստում նաև հասարակության լայն զանգվածների բավական բարդ վիճակը, ինչպես նաև արտաքին քաղաքական զարգացումները:

Քաղաքագետը շեշտեց, որ ներկա պահին ընդդիմադիր դաշտը բաց է, ինչից օգտվում են որոշակի մարգինալ ուժեր` առաջ բերելով պայքարի իրենց յուրօրինակ դրույթները:

Միևնույն ժամանակ ըստ քաղաքագետի` սահմանադրական բարեփոխումների գործընթացը որևէ կերպ չի կարող անդրադառնալ ներքաղաքական զարգացումների վրա այն պատճառով, որ ներկա պայմաններում դրանց ճակատագիրը կախված է միայն ՀՀ իշխանությունների դիրքորոշումից: