
Նաիրա Զոհրաբյանի նամակը՝ Եվրոպական խորհրդարանի պատգամավորներին
ՀՀ ԱԺ Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը նամակ է հղել Եվրոպական խորհրդարանի պատգամավորներին:
ԲՀԿ մամուլի ծառայությունից ներկայացնում են նամակն ամբողջությամբ.
«Եվրոպական խորհրդարանի հարգարժան պատգամավորներ
ՀՀ ԱԺ Եվրոպական ինտեգրման հարցերի մշտական հանձնաժողովն իր խորին շնորհակալությունն է հայտնում Եվրոպական խորհրդարանին, բոլոր այն պատգամավորներին, ովքեր երեկ, Եվրախորհրդարանի լիագումար նիստում, պաշտպանեցին ճշմարտությունն ու արդարությունը և կողմ քվեարկեցին Հայոց ցեղասպանությունը դատապարտող բանաձևին։
Դուք ևս մեկ անգամ ապացուցեցիք, որ որևէ քաղաքական կամ տնտեսական շահ չի կարող վեր լինել ճշմարտությունից, և որ մեր բոլոր գործողությունների չափորոշիչը պիտի լինի միմիայն արդարությունը։
Հարգարժան գործընկերներ, այս բանաձևի ընդունմամբ դուք կրկին անգամ վերահաստատեցիք ձեր հավատարմությունը մարդու իրավունքների պաշտպանությանն ու համամարդկային արժեքներին և հաստատեցիք, որ պատմական ճշմարտությունը երբեք ու որեւէ ժամանակում չի կարող և չպետք է լինի սակարկման առարկա։
Որպես «Բարգավաճ Հայաստանկուսակցության նախագահ, ուզում եմ իմ խորին շնորհակալությունը հայտնել Եվրոպական խորհրդարանի բոլոր քաղաքական ուժերին և հատկապես Եվրոպայի Պահպանողականների և Ռեֆորմիստների դաշինքին, որի անդամ է «Բարգավաճ Հայաստանը»: Եվրոպայի Պահպանողականների և Ռեֆորմիստների դաշինքի 11 պատգամավոր, այդ թվում՝ Եվրոպական խորհրդարանի փոխնախագահ Ռիշարդ Չարնեցկին, Հայաստան-ԵՄ միջխորհրդարանական համագործակցության հանձնաժողոի համանախագահ Սաջադ Քարիմը, եղել են Հայոց ցեղասպանությունը դատապարտող բանաձևի համահեղինակներ, իսկ խմբակցության պատգամավորները միաձայն կողմ են քվեարկել ներկայացված բանաձևին։
Մեր խորին շնորհակալությունը Եվրոպական խորհրդարանին»։