Ձեր վստահելի աղբյուրը

«Թուրքիայի նախագահ Ռեջեփ Թայիփ Էրդողանն այցելել է Իրան»,-այդ մասին հաղորդում է Իրանի նախագահի պաշտոնական կայքը:
Համաձայն հաղորդագրության Թուրքիայի նախագահին ուղեկցում են ԱԳ, էկոնոմիկայի, էներգետիկայի, առևտրի և տնտեսական զարգացման, մշակույթի և զբոսաշրջության նախարարները: Այցի ընթացքում կողմերը ստորագրել են համագործակցության մասին 8 փաստաթուղթ:

Իրանի և Թուրքիայի նախագահների հանդիպման օրակարգում եղել են երկկողմ, տարածաշրջանային և միջազգային խնդիրներին առնչվող հարցերը:

Իրանի և Թուրքիայի նախագահների մասնակցությամբ համատեղ մամլո ասուլիսի ընթացքում, Հասան Ռոհանին, անդրադառնալով թուրք-իրանական տնտեսական կապերին, նշել է. «Նախորդ տարի երկկողմ առևտրաշրջանառության ծավալները կազմել են 14 միլիարդ դոլար, նպատակ ունենք այդ թիվը կրկնապատկել՝ հասցնելով 30 միլիարդ դոլարի»:

Թուրքիայի նախագահը, անդրադառնալով գազի ոլորտում երկկողմ համագործակցությանը, մասնավորապես նշել է. «Մենք մեծ քանակությամբ բնական գազ ենք գնում Իրանից, սակայն, հաշվի առնելով իրանական գազի գինը, մենք ամենաթանկ գազն ենք գնում Իրանից: Եթե Իրանը գազի գինն իջեցնի, ապա մենք էլ կմեծացնենք ներմուծման ծավալները: Մեր ժողովուրդը գազի կարիք շատ ունի, եթե Իրանը մեզ էժան գազ վաճառի, մենք էլ մեր բնակչությանն էժան կվճառենք»:

Իրանի նախագահը, անդրադառնալով տարածաշրջանում տիրող անկայունությանը, նշել է. «Տարածաշրջանային հարցերի շուրջ մանրամասն քննարկումներ ունեցանք. Դրանց շուրջ ընդհանուր մոտեցումներ ունենք. Երկու կողմն էլ ընդգծեցին, որ որքան հնարավոր է շուտ, պետք է Եմենում դադարեցվի արյունահեղությունը»: