Ձեր վստահելի աղբյուրը

Մարդու դեմ ուղղված հանցագործությունները 2014 թվականին 200 դեպքով, այսինքն 4.2 տոկոսով աճել են. 2014-ին գրանցվել է 4,927 դեպք, իսկ 2013-ին՝ 4,727: Ընդ որում, աճել են սպանության՝ 2014-ին 53 դեպք, 2013թ-ին՝ 48, սպանության փորձի՝ 2014-ին` 28, 2013-ին՝ 25 դեպքերը: Այդ մասին Panorama.am-ը տեղեկանում է ՀՀ Գլխավոր դատախազության 2014 թվականի գործունեության ծրագրից, որը Ազգային ժողովում դրվել է շրջանառության մեջ:

Ըստ աղբյուրի, աճել են նաև դիտավորությամբ առողջությանը ծանր վնաս պատճառելու 2014թ-ին` 216 դեպք, 2013-ին` 186, բռնաբարության և բռնաբարության փորձի 2014-ին` 22 դեպք, իսկ 2013-ին` 19 և մարդու դեմ ուղղված այլ հանցագործությունների դեպքերը. 2014-ին` 3,420, 2013-ին` 3,112:

Նույն ծրագրից տեղեկանում ենք նաև, որ նվազել են դիտավորությամբ առողջությանը միջին կամ թեթև վնաս պատճառելու դեպքերը՝ 2014-ին` 1,321, 2013-ին` 1,412 -), նաև սեռական անձեռնմխելիության դեմ ուղղված հանցագործությունների դեպքերը. 2014-ին դրանք 97-ն էին, իսկ 2013-ին` 116-ը:

Միևնույն ժամանակ, մարդու դեմ ուղղված հանցագործությունների բացահայտման ցուցանիշում էական փոփոխություն չի արձանագրվել. 2014թ. բացահայտումը կազմել է 96%: 2014թ. ընթացքում գրանցվել է հանցագործության 17,546, ինչը 2013-ին 18,333 էր, այսինքն դեպքերը նվազել են 4.3%-ով: Բացահայտումը կազմել է 79.9%, 2013-ի 82.6%-ի համեմատ:

2013 թվականի համեմատած 2014-ին սպանության դեպքերն աճել են 5-ով. 2013-ին 48 դեպք էր, իսկ 2014-ին` 53, սպանության փորձի դեպքերը` 3-ով (2013թ.` 25 – 2014թ.` 28) կամ 12%-ով, իսկ առողջությանը դիտավորությամբ ծանր վնաս պատճառելու դեպքերը` 30-ով (2013թ.` 186 – 2014թ.` 216) կամ 16,1%-ով:

2014-ի ընթացքում 12%-ով բարելավվել է գրանցված սպանությունների բացահայտման ցուցանիշը՝ կազմելով 84.9% (2013թ.` 72.9%): Սպանության 53 (2013թ.` 48) դեպքից բացահայտվել է 45-ը (2013թ.` 35):

Նույն ժամանակահատվածում գրանցված սպանության փորձերի դեպքերի բացահայտման ցուցանիշը նվազել է 13,4%-ով՝ կազմելով 78,6%, մինչդեռ 2013-ին այդ ցուցանիշը կազմել է 92%: 2014թ. սպանության փորձի 28 (2013թ.` 25) դեպքից բացահայտվել է 22-ը (2013թ.` 23): Հաշվետու ժամանակահատվածում 91 դեպքով կամ 6,4%-ով նվազել են դիտավորությամբ առողջությանը վնաս պատճառելու դեպքերը. 2013-ին 1,412 դեպք է եղել, իսկ 2014-ին՝ 1,321: Միաժամանակ, 30 դեպքով կամ 16.1%-ով աճել են դիտավորությամբ առողջությանը ծանր վնաս պատճառելու դեպքերը. 2013թ.` 186, իսկ 2014-ին` 216: Բացասական միտում է նկատվել նաև նշված հանցագործությունների բացահայտման գործում: 2014թ. բացահայտումը կազմել է 75%, իսկ 2013թ.` 83.9%:

Ուսումնասիրելով դիտավորյալ սպանության, սպանության փորձի և առողջությանը ծանր վնաս պատճառելու դեպքերը, Գլխավոր դատախազությունում պարզել են, որ դեպքերին հիմնականում նախորդում են հանցագործություն կատարած անձանց և տուժողների միջև ծագած վիճաբանությունները, դրանց վերաբերյալ պարզաբանումները, որոնք հաճախ կրում են շարունակական բնույթ:

Մարդու դեմ ուղղված հանցագործությունների ուսումնասիրության և վերլուծության արդյունքում պարզվել է նաև, որ բնակչության առողջության դեմ ուղղված հանցագործությունների թվի աճը հիմնականում պայմանավորված է ինչպես իրավապահ մարմինների կողմից ձեռնարկված պրոֆիլակտիկ միջոցառումների անարդյունավետությամբ, այնպես էլ բնակչության անհանդուրժողականությամբ: Այդ բնույթի հանցագործությունների պատճառ են հանդիսանում, հիմնականում, կենցաղային հարցերը:

Ըստ Գլխավոր դատախազության, բավարար չեն նաև այդ բնույթի հանցագործությունների բացահայտման ուղղությամբ ձեռնարկված քննչական միջոցառումները, ինչպես նաև նախաքննության և հետաքննության մարմինների համագործակցությունը: