Ձեր վստահելի աղբյուրը

Այսօր գրեթե Ադրբեջանի 1,5 միլիոն քաղաքացիներ աշխատում են համեմատաբար մոտ տեղակայված արտասահմանյան երկրներում, որոնց թվում են առաջին հերթին Ռուսաստանը, Ուկրաինան, Թուրքիան, Ղազախստանը և Վրաստանը: Այս մասին «Էխո.ազ» կայքին հայտարարել է միգրացիայի հարցերով ադրբեջանցի փորձագետ Ազեր Ալլահվերանովը:

Փորձագետի խոսքերով՝ ներկայումս ՌԴ տարածքում ապրում են 572 հազար Ադրբեջանի քաղաքացիներ, որոնցից շուրջ 492 հազարը զբաղվում է աշխատանքային գործունեությամբ: Նրանցից շատերն աշխատում են ստվերային սեկտորում:

Բացի դրանից, Ադրբեջանը լքում են նաև որակավորված աշխատակիցները: Մասնավորապես՝ բժիշկները նախընտրում են արտագաղթել Սաուդյան Արաբիայի Թագավորություն: Ինչպես նշվում է նյութում, ըստ Kavpolit.com կայքի տվյալների՝ Սաուդյան Արաբիայում բուժքույրերի աշխատավարձը կազմում է 1200 դոլար, բժիշկներինը՝ 1800 դոլար, ինչը շատ ավելի բարձր է, քան Ադրբեջանում (բժիշկները ստանում են 150 դոլար):

«Եթե Ռուսաստանում և Թուրքիայում ադրբեջանցիների մեծամասնությունն աշխատում է, ապա Արևմուտքում աշխատող գաղթականները և ուսանողները շատ փոքր մաս են կազմում. Ադրբեջանի քաղաքացիների մեծամասնությունն այնտեղ ապրում է փախստականի կամ քաղաքական գաղթականի կարգավիճակով: Միգրացիայի միջազգային կազմակերպությունը (ՄՄԿ ) ԵՄ-ում ապրող Ադրբեջանի քաղաքացիների թիվը գնահատում է 50 հազար մարդ, բայց, ինչպես խոստովանում են փորձագետները, իրական թիվը շատ ավելին է, սակայն որևէ մեկը հանձ չի առնի դրա ճշգրիտ գնահատումը տալ»,- գրված է նյութում:

Նշվում է նաև, որ 1991-2006 թթ. 44 հազար ադրբեջանցիներ ապաստան են խնդրել ԱՄՆ-ում և ԵՄ-ում, հատկապես` Շվեցարիայում և Գերմանիայում: Եվրոպական երկրներից ադրբեջանցիների ներկայության առումով առավել անհանգստացած է Գերմանիան: Վերջինս բազմիցս է դիմել Ադրբեջանի ղեկավարությանը՝ իր քաղաքացիներին հետ վերադարձնելու խնդրանքով:

Ինչպես հաղորդում է լրատվական կայքը, ադրբեջանցիների մեծամասնությունն աշխատում է շինարարական հարթակներում, որակավորում չունեցող աշխատակիցների կարգավիճակով, իսկ կանայք՝ որպես դայակներ և աղախիններ` հյուրանոցներում: Շուրջ 1500 ադրբեջանցիներ սովորում են ԱՄՆ-ում և ԵՄ-ում: Նրանք չեն ձգտում հետ վերադառնալ հայրենիք: Եթե նույնիսկ Արևմուտքում կրթություն ստացած երիտասարդ մասնագետները, վերադառնալով հայրենիք, գտնում են աշխատանք, ապա հաճախ, միևնույն է, կրկին արտագաղթում են:

Նյութեր թեմայի շուրջ՝
«Эхо». Ադրբեջանցիները հիմնականում արտագաղթում են Ռուսաստան, Ուկրաինա, Թուրքիա, Գերմանիա, Կանադա և Իսրայել