Ձեր վստահելի աղբյուրը

Հայաստանի սրտաբանական ծառայությունը լավագույններից է և համապատասխանում է միջազգային բոլոր ստանդարտներին: Այս մասին այսօր լրագրողների հետ զրույցում ասաց Երևանի գլխավոր սրտաբան Պարունակ Զելվեյանը` հավելելով, որ բոլոր բուժական մեթոդները իրականացվում են միջազգային ստանդարտներին համապատասխան:

Այդուհանդերձ, ըստ նրա, այսօր սիրտ-անոթային համակարգի հիվանդությունները, ինչպես ամբողջ աշխարհում, այնպես էլ Հայաստանում մնում են բարձր հիվանդացության և մահացության հիմնական պատճառ` կազմելով ընդհանուր մահացության ավելի քան 50 տոկոսը: Դիտվում է սիրտ-անոթային հիվանդությունների երիտասարդացում, սիրտ-անոթային բարդություններով պայմանավորված հոսպիտալացումների քանակի աճ:

Պ.Զելվելյանի խոսքերով` սրտանոթային հիվանդությունների 80 տոկոսը կարելի է կանխարգելել ռիսկերի նվազեցման հաշվին` ավելցուկային քաշ, ծխախոտ, անառողջ սնունդ:

«Սրտանոթային հիվանդություններից մահացությունը նվազեցնելու արդյունավետ ճանապարհը սրտանոթային ռիսկի գործոնների կանխարգելումն է` զարկերակային գերճնշում, խոլեստերին, ավելորդ քաշի և այլն: Այսինքն` առողջ կենսակերպը այն գրավականն է, որով մենք կունենանք առողջ հասարակություն և չենք ունենա սիրտ-անոթային հիվանդություններից մահացություն»,- նշեց Պ.Զելվելյանը:

Ուստի, ըստ նրա, այսօր առաջին խնդիրը պետք է լինի այդ հիվանդությունների կանխարգելումը: Սրտաբանը նշեց, որ այսօր բուժում են այդ հիվանդությունների հետևանքները, որոնց տարածվածությունը շատ մեծ է:

«Զարգացած երկրներում սրտանոթային հիվանդացություններից մահացությունները 50%-ից ավելի է, և դա նորմալ երևույթ է։ Մարդը պետք է մեկ օր մահանա, բայց հարցն այն է, թե որ տարիքային խմբում։ Եթե մենք ասում ենք` պետք է նվազեցնենք սրտանոթային մահացությունները, ապա նկատի ունենք մինչև 65 տարեկան խմբում։ Այսինքն` մենք նպատակ ունենք կանխարգելելով հիվանդության զարգացումը երկարացնել մարդու կյանքը», - ասաց Պ.Զելվելյանը:

Նրա խոսքերով` ամբողջ աշխարհում տարածված են սրտանոթային նույն հիվանդությունները, մասնավորապես՝ զարկերակային գերճնշումը։ Օրինակ` Երևանում արված հետազոտությունը ցույց է տվել, որ այս հիվանդությունն ունի 30% տարածվածություն, մարզերում` 35 տոկոս:

«Համեմատության համար ասեմ, որ ԱՄՆ-ում այն կազմում է 29%, Գերմանիայում՝ 40%, Ռուսաստանում՝ ընդհուպ մինչև 50%: Այսինքն՝ տարածվածությունը նույնն է, ինչ այլ երկրներում: Բայց հարց է, որ զարգացած երկրներում մենթալիտետը ցույց է տալիս, որ դու պետք է հետևես առողջությանդ, քանի որ առողջ լինելը ևս փիլիսոփայություն է։ Մեզ մոտ խնդիրը նրանում է, որ արդյունավետորեն վերահսկվողների քանակն է քիչ»,- նկատեց Պ.Զելվելյանը:

Նրա խոսքերով` եթե ԱՄՆ-ում զարկերակային գերճնշում ունեցող հիվանդների 50%-ն արդյունավետորեն բուժվում է, ապա Հայաստանում այդ թիվը կազմում է ընդամենը 10%:

«Այսինքն, եթե մենք արդյունավետորեն չենք կանխարգելում ու բուժում, ակնկալել որ պետք է նվազեցնենք սրտանոթային մահացությունները, ճիշտ չէ: Ուստի նման միջոցառման նպատակներից մեկը նաև այն է, որ մենք կարողանանք ճիշտ բուժական միջոցառումներն առավել տարածել հասարակության մեջ, սերմանել դեղամիջոցներ կիրառելու սովորույթը, այլ ոչ թե սպասենք, թե մի «գեղեցիկ» օր սրտանոթային պատահար ունենանք ու մտածենք, թե ինչպես դա կարելի է բուժել»,- նշեց Պ.Զելվելյանը:

Հիշեցնենք, որ ՀՀ Գիտությունների ազգային ակադեմիայում Հայաստանի սրտաբանների ասոցիացիայի նախաձեռնությամբ ապրիլի 15-17-ին անցկացվում է «Սիրտ-անոթային հիվանդությունների պաթոգենեզի, ախտորոշման, բուժման և կանխարգելման տարբեր հարցեր» խորագրով 10-րդ հոբելյանական վեհաժողովը:

Վեհաժողովի շրջանակներում կարծարծվեն սիրտ-անոթային հիվանդություններին պաթոգենեզին, ախտորոշմանը, բուժմանը և կանխարգելմանը վերաբերվող հիմնահարցեր, այս բնագավառում կատարված մի շարք հետազոտություններ և դրանց արդյունքները, որոնք թույլ կտան նոր լույսի ներքո քննարկել սիրտ-անոթային հիվանդություններին վերաբերվող հիմնախնդիրները: Կկազմակերպվեն դեղագործական ընկերություների սատելիտային սիմպոզիումներ, որոնցում կներակայցվեն դեղագործական ընկերությունների վերջին նվաճումները, բուժման ռազմավարության նոր մոտեցումներ:

Նախորդող հրապարակում`
Սրտաբանությունը ՀՀ-ում մեծ քայլերով զարգանում է. մեկնարկեց հայ սրտաբանների վեհաժողովը