Ձեր վստահելի աղբյուրը

 ԶԼՄ-ների գծով ԵԱՀԿ ներկայացուցիչ Դունյա Միլատովիչը դատապարտել է ադրբեջանցի իրավապաշտպան, խոսքի ու ԶԼՄ-ների ազատության ակտիվիստ Ռասուլ Ջաֆարովին 6.5 տարի ազատազրկելու որոշումն Ադրբեջանում: Այս մասին ասված է ԵԱՀԿ պաշտոնական կայքում:

«Ջաֆարովի դատավճիռն անարդարություն է, որի հետևանքով ևս մեկն ավելացավ իրենց աշխատանքի պատճառով բանտերում փակված ադրբեջանցի լրագրողների ու իրավապաշտպանների ցուցակում: Ադրբեջանում անկախ ձայների համակարգված ու լայնամասշտաբ հետապնդումները հանդիսանում են մարդու հիմնարար իրավունքների և խոսքի ազատության իրավունքի խախտումներ»,- հայտարարել է Միյատովիչը` նշելով, թե Ջաֆարովի դատավարությունն ու հետաքննությունն ընթացել են լուրջ խախտումներով:

ԱՄՆ Պետքարտուղարության պաշտոնական ներկայացուցիչ Մարի Հարֆի հայտարարության մեջ էլ ասվում է, որ ԱՄՆ-ն խորապես անհանգստացած է ադրբեջանական դատարանի սույն վճռով, որը շատերը համարում են քաղաքականապես մոտիվացված: «Նրա ձերբակալությունը ևս մի հետքայլ է Ադրբեջանի ժողովրդավար զարգացման գործում: Մենք կոչ ենք անում Ադրբեջանի կառավարությանը կատարել իր միջազգային պարտավորությունները և հարգել իր քաղաքացիների իրավունքները: Որպես առաջին քայլ` կոչ ենք անում իշխանություններին ազատ արձակել Ջաֆարովին և իրենց հիմնարար ազատություններն օգտագործելու համար ձերբակալված մյուս անձանց»,- նշված է հայտարարության մեջ:

Twitter-ի իր միկրոբլոգում ԵԽԽՎ նախագահ Անն Բրասերը ևս գրել է որ Ադրբեջանում իրավապաշտպանների դեմ բռնաճնշումներն արտացոլում են մարդու իրավունքների կայուն հետընթացը` ափսոսանք հայտնելով Ռասուլ Ջաֆարովի դատավճռի առնչությամբ:

Ադրբեջանցի իրավապաշտպանի ձերբակալման թեմային է անդրադարձել նաև միջազգային հեղինակավոր իրավապաշտպան կազմակերպություններից մեկը` Human Rights Watch-ը` իր հերթին կոչ անելով Ադրբեջանի միջազգային գործընկերներին Ադրբեջանին հասկացնել, թե Եվրոպական խաղերի բացմանը Բաքվում իրենք բարձրաստիճան պատվիրակություններ չեն ուղարկելու, եթե Ջաֆարովն ու մյուս քաղբանտարկյալներն ազատ չարձակվեն, և քաղաքացիական հասարակության դեմ բռնաճնշումները չդադարեցվեն:

«Ջաֆարովն Ադրբեջանում քաղաքականապես մոտիվացված հետապնդումների ամենահեղինակավոր ու բացեիբաց քննադատներից էր, որն այժմ ինքն է դարձել դրանց զոհը»,- ասել է Human Rights Watch-ի` Հարավային Կովկասի գծով ավագ հետազոտող Գեորգի Գոգիան, որին դեռևս մարտի 30-ին չէին թողել Ադրբեջան մուտք գործել, որպեսզի վերջինս չկարողանա ներկա լինել իրավապաշտպաններ Ինթիգամ Ալիևի և Ռասուլ Ջաֆարովի դատավարություններին:

Խոշտանգումների դեմ համաշխարհային կազմակերպության և Մարդու իրավունքների միջազգային դաշնության համատեղ ծրագիրը` Իրավապաշտպանների պաշտպանության գծով միջազգային կազմակերպությունը, որի ներկայացուցիչը եղել էր Ջաֆարովի դատին, նույնպես դատապարտել է այն` շեշտելով, թե դատավճիռն անընդունելի է` կեղծ մեղադրանքների հիման վրա:
«Ազատություն ռադիոկայանն» էլ հաղորդում է, որ Ջաֆարովի փաստաբանը` Ֆարիզ Նարիմանլին, հայտարարել է, թե բողոքարկելու են դատավորի որոշումը: The Sun Daily-ը գրում է, որ նավթով հարուստ հետսովետական Ադրբեջանը այլակարծությանը հաճախ է պատասխանում կոշտ միջոցներով: BuzzFeed-ը հիշեցնում է, որ 2012-ին «Եվրատեսիլի» ժամանակ Ջաֆարովն ուշադրություն էր հրավիրել մարդու իրավունքների բնագավառում Ադրբեջանի վատ ցուցանիշների վրա, իսկ 2015-ի Եվրոպական խաղերին ծրագրել էր բողոքի ակցիա կազմակերպել:

Բացի այդ, Кавказский Узел-ի` «Քամի Ապշերոնից» անունով սյունակագիրն «Անիմաստ դաժանություն» խորագրով հոդվածում ընդգծել է, որ կատարվածն առաջ է բերում «ամոթի ու նողկանքի զգացումներ», և դա չարդարացված դաժանություն է, որը հսկայական վնաս է հասցնում ողջ Ադրբեջանին: Նա զարմանք է հայտնում, թե ինչու ճանապարհների կառուցման գործում կաշառակերության միջոցով գումար աշխատող ադրբեջանցի պաշտոնյաներն ազատության մեջ են, իսկ իր տեսակետն արտահայտող իրավապաշտպանը ձերբակալված է:

Հիշեցնենք, որ հայտնի ադրբեջանցի իրավապաշտպան, «Արվեստը` հանուն ժողովրդավարության» արշավի կազմակերպիչ Ռասուլ Ջաֆարովը դատապարտվել է 6.5 տարի ազատազրկման: Նման որոշում է կայացրել դատավոր Էլդար Իսմայիլովն ապրիլի 16-ին Բաքվի` ծանր հանցանքների գծով դատարանում: Բացի այդ, ազատ արձակվելուց հետո Ջաֆարովին արգելված է երեք տարվա ընթացքում որևէ պաշտոն զբաղեցնել: Մեղադրական վճռից հետո Ջաֆարովը հայտարարել է, թե այն համարում է կեղծ և քաղաքական պատվեր: Դատարանն ինքնին չի կարողացել ապացուցել իրավապաշտպանի մեղքը: Մեղադրող կողմի բոլոր վկաները հօգուտ Ջաֆարովի են ցուցմունք տվել, և դատական գործի ողջ ընթացքն ապացուցում է նրա լիարժեք անմեղությունն այս հարցում:

Նշենք, որ Ռասուլ Ջաֆարովը 2012 թվականի դեկտեմբերին կազմակերպել է «Արվեստը` հանուն ժողովրդավարության» անվամբ արշավը, որով կոչ է արվել երիտասարդներին արվեստի միջոցով ոտքի կանգնել հանուն արդարության, այլ ոչ բռնության միջոցով: 2014 թվականի օգոստոսի 2-ին նրան հարկերի վճարումից խուսափելու և պաշտոնական իրավասությունների չարաշահման մեղադրանքներով ձերբակալել են: Նա չի ընդունել իր մեղքը: Միջազգային հեղինակավոր իրավապաշտպան կազմակերպությունները` Amnesty International և Human Rights Watch, դատապարտել են ադրբեջանցի իրավապաշտպանի ձերբակալությունը, իսկ Amnesty International-ը նրան բնորոշել է` որպես «խղճի բանտարկյալ»:

Բացի այդ, ԵՄ ընդլայնման և Եվրոպական Հարևանության քաղաքականության հարցերով հանձնակատար Շտեֆան Ֆյուլեն և Եվրամիության արտաքին քաղաքականության և անվտանգության հարցերով գերագույն հանձնակատար Քեթրին Էշթոնը 2014 թվականին հանդես են եկել համատեղ հայտարարությամբ` անհանգստություն հայտնելով «Ադրբեջանում հերթական հայտնի իրավապաշտպանի` Ռասուլ Ջաֆարովի ձերբակալման առնչությամբ»:

Նյութ թեմայի շուրջ`
ԵԽԽՎ անկաշառ պատգամավորները փորձում են բացահայտել Ադրբեջանի կողմից կաշառվածներին