Ձեր վստահելի աղբյուրը

Մոսկվայի հայկական թանգարանն իր դռները այցելուների առջև կբացի ապրիլի 22-ին Հայոց Ցեղասպանության 100-րդ տարելիցին նվիրված ցուցադրությունով: Այս մասին հայտնում են rusarminfo.ru-ից:

Մոսկվայի Հայկական Թանգարանի բացմանը նվիրված ասուլիսի ժամանակ Ռուսաստանի և Նոր Նախիջևանի թեմի առաջնորդ արքեպիսկոպոս Եզրաս Ներսիսյանն ասել է, որ Հայկական թանգարանի ստեղծումը Մոսկվայի եկեղեցական համալիրի տարածքում իր մեջ կրում է երկու խորը գաղափար՝ խորհրդանշում է եկեղեցու միավորող դերը հայ ժողովրդի կյանքում և մարմնավորում է եկեղեցու հավերժ պայքարը չարի դեմ:

Ըստ Եզրաս արքեպիսկոպոս Ներսիսյանի, թանգարանը խորհրդանշում է եկեղեցու հավերժ պայքարը չարի դեմ. «Մենք բոլորս գիտակցում ենք եկեղեցու դերն ու նշանակությունը ազգային ինքնորոշման, մշակույթի, պահպանման գործում, գիտենք նաեւ այն, որ հայ ժողովուրդը իր պատմության ընթացքում շատ արհավիրքներ է տեսել, սակայն այն, ինչը տեղի ունեցավ 1915 թ. Օսմանյան կայսրությունում՝ աննկարագրելի է: Այս տարի Ցեղասպանության 100-րդ տարելիցն է, և մենք չէինք կարող կյանքի չկոչել այնպիսի մի նախագիծ, ինչպիսին է Մոսկվայի հայկական թանգարանը: Այն կներկայացնի իրադարձությունները և արժեքները, որոնք որոշիչ են եղել մեր ազգի գոյության համար: Թանգարանը քարոզում է համամարդկային արժեքներ՝ բարություն, խաղաղություն, փոխըմբռնում ու սեր»:

Այն մասին, թե ինչն է իրեն դրդել ձեռնամուխ լինել Մոսկվայի հայկական թանգարանի ստեղծման բարդ ու պատասխանատու գործին, պատմել է բարերար Ռուբեն Գրիգորյանը:

«Մեր նպատակն է կանխել ապագայի ցեղասպանությունները: Պատմության մեջ տեղի է ունեցել Ցեղասպանություն՝ սպանել են երեխաների, կանանց, ծերերի: Կարեւոր չէ, թե նրանք ինչ ազգություն ունեն: Կարևորն այն է, որ մարդկությունն անտեսել է դա, չի դատապարտել: Պատմությունը կրկնվում է, դրա վառ ապացույցը այսօր Իրաքում, Սիրիայում, Եգիպտոսում տեղի ունեցող իրադարձություններն են: Ցեղասպանությունը չպետք է կրկնվի: Մենք հորդորում ենք, որ մարդիկ շեղվեն այն ճանապարհից, որը տանում է ինքնաոչնչացման: Հայ ժողովրդի ողբերգությունը պետք է անմոռանալի օրինակ լինի ողջ մարդկության համար: Մենք պնդում ենք, որ ինքնաոչնչացումը անթույլատրելի է: Մոսկվայի Հայկական թանգարանի ստեղծման համար օգտագործվել են ամենաժամանակակից ինտերակտիվ տեխնոլոգիաները, որոնք թույլ են տալիս յուրաքանչյուր մարդու, ով կայցելի թանգարան, դուրս գալ այնտեղից ինքնամաքրված: Յուրաքանչյուր ոք, ով գոնե մեկ անգամ կլինի թանգարանում այլեւս երբեք ձեռք չի բարձրացնի երեխայի կամ կնոջ վրա»:

Մոսկվայի Հայկական թանգարանը Հայաստանի սահմաններից դուրս իրագործված ամենամեծ թանգարանային նախագիծն է: Չնայած հայկական մեծաքանակ սփյուռքի գոյությանը՝ այսպիսի թանգարանների թիվն աշխարհում շատ քիչ է: 

ԱՊՀ երկրների ինստիտուտի տնօրեն Կոնստանտին Զատուլինը թանգարանի ստեղծման հետ կապված իր գնահատականներում օգտագործել է պատմական զուգահեռներ, ընդգծելով այն փաստը, որ Ռուսաստանը հետխորհրդային առաջին պետությունն է, որը պաշտոնապես ճանաչել է Հայոց ցեղասպանությունը. «Հայկական սփյուռքը հարյուրամյակների պատմություն ունի և արդեն շատ ավանդույթներ է մշակել: Շատ հայերի համար Ռուսաստանը դարձել է երկրորդ հայրենիք, որի զարգացման գործում նրանք մեծ ներդրում են ունեցել: Արևելագիտության հիմքը Ռուսաստանում դրել են հայ մասնագետները, թարգմանիչները: Նման թանգարանի ստեղծումը Հայկական եկեղեցու համալիրում հնարավորություն կտա բոլոր ազգությունների ներկայացուցիչներին այցելել, տեսնել, ծանոթանալ Հայաստանի ու հայ ժողովրդի պատմությանը»: