Ձեր վստահելի աղբյուրը

Առաջին երեխայի մահից հետո Գյումրիում ապրող Ղուկասյանները չեն դադարում հավատալ, որ մի հրաշքով հիվանդ երկու երեխաներն առողջանալու են:

Մայրը պատմում է, մեծ տղան մահացավ, երբ 2.5 տարեկան էր, մյուս որդին՝ 9-ամյա Հովհաննեսը տառապում է նույն հիվանդությամբ: Գլխի կիստան առաջացել է չորս տարեկանում, պատճառը ավտովթարն է եղել: Հիվանդության հետևանքով երեխան ուժեղ գլխացավեր է ունենում, գլուխը տաքանում է, խոսելուց դժվարանում է, բառերն է մոռանում, վատ է արտաբերում: Լոգոպեդին այցերն արդեն անօգուտ են ու անարդյունք: Երեխային վիրահատություն է պետք:

Առաջին երեխայի բուժման ակնկալիքով Ղուկասյանները ծախել են ամեն ինչ, նաև տունը, հայաստանցի բժիշկներն ի վիճակի չեն եղել փրկել փոքրիկին: Մայրն ասաց, որ Ծերեթելիի հիվանդանոցում խոստացել են 2500 դոլարով վիրահատել Հովհաննեսին, բայց արդյունքների մասին երաշխավորել չեն կարողացել: Առաջին որդու մահը ստիպում է մորը չհավատալ հայաստանցի բժիշկների պրոֆեսիոնալիզմին, նախորդ տարի հիվանդ որդուն Մոսկվա է տարել, բժիշկներն ասել են վիրահատել կարող են միայն հասունացման շրջանի ավարտից հետո՝ 12 տարեկանում: Սակայն օր օրի ուժգնացող ցավերն ու Սանկտ Պետերբուրգից Հայաստան եկած Վիլյամ Խաչատրյանի հորդորը մորը ստիպում են օր առաջ որդուն վիրահատության տանել:

Նախորդ տարի Վանաձոր եկած գերմանացի բժիշկները տեսել են գյումրեցի տղային, ասել են՝ վիրահատել կարող են Գերմանիայում, կան համապատասխան մասնագետներ ու սարքավորումներ: Եվրոպական այդ երկրում վիրահատությունն անելու համար անհրաժեշտ է 25 հազար դոլար:

«Մենք առաջին երեխայի բուժման համար մոտ այդքան գումար ծախսեցինք Հայաստանում, սակայն երեխային փրկել չեղավ: Մեր ամեն ինչը ծախել ենք երեխայի համար: Շատ կներեք, բայց ես մտածում եմ, որ մեծ տղաս բժիշկների երեսից մահացավ, ոտքի երակին կպան, երեխուն ինվալիդ սարքեցին, շատ կներեք, որ ես ամենը տեսել եմ, չեմ վստահի տեղացի բժիշկներին»,-Panorama.am-ին ասաց Քրիստինեն:

Քրիստինեի մյուս երեխայի՝ ութամյա դստեր հիվանդության մասին իմացան երկու տարի առաջ՝ ամռանը: Առանց որևէ պատճառի երեխայի ոտքերն ուռում են, քայլել չի կարողանում, շտապ տեղափոխում են հիվանդանոց, պարզվում է, մազանոթների խնդիր ունի երեխան, ստամոքսում էլ գոյացություն կա:

«Բժիշկներն ասացին հազվադեպ պատահող հիվանդություն է, էդ հազվադեպ հիվանդներից մեկն էլ իմ աղջիկն է: Երկուսն էլ դպրոց չեն գնում: Մարիամին ուղարկում եմ դպրոց, զանգում են, ասում, երեխու փորը ցավում է, եկեք տարեք: Հովհաննեսն էլ պետք է չորրորդ դասարան լիներ, մի տարի դպրոց չգնաց, հիմա երրորդ դասարան է, բայց էլի չի գնում»,-ներկայացրեց մայրը:

Անցած աշնանը հինգ փաթեթ արյուն է առել՝ յուրաքանչյուրի համար վճարելով 14 հազար դրամ: Դրանից հետո աղջիկը համեմատած լավ է, բայց փորի ցավերը հաճախ են լինում: Կասկածում են, որ երևանյան հիվանդությամբ է տառապում: Մայիսին արտասահմանցի բժիշկներ են գալու, Քրիստինեին խոստացել են, որ ինքը հնարավորություն կունենա երեխաներին այդ բժիշկների մոտ տանել:

Մայրը Panorama.am-ին ասաց, որ համաձայն է, դստերը Հայաստանում վիրահատեն: Ընտանիքի հայրն էլ երիկամներից հիվանդ է, մինչ այդ տաքսի էր քշում, կարողանում գոնե հացի փողը վաստակել: Մայրը դաշտ էր գնում: Հիմա ոչ մայրը, ոչ հայրը չեն աշխատում, ապրում են վարձով: Լիբանանահայ մի բարերար վճարում է տան վարձը, Ավետարանչական եկեղեցու հետևորդ Մարիամին այդ եկեղեցին օգնում է սնունդով, ամեն ամիս տալիս է երկու շիշ ձեթ, հնդկաձավար, բրինձ, երկու կգ միս… Հովհաննեսն էլ հիվանդության համար ամսական 21 500 դրամ թոշակ է ստանում:

«Պլիտան քիչ եմ միացնում, որ կոմունալը քիչ լինի, մեր տանտերը պեչկը միացնում է, այնտեղ ենք լինում»,-ասաց նա: