Ձեր վստահելի աղբյուրը

Աշխարհի բնակչության երկու երորդը կարծում է, որ կրոնասեր է: Այս մասին գրում է The Telegraph պարբերականը` հղում տալով սոցհարցումների և հետազոտությունների շուկայի առաջատար WIN/Gallup International-ի հարցմանը, որին մասնակցել է աշխարհի 65 երկրների 64 հազար քաղաքացի:

Ինչպես ասվում է նյութում, Թաիլանդը, պարզվել է, որ ամենակրոնասեր երկիրն է. բնակչության 94 տոկոս հարցման մասնակիցներն իրենց հավատացյալ են անվանել, իսկ մեկ տոկոսը` հաստատակամ աթեիստ է: Երկրորդից հինգերորդ հորիզոնականները զբաղեցրել են Հայաստանը, Բանգլադեշը, Վրաստանն ու Մարոկկոն: Նրանցից յուրաքանչյուրն ունի 93 տոկոսի չափով հավատացյալ, սակայն տարբերվում են այլ չափորշիչներով: Երկրորդ տեղում հայտնված Հայաստանում հավատացյալները հարցվածների 93 տոկոսն են, 3 տոկոսն իրեն կրոնասեր չի համարում, 2 տոկոսն աթեիստ է, իսկ ևս 2-ը` դժվարանում է պատասխանել:

Հարցման տվյալների համաձայն` Կովկասում ադրբեջանցիներն ամենաքիչ կրոնասերներն են. այստեղ իրենց կրոնասեր են համարում հարցվածների ընդամենը 34 տոկոսը, 54-ը` կրոնասեր չի համարում, ևս 13-ը դժվարանում է պատասխանել:

Ամենաքիչ կրոնասեր բնակչությամբ հնգյակի ցուցակում են հայտնվել Նիդեռլանդները (26%), Չեխիան (23%), Շվեդիան (19%), Ճապոնիան (13%), Չինաստանը (7%):

Հարցման արդյունքում տվյալներ են ստացվել նաև, որ բնակչության առավել կրոնասեր զանգվածը 25-34 տարեկան երիտասարդներն են` հարցվածների 67 տոկոսը: Մյուս բոլոր տարիքային խմբերի միջին տոկոսը կազմել է 60 տոկոս:

«Իրականում իրենց կրոնասեր համարող մարդկանց ընդհանուր թիվը տպավորիչ է: Բացի այդ, նկատվում է միտում, որ երիտասարդությունն առավել կրոնասեր է դառնում ողջ աշխարհում: Մենք կարող ենք ենթադրել, որ իրենց կրոնասեր համարող մարդկանց թիվը դեռ նոր է շարունակում աճել»,- ասված է նյութում:

Ըստ հարցման` կրթություն չունեցող հարցվածների 80 տոկոսը պատասխանել է, որ կրոնասեր է, ընդ որում` միջին կամ բարձրագույն կրթություն ունեցող կրոնասերների տոկոսը կազմել է 60 տոկոս:

Հարցումն անցկացվել է այն բանից հետո, երբ Pew հետազոտական կենտրոնն անցած ամիս հայտարարել է, թե իսլամը գերակա կրոն է դառնալու ողջ աշխարհում 2100 թվականին: Կրոնական շերտերի ուսումնասիրությունում մասնագետները նաև նշել են, որ աթեիստների թիվը ողջ աշխարհում նվազելու է 35 տարի անց` բացառությամբ Արևմուտքում: