Ձեր վստահելի աղբյուրը

Ամեն տարի ապրիլի 7-ին՝ Առողջապահության համաշխարհային կազմակերպության (World Health Organization, WHO, 1948) հիմնադրման օրը, նշվում է որպես առողջապահության համաշխարհային օր: Այս օրը տոնելու ավանդույթը սկիզբ է առել 1950 թվականին: Այն նպատակ ունի մարդկանց ցույց տալու, թե որքան կարևոր նշանակություն ունի առողջությունը իրենց կյանքում, և որոշել, թե ի՛նչ կարելի է անել աշխարհում մարդկանց առողջական վիճակի բարելավման համար:

«Կարծում եմ, որ մարդու կյանքում կարևոը օրը չէ: Յուրաքանչյուր ոք պարտավոր է ամբողջ տարվա ընթացքում հետևել իր առողջությանը, հատկապես, որ այսօր կանխարգելիչ բժշկությունը շատ ավելի կարևորվում է և ինչքան շուտ հիվանդությունը հայտնաբերվի, այնքան այն ավելի հեշտ կլինի բուժել»,- այս մասին այսօր լրագրողների հետ հանդիպման ժամանակ ասաց Հայ-ամերիկյան առողջության կենտրոնի տնօրեն Խաչանուշ Հակոբյանը:

Անդրադառնալով մայրության և գեղեցկության տոնի կապակցությամբ` մարտի 8-ից ապրիլի 7-ը, կենտրոնի կողմից հայտարարված ակցիաներին, ըստ որոնց` բոլոր կանանց 30 տոկոս զեղչ էր առաջարկում ռադիոլոգիական, գինեկոլոգիական, ուրոլոգիական և ատամնաբուժական ծառայություններից օգտվելու համար, Խ.Հակոբյանն ասաց, որ մեկ ամսվա ընթացքում բազմաթիվ այցելուներ են ունեցել, կանայք հիմնականում դիմել են մամոգրաֆիկ ծառայություններից օգտվելու համար:

Ուստի այս ամենը հաշվի առնելով, ինչպես նշեց կենտրոնի ղեկավարը, ակցիան կերկարաձգվի ևս մեկ շաբաթով` ապրիլի 11-ը ներառյալ: «Այս չորս օրերի ընթացքում կանայք կօգտվեն մամոգրաֆիկ հետազոտության համար նախատեսված 30 տոկոս զեղչից»,- ասաց նա:

Խ.Հակոբյանը տեղեկացրեց նաև, որ ակցիայի շրջանակներում մարտի 9-14-ը 154 մամոգրաֆիկ հետազոտություն է իրականացվել, որոնց արդյունքում կրծքագեղձի քաղցկեղի 14 դեպք է արձանագրվել: Ակցիայի շրջանակներում նաև անցկացվել է կրքծագեղձի 171 սոնոգրաֆիկ հետազոտություն, վահանագեղձի 91 հետազոտություն:

«Այն կանայք, որոնց մոտ ախտորոշվել է կրծքագեղձի քաղցկեղ, երբեք չեն մտածել, որ ունեն այդ հիվանդությունը: Այդ 14 կանանցից կեսի մոտ քաղցկեղը հիմնականում հայտնաբերվել է սկզբնական փուլում, ուռուցքի չափսերը փոքր են` հիմնականում 3 մմ, ուստի վիրահատական փոքր միջամտությունից այն կվերացնեն: Եթե այդ կանայք գային մեկ կամ երկու տարի հետո, ուռուցքը շատ ավելի մեծ կլիներ, ինչը կդժվարացներ բուժումը»,- ասաց Խ.Հակոբյանը:

Կենտրոնի ղեկավարը նաև հայտնեց, որ Հարվարդի համալսարանից հրավիրված բժիշկները նախատեսում են ապրիլի 16-ին կենտրոնում տեղադրված լազերային սարքի շնորհիվ կատարել հեմանգիոմաների հեռացում: Սրանք բարորակ նորագոյացություններ են, որոնք առաջանում են պտղի սաղմնային շրջանում` անոթների ոչ բնականոն զարգացման պատճառով: «Ուզում եմ, որ հասարակությունը այս մասին տեղյակ լինի և օգտվի այս հնարավորությունից»,- ասաց նա:

Անդրադառնալով առողջապահության պահպանմանը, Խ.Հակոբյանը նկատեց, որ վերջին տարիներին մարդիկ սկսել են հետևել իրենց առողջությանը: Ըստ նրա` եթե նախկինում մտածում էր, որ մարդիկ չեն գալիս կանխարգելիչ հետազոտությունների, քանի որ վախենում են: Սակայն, աշխատելով առողջապահության ոլորտում, նա նկատել է, որ հոգեբանական վախը կարծես թե հաղթահարվել է, և ակցիաների ու զեղչերի ժամանակ շատերը գալիս են հետազոտման, ինչը նշանակում է, որ ժամանակին չհետազոտվելու պատճառտ ֆինանսական միջոցների բացակայությունն է: Սակայն Խ.Հակոբյանը կարծում է, որ իրենց կենտրոնի գները մատչելի են և տարեկան մեկ անգամ բոլոր կանայք կարող են հետազոտվել: