Ձեր վստահելի աղբյուրը

2015 թվականը Հայաստանի պետական երիտասարդական նվագախումբը սկսում է իր գլխավոր գործընկեր ՎիվաՍել-ՄՏՍ ընկերության հետ համագործակցությամբ: Ինչպես նախորդ տարիներին, այս տարի ևս նվագախմբի վաղեմի բարեկամ ՎիվաՍել-ՄՏՍ-ը աջակցելու է նրանց բոլոր նախաձեռնություններին:

Ինչպես այսօր լրագրողների հետ հանդիպման ժամանակ նշեց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, սերտ համագործակցության շնորհիվ կյանքի են կոչվել նորարարական նախագծեր, ինչպես նաև Հայաստան են հրավիրվել մեծանուն երաժիշտներ:

«Մենք ուրախ ենք, որ կանգնած ենք այնպիսի երիտասարդ նվագախմբի կողքին, որը կարողանում է իր տաղանդը ներկայացնել ոչ միայն Հայաստանում, այլև արտերկրում: Հաճելի է տեսնել այն ոգևորությունը, նվիրումը և բարձր որակ ստանալու ձգտումը, որով աշխատում է նվագախումբը: Անշուշտ դրանով է նաև պայմանավորված կոլեկտիվի հաջողությունները թե Հայաստանում, թե արտերկրում»,- ասաց Ռ.Յիրիկյանը` հավելելով, որ իրենք շարունակելու են աջակցել երիտասարդ նվագախմբին, քանի որ տեսնում են նրանց զարգացումը, և թե ինչպես են կարողանում քայլ առ քայլ նոր բարձունքներ նվաճել:

ՎիվաՍել-ՄՏՍ-ի ղեկավարը նաև նշեց, որ երիտասարդ երաժիշտները լավ օրինակ են իրենց հասակակից արվեստագետների համար: Նրանք, ըստ նրա, չեն լքում հայրենիքը, քանի որ հավատում են, որ կարող են իրենց երկրում ստեղծագործել, զարգանալ և Հայաստանը ներկայացնել այլ երկրներում:

«Իհարկե միշտ էլ դժվարություններ կլինեն, սակայն վստահ եմ, որ նվագախումբն այն կհաղթահարի և կփայլի համաշխարհային բեմերում»,- ասաց Ռ.Յիրիկյանը:

Հայաստանի պետական երիտասարդական նվագախմբի ղեկավար և գլխավոր դիրիժոր Սերգեյ Սմբատյանն իր շնորհակալությունը հայտնեց ընկերությանը` նշելով, որ ինչքան էլ խոսեն բարձր արվեստի մասին, սակայն չեն կարող շրջանացել կենցաղային խնդիրը` ֆինանսական միջոցները:

«Արվեստը մշտապես աջակցության կարիք ունի: Բարձրարժեք մշակույթը հանրությանը հասցնելու գործում մենք միշտ զգում ենք մեկենասների կարիքը: Հայաստանում այս առաքելությունը ստանձնել են ՎիվաՍել-ՄՏՍ-ն ու Ռալֆ Յիրիկյանը: Իրենց շնորհակալ գործունեությամբ տարիներ շարունակ նրանք ապահովում են բարձր արժեքների տարածումն ու զարգացումը»,- նշեց Ս.Սմբատյանը:

Նվագախմբի դիրիժորը տեղեկացրեց նաև, որ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի և ՎիվաՍել-ՄՏՍ-ի շնորհիվ վերջերս Երիտասարդականը` որպես պաշտոնական նվագախումբ, արդեն երկրորդ անգամ մասնակցել է Լիբանանում անցկացվող «Ալ Բուստան» միջազգային փառատոնին, որի շրջանակներում ունեցած համերգներին ոգեկոչել է Հայոց ցեղասպանության զոհերի հիշատակը:

Նշվեց նաև, ՎիվաՍել-ՄՏՍ-ի աջակցությամբ ՀՊԵՆ-ը, կիրառելով նորագույն տեխնոլոգիաներ, հայաստանյան իրականության մեջ առաջին անգամ ներդրել է դասական երաժշտության համերգների առցանց հեռարձակման մշակույթը, ինչի արդյունքում դասական արվեստի հաղորդակից են դառնում ոչ միայն համերգասրահի հանդիսականներ, այլև հազարավոր երաժշտասերներ` աշխարհի տարբեր վայրերում: