Ձեր վստահելի աղբյուրը

«Չնայած Հայաստանում էական գործընթացներ կան աջակցելու հաշմանդամություն ունեցող անձանց իրավունքների իրացմանը, այնուամենայնիվ շատ-շատ են խնդիրները, որոնք խոչընդոտում են հաշմանդամություն ունեցող մարդկանց մասնակցությանը կյանքի տարբեր ոլորտներին»,-լրագրողների հետ հանդիպման ժամանակ ասաց «Հույսի կամուրջ» ՀԿ-ի նախագահ Սուսաննա Թադևոսյանը:

Ըստ նրա, հաշմանդամության տարբեր տեսակներ ունեցող մարդիկ տարբեր խնդիրների են բախվում, բայց բոլոր տեսակների մեջ խնդիրներն ավելի ակնհայտ են դառնում, երբ հաշմանդամություն ունի կինը:

«Առաջին՝ բախվում են ավանդական շատ կարծրատիպերի՝ կապված կնոջ պատմական դերակատարման հետ՝ ամուսնանալ, մայրանալ»,- շեշտեց Ս. Թադևոսյանը:

Նա նշեց, որ ՄԱԿ-ի Մանկական հիմնադրամի կողմից 2012 թ. անցկացված հետազոտության համաձայն, ընդհանուր առմամբ հաշմանդամություն ունեցող երեխաների և մեծահասակաների մեջ մեծ թիվ են կազմում արական սեռի ներկայացուցիչները, որը կապված է նաև հիվանդությունների այնպիսի տեսակների հետ, որոնց նկատմամբ ավելի խոցելի են տղամարդիկ, սակայն մանկատներում մեծ թիվ են կազմում հաշմանդամություն ունեցող աղջիկները:

«Սա մտահոգության տեղիք է տալիս. երբ ընտանիքում ծնվում է հաշմանդամություն ունեցող տղա կամ աղջիկ, վերաբերմունքի տարբերություն է լինում»,- նշեց նա:

Միաժամանակ հավելեց, որ հանրակրթական դպրոցներում երեխաների մեջ մեծ տոկոս են կազմում հաշմանդամություն ունեցող տղաները:

Ս. Թադևոսյանը նաև նշեց, որ հաշմանդամություն ունեցող աղջիկներն ամենադժվարին խնդրների սկսում են բախվել, երբ դառնում են չափահաս:

«Հաշմանդամություն ունեցող անձանց շահերի պաշտապանության ազգային դաշինքի» նախագահ Զարուհի Բաթոյանն էլ ասաց, որ հաշմանդամություն ունեցող աղջիկները, կանայք հասարակական ոլորտում ակտիվ չեն:

«Հաջորդ խնդիրը, որ կուզեմ նշել՝ անտեսանելիությունն է հաշմանդամություն ունեցող կանանց պետական և հասարակական ծրագրերում: Շատ ծրագրեր կան, որոնք ուղղված են կանանց: Իհարկե, գովելի է, խթանում է կանանց իրավունքների պաշտպանությանը, ցավոք, հաշմանդամություն ունեցող կանայք ներառված չեն»,- նշեց Զ. Բաթոյանը: