Ֆիլհարմոնիկի ապրիլյան համերգաշարը՝ «Հիշում եմ և պահանջում» կարգախոսով
Հայաստանի Ազգային ֆիլհարմոնիկ նվագախումբը ապրիլի 3-ին՝ ժամը 19-ին, «Հիշում եմ և պահանջում» խորագրի ներքո ներկայացնում է համերգ` հայազգի հայտնի դիրիժոր Ալան Ալթինօղլուի ղեկավարությամբ: Համերգը կկայանա Ալ. Սպենդիարյանի անվան Օպերայի և բալետի ազգային ակադեմիական թատրոնում. ծրագրում կներկայացվեն Վագներ և Ռավել (Վագների «Լոհենգրին» օպերայի 1-ին և 3-րդ գործողությունների նախանվագները, Ռավելի Իսպանական ռապսոդիան և «Դափնիս և Քլոյե» թիվ 2 սյուիտը): Որպես հրավիրյալ մենակատար հանդես կգա միջազգային լայն ճանաչում ունեցող թավջութակահար Ալեքսանդր Չաուշյանը, ում կատարմամբ էլ կհնչի Սեն-Սանսի Թավջութակի կոնցերտը: Այս մասին հայտնում են Հայաստանի Ազգային ֆիլհարմոնիկ նվագախմբի մամուլի ծառայությունից:
Ալան Ալթինօղլուն Երևանում հանդես կգա առաջին անգամ: Նա աշխարհի հեղինակավոր թատրոնների մշտական հրավիրյալ դիրիժորն է (Նյու Յորքի Metropolitan Opera, Չիկագոյի Lyric Opera, Վիեննայի Staatsoper, Բեռլինի Deutsche Oper, Ցյուրիխի Opernhaus–ի, Փարիզի երեք օպերային թատրոններ և այլն): Հանդես է եկել Զալցբուրգի, Օրանժի, Էքս-ան-Պրովանսի և այլ հայտնի փառատոներում: Ղեկավարել է Chicago Symphony, Philadelphia Orchestra, Orchestre National de France, Orchestre de Paris, Orchestre Philharmonique de Radio France, Orchestre National de Lyon, Staatskapelle Dresden, Staatskapelle Berlin, Bamberger Symphoniker, Ensemble Intercontemporain, Radio-Symphonieorchester Vienna և աշխարհահռչակ այլ նվագախմբեր:
Այս համերգաշրջանում ծրագրված են «Դոն Կառլոս», «Սալոմե» օպերաների բեմադրությունները Վիեննայի Staatsoper-ում, «Մանոն Լեսկոյի» բեմադրությունը Մյունխենի Bayerische Staatsoper-ում, «Դոն Ժուանի» բեմադրությունը Փարիզի Opera National-ում: Սպասվում է Ալթինօղլուի բեմելը նաև Լոնդոնի Royal Opera House-ում («Դոն Ժուան») և Բայրոյթի փառատոնում («Լոհենգրին»):
Իբրև սիմֆոնիկ դիրիժոր Ալան Ալթինօղլուն ղեկավարել է Գոթենբուրգի սիմֆոնիկ և Ցյուրիխի Տոնհալլե նվագախմբերը: Ապրիլին նա ղեկավարելու է Մոցարտի Ռեքվիեմը` Մեծ Եղեռնի 100-ամյակին նվիրված համերգում:
Գերմանական Lied ժանրի գիտակ և նուրբ մեկնաբան Ալան Ալթինօղլուն, որպես դաշնակահար, իր կնոջ` Նորա Գուբիշի հետ (մեձո-սոպրանո) մշտապես ելույթներ է ունենում և ձայնագրություններ կատարում (գերմանացի հեղինակներից բացի, դե Ֆալյաի, Օբրադոսի, Գրանադոսի, Բերիոյի, Ռավելի, Դյուպարկի և այլ կոմպոզիտորների ստեղծագործություններ): Ճանաչված դաշնակահարուհի Նարե Արղամանյանի հետ ձայնագրել է Լիստի դաշնամուրային կոնցերտները: Ձայնագրությունների թվում է նաև Հոնեգերի «Ժաննա դ’Արկ» օրատորիան (DVD):
Ալան Ալթինօղլուն ծնվել է 1975-ին Փարիզում, որտեղ և ավարտել է Conservatoire National Supérieur de Musique-ը: Ներկայումս դասավանդում է նույն կոնսերվատորիայում:
Թավջութակահար Ալեքսանդր Չաուշյանի ծնվել է Երևանում` երաժշտական հարուստ ավանդույթներ ունեցող ընտանիքում: Նրա դասատուներն էին պապը` ավագ Ալեքսանդր Չաուշյանը և պրոֆեսոր Զարեհ Սարգսյանը: Լոնդոնի Եհուդի Մենուհինի անվան դպրոցում սովորել է Մելիսսա Ֆելփսի մոտ, իսկ Guildhall School of Music and Drama-ում`Օլեգ Կոգանի ղեկավարությամբ: Հանդես է եկել Վիեննայի Konzerthaus-ում և Լինցի Bruchnerhaus-ում` Վիեննայի կամերային նվագլախմբի հետ, Լոնդոնում` London Mozart Players-ի և Philharmonia Orchestra-ի հետ, ինչպես և Orchestre de la Suisse Romande, Բելգիայի Royal National Orchestra, Les Solistes Europռens de Luxembourg-ի գալա համերգում, որը ղեկավարում էր Եհուդի Մենուհինը: Ներկայումս Ա.Չաուշյանը Կիպրոսի Pharos Chamber Music Festival -ի և Երևանյան միջազգային երաժշտական փառատոնի գեղարվեստական ղեկավարն է: Ա.Չաուշյանը մի շարք միջազգային մրցույթների դափնեկիր է: Համագործակցել է Լևոն Չիլինկիրյանի, Պավել Վերնիկովի, Յուրի Բաշմետի, Դիմուտ Պոպպենի, Էմանուել Պայուի, Յուլիա Ֆիշերի, իր մշտական կամերային գործընկերներ Էշլի Վոսի, Եվգենի Սուդբինի և այլ անվանի երաժիշտների հետ: BIS ֆիրմայում թողարկել է «Հայկական ռապսոդիա» CD-ն` Ա.Չաուշյանի և ՀԱՖՆ-ի կատարմամբ (The Independent թերթն այս ձայնագրությունը անվանել է «շաբաթվա ալբոմ»):
Ազգային Ֆիլհարմոնիկի այս տարվա առաքելությունն ու գործունեության բաղկացուցիչ մասն է կազմում հայ ժողովրդի մակդարյա բաց վերքի՝ Հայկական հարցի հանրայնացումը, ցեղասպանված հայության հիշատակի ոգեկոչումը աշխարհով մեկ: Հայոց ցեղասպանության 100-րդ տարելիցի շրջանակներում նվագախումբը դիրիժոր էդուարդ Թոփչյանի գլխավորությամբ «Հիշում եմ և պահանջում» կարգախոսի ներքո ապրիլի 10-15-ը հյուրախաղերով հանդես կգա Սկանդինավյան երեք երկրներում. ապրիլի 11-ին Տամպերեի (Ֆինլանդիա) համանուն համերգասրահում, ապրիլի 12-ին` Կոպենհագենում (Դանիա)՝ Դանիայի Ռադիոյի համերգասրահում, ապրիլի 13-ին` Օլբորգի (Դանիա) Մյուզիքենս Հուսում և ապրիլի 14-ին` Օսլոյի (Նորվեգիա) Մայր տաճարում: Որպես մենակատարներ հանդես կգան անվանի ջութակահարներ Իզաբել Ֆաուստը (Գերմանիա) և Հեննինգ Քրագեռուդը (Նորվեգիա), դաշնակահարուհի Մարիաննա Շիրինյանը (Դանիա) և թավջութակահար Ալեքսանդր Չաուշյանը (Մեծ Բրիտանիա): Կկատարվեն Բեթհովենի, Գրիգի, Չայկովսկու, Շիմանովսկու և Խաչատրյանի ստեղծագործություններից: Հյուրախաղերը կիրականանան Հայաստանի Հանրապետության Մշակույթի նախարարության, ինչպես նաև Դանիայի և Նորվեգիայի հայաստանյան դեսպանության աջակցությամբ:
Իսկ ապրիլի 9-ին՝ ժամը 19-ին, կրկին Օպերային թատրոնի դահլիճում հայաստանյան ունկնդրին Ֆիլհարմոնիկը կներկայացնի ճանաչված դաշնակահարուհի Մարիաննա Շիրինյանի մասնակցությամբ Նորվեգիայում կայանալիք համերգային ծրագիրը՝ կատարելով հատվածներ Խաչատրյանի «Սպարտակ» բալետից, Գրիգի Դաշնամուրի կոնցերտը և Չայկովսկու թիվ 6 սիմֆոնիան:
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
