Ձեր վստահելի աղբյուրը

Այսօր ԱԺ քառօրյայում ներկայացվեց ՀՀ գազամատակարարման համակարգի գործունեությունն ուսումնասիրող ժամանակավոր հանձնաժողովի եզրակացությունը: Հանձնաժողովը պետք է ուսումնասիրեր, թե որքանո՞վ է հիմնավոր գազի թանկացումը, և արդյո՞ք գործընթացում կան անօրինական գործողություններ:

Գազային հանձնաժողովի նախագահ Վարդան Այվազյանին հարցեր ուղղեցին պատգամավորները:

ՀԱԿ խմբակցության պատգամավոր Հրանտ Բագրատյանը հետաքրքրվեց`եթե Հայաստանը Ռուսաստանից գազը ձեռք է բերում 164 դոլարով, վաճառում՝ 340-ով, որտե՞ղ է այստեղ մեր ստրատեգիական ռազմավարությունը: Մինչդեռ Ուկրաինան, ըստ նրա, որտեղ պատերազմը դեռ շարունակվում է, գազը ձեռք է բերում 247 դոլարով, 4 օր առաջ գազի գինը բարձրացրեց և վաճառում է 280-ով. «Որտե՞ղ է 164-ի ու 340-ի տարբերությունը: Այդ ի՞նչ 288 դոլար է ձեր զեկույցում: Եվ երկրորդ հարցը՝ վերլուծված չեն ներդրումները, ի՞նչն է կազմում ներդրումները, ո՞նց է պարտավորվում, որ «Գազպրոմի» մենեջերը, թեկուզև լավ աշխատավարձ է ստանում, այսօր ներկայանում է որպես օլիգարխ: Ո՞ւմ հիմնարկներն են կատարում այդ կապալառու աշխատանքները: Մարդը մի քանի 100 մլն ունի և խոսում է արդեն Մոսկվայից Երևան ներդրումների մասին, սա ռազբիրատ արե՞լ եք»:

Բացի այդ, ըստ նրա, տարբեր հիմնադրամներ գազային ցանցեր են սարքում, հետո հանձնում են ընկերությանը, արդյոք այդ գազային ցանցերը, որ ձրի ստանում է, «Գազպրոմի»-ը մտցնո՞ւմ է ներդրումների մեջ:

Բագրատյանը նաև նշեց. «1998 թվականին «Հայռուսգազարդ»-ի կեսը տվեցինք ռուսներին 148 միլիոնով, դրա դիմաց փող պիտի գար 148 միլիոն, չի եկել: Հանրապետության երկրորդ նախագահը, որ 148 միլիոնը վարի էլ տալիս, մոգոնել էր հանձնաժողով` մի քանի պոպուլիստներով մութ ու ցուրտ տարիների «մազութի գործ» էիք քննարկում: Վերցրել էիք իմ իսկ վերահսկողության ծառայության տեղեկանքը, բերել ձեզ հարիֆցել ու մատուցում էին: Դա միակ դեպքն է, որ իշխանությունն ընկավ հետևներից, որ նստացնի, վերջում ներողություն խնդրեց ու գնաց նրա համար, որ այս երկրին լույս էինք տվել: Ո՞ւր է այդ 148 մլն դոլարը, որ մենք ձրի տվեցինք գազը ռուսներին, 2 տարի ձրի գազ տվեցին, չպիտի վճարեինք, այդ փողն էլ հատուկ հաշվին պիտի կուտակվեր: Սա քննե՞լ եք, թե՞ չեք քննել»:

Վարդան Այվազյանը պատասխանեց, որ գազը 345 դոլարով վաճառվում է հիմնականում ազգաբնակչությանը, որը գալիս է գազի սպառողների մոտ 34 տոկոսը: Ինչ վերաբերում է 60%-ին, Այվազյանը նկատեց, որ վաճառում են 280 դոլարի կարգի:

«Ինչ վերաբերում է օլիգարխին, երբ մենք ուզում էինք նայեինք, թե մեջը ով է օլիգարխ դառել, դուք էիք դեմ: Որ ասում էինք գնանք ծախսերը նայենք, թե մրցույթը ինչպես է կատարվել, բացի ՀՀԿ-ից բոլորն ասեցին՝ մենք չենք ցանկանում հանձնաժողովը շարունակի իր աշխատանքը: Մենք ասեցինք՝ հետո սրա մասին խոսելու ենք: Սա այդ «հետոն» է: ՀՀԿ-ն նախանձախնդիր լինելով՝ ասաց, մենք առաջարկում ենք, որ գնանք, ծախսերը նայենք: Այդ մասը չի ուսումնասիրվել»,- ասաց Վ.Այվազյանը:

Այս ընթացքում Արամ Մանուկյանն ու Հրանտը Բագրատյանը իրենց տեղից անհամաձայնություն հայտնեցին, սակայն Վ.Այվազյանը ասաց, որ Գազի հանձնաժողովի բոլոր նիստերը ձայնագրվել են: «Դա եղել է բոլորիս համաձայնությամբ, բոլորս միասին նստած ենք եղել, ամբողջ նիստերի գործընթացը ձայնագրվում էր, եթե իմ որևէ խոսքը չի պարունակել ոչ ճիշտ տեղեկատվություն, կարող եք ձայնագրությունը հանել»,- ընդգծեց նա:

Անդրադառնալով 148 մլն-ով «Հայռուսգազարդ»-ի կեսի վաճառքին՝ Այվազյանը նկատեց, որ եթե հիշողությունը չի դավաճանում, ապա այդ գումարի դիմաց փոխհատուցում է եղել գազի տեսքով:

Այդուհանդերձ Հ.Բագրատյանն արձագանքեց, որ ինքը զեկուցման մասին վատ կարծիքի չէ` համարելով այն «պալեզնի» փաստաթուղթ, սակայն այդպես էլ իր հարցին համարժեք պատասխան չտրվեց:

Այս երկխոսությանը միջամտեց Աժ նախագահ Գալուստ Սահակյանը. «Պատերազմները` դրսում: Զապիսը հետո կնայեք»: