Ձեր վստահելի աղբյուրը

Առողջապահության նախարարությունը հայտնաբերել է, որ Կապանի սպանդանոցում աշխատել է ոչ թե 47, այլ 49 մարդ, ինչպես ավելի վաղ հայտարարել էր նախարարությունը:

Հիշեցնենք, որ ուղիղ մեկ ամիս առաջ «Իրազեկ և պաշտպանված սպառող» ՀԿ-ն ահազանգեց, որ Կապան քաղաքի բժշկական կենտրոնում 15 քաղաքացի բուժվում է բրուցելոզ հիվադության դեմ:

«Մենք պարզել ենք, 49 աշխատակից են, ոչ թե 47: Թեկուզ նախարարությունը հայտարարել էր 47-ի մասին, բայց մեր համաճարակաբանական հետազոտության տվյալներով մենք հայտնաբերեցինք 49 աշխատող: Նրանք բոլորն էլ ենթարկվեցին հետազոտության, նրանցից 19-ի մոտ հայտնաբերվեց բրուցելոզ հիվանդությունը»,-Panorama.am-ին ասաց Առողջապահության նախարարության «Հիվանդությունների վերահսկման և կանխարգելման ազգային կենտրոնի» հատուկ վտանգավոր և օդակաթիլային վարակների բաժնի պետ Լիաննա Թորոսյանը:

Ընդգծենք, որ ավելի վաղ նախարարությունը հայտարարել էր 17 հիվանդի մասին:

Թորոսյանն ասաց, որ հայտնաբերված բոլոր հիվանդները բուժում են ստացել պետպատվերի շրջանակում, այս պահին բոլորն էլ դուրս են գրվել. «Նրանց ընտանիքների նկատմամբ բժշկական հսկողություն է հայտարարվել, բրուցելոզը մարդուց մարդ չի փոխանցվում, մարդը համարվում է կենսաբանական փակուղի, սակայն որևէ խնդրի դեպքում նրանք կենթարկվեն համապատասխան շճաբանական հետազոտության: Բոլոր աշխատակիցներին հայտնաբերելն ու հետազոտելը բավականին լուրջ գործ է»:

Նրա խոսքով, աշխատակիցների ընտանիքների անդամներից որևէ մեկը որևէ գանգատ չի ունեցել: Հիվանդության առաջացման պատճառները դեռ հայտնի չեն: Սննդամթերքի անվտանգության պետական ծառայությունից Panorama.am-ին ավելի վաղ հայտնել էին, որ այս փուլում հետագծելիության սկզբունքով առանձին-առանձին ուսումնասիրվում է յուրաքանչյուր ուղեկցող փաստաթուղթ՝ պարզելու համար՝ արդյո՞ք հնարավոր էր, որ հիվանդ կենդանին, այնուամենայնիվ, տեղափոխվեր սպանդանոց:

Խնդրի ընթացքով մտահոգ «Իրազեկ և պաշտպանված սպառող» ՀԿ նախագահ Բաբկեն Պիպոյանը նշում է, որ Սյունիքում այս հիվանդության նկատմամբ առողջապահական ռիսկ պետք է գնահատվեր, որովհետև մարզում պիլոտային ծրագիր է իրականացվում:

ՀԿ նախագահն ուշադրություն է հրավիրում այն փաստի վրա, որ սպանդանոց տարված տասը հազար անասուններից վեց հազարը Սյունիքի տարբեր համայնքներից են. «Սյունիքում կար պրոբլեմ, վակցինացիա են արել ողջ գլխաքանակը: Հիվանդ կենդանին առողջից չի տարբերվում: Ծառայությունից պետք է գոնե ասեին, որ այս ծրագրի վերաբերյալ էլ կասկածներ ունեն, ինչո՞ւ չեն ասել, եթե կասկածներ չունեն, թող ասեն, չունեն»:

Պիպոյանն այն համոզմանն է, որ ցանկության դեպքում կարելի էր արագ գտնել պատճառները. «Մեկ ամսվա ընթացքում որևէ մեկը որևէ նոր բան չի ասում: Ավելին ասեմ, մեր կազմակերպությունը մի քանի օրվա ընթացքում ավելի շատ բան է ասել, քան բոլոր պատկան մարմինները միասին վերցրած: Այ հիմա, ոչ մի բան էլ չեն հայտնաբերի: Կարելի է այնպես ստուգել, որ ոչ մի բան էլ չհայտնաբերվի, և հակառակը՝ կարելի է այնպիսի ստուգում իրականացնել, որ հայտնաբերեն: Հիմա եթե մեր նպատակն է ոչ մի բան չհայտնաբերելը, ապա միշտ կարելի է այդպես անել»:

Ինչ վերաբերում է նոր աշխատակիցների հայտնաբերմանը, ապա Պիպոյանը շեշտեց, որ այդ մասին նախարարությունը պետք է տեղյակ պահի հարկային մարմնին. «Պետք է դրա վերաբերյալ տեղեկատվությունն ուղարկվեր դատախազություն, հարկային, ասին, թե ովքեր են այդ երկու հոգին, հերթական անգամ պետական շղթան չի գործել»: