Ձեր վստահելի աղբյուրը

«Մենք պատրաստվում ենք գիտական հիմնավորումներով բացահայտել ալյուրի հարստացման մասին այն միֆերը, առասպելները, որոնք ներկայացվում են ընդդիմախոսների կողմից»,- այս մասին այսօր ասաց ՀՀ առողջապահության նախարար Արմեն Մուրադյանը` պատասխանելով Panorama.am-ի հարցին, թե եթե ալյուրի հարստացման ծրագրի վերաբերյալ հակափաստարկներ բերվեն, ապա նախարարությունը ի՞նչ քայլեր կձեռնարկի և արդյոք կհրաժարվի ծրագրի իրականացումից:

«Զավեշտալի և անհեթեթ են մեծամասնությունը այդ փաստարկների, որոնք ներկայացվում են ընդդիմախոսների կողմից: Մենք պատրաստ ենք գործնական, գիտական հիմնավորված, մեթոդաբանությունով քննարկումների: Առաջիկայում նախատեսվում է այս հարցին շուրջ քննարկումներ անցկացնել ԳԱԱ-ում՝ մասնագետների մասնակցությամբ: Անհրաժեշտ է պարզել, թե ինչո՞ւ որոշ մարդիկ այդքան չեն ուզում, որ այս ծրագիրը մեր երկրում կյանքի կոչվի»,- ասաց նախարարը:

Նա նշեց նաև, որ ՀՀ առողջապահության նախարարությունը նախատեսում է հարցը քննարկել նաև աշխարհում ճանաչված նյուտրիցիոլոգների՝ սննդի մասնագետների հետ:

«Քննարկումներ կլինեն: Մենք բացարձակ կարծրացած չենք, որ որոշել ենք, ուրեմն այդպես էլ լինելու է, բայց հակափաստարկներ չենք կարողանում դեռ ստանալ»,- ընդգծեց Ա.Մուրադյանը:

Նախարարը նաև ասաց, որ աշնանը պատրաստ կլինի Հայաստանի ժողովրդագրության և առողջության հարցերի հետազոտությունը, որը ներկայացվում է հինգ տարին մեկ անգամ:

«Դրանք ՀՀ բնակչության առողջության մասին նոր տվյալներ են, և ինձ մոտ այնպիսի տպավորություն է, որ այդ ցուցանիշները վատթարացում են գրանցելու, մասնավորապես, վերարտադրողական տարիքի երեխաների շրջանում սակավարյունության աճի հետ կապված»,- նշեց Ա.Մուրադյանը:

Ըստ նրա` այն փաստարկները, թե ալյուրի հարստացումը քաղցկեղածին է, ապա յուրաքանչյուր վիտամին իր պակասի և ավելցուկի դեպքում առողջության համար կարող է լուրջ վտանգ ներկայացնել:

«Եթե մարդն օրական ուտի 50 կգ հաց, բնականաբար, դա նրա համար վտանգավոր կլինի»,- ասաց նա:

Ա.Մուրադյանի խոսքերով` Հայաստանում տարեկան 700 երեխա ծնվում է տարբեր տեսակի արատներով, որից 80-ը՝ նյարդային խողովակի լուրջ արատներով, ինչը բերում է հաշմանդամության ողջ կյանքի ընթացքում: Այս ամենը, ըստ նրա, ֆոլաթթվի պակասի հետևանք է:

Նա նշեց, որ տարբեր երկրներ տարբեր ձևով են լրացնում երկաթի պակասը: Ըստ նախարարի` աշխարհի շուրջ 80 երկրում ալյուրի հարստացման գործընթացն իրականացվել է։ Այս երկրներում հարստացվում է ոչ միայն ալյուրը, այլև հյութը, կաթնամթերքը, տարբեր տեսակի սննդամթերքները: Օրինակ` Ավստրիայում 482 մթերքատեսակ հարստացվում է: Հայաստանում նպատակահարմար և ծախսարդյունավետ են համարել ալյուրի հարստացումով խնդիրը լուծելը:

Ա.Մուրադյանի խոսքերով` ալյուրի հարստացման ծրագրին դեմ արտահայտվելը նույնն է, ինչ ծխելու դեմ պայքարը քննադատել: «Այն պնդումը, որ այս նյութերի կարիք ունեն միայն մարդիկ, ում մոտ դրանց պակաս կա, նույնն է, ինչ համոզել, որ ծխելը վնասակար է միայն այն մարդկանց, ովքեր քաղցկեղ ունեն», - նշեց նախարարը:

Հարցին, թե այդուհանդերձ, եթե ընդդիմախոսները ապացուցված հակափաստարիներ ներկայացնեն, ապա ծրագրից կհրաժարվե՞ն, Ա.Մուրադյանը նշեց, որ բացի հուզական փաստարկներից, մինչ օրս որևէ լուրջ գիտական հիմնավորում չեն լսել:

Նշենք, որ այս օրենքի նախագծի ընդունումը նպատակ ունի Հայաստանի Հանրապետության բնակչության շրջանում կանխարգելել միկրոտարրերի և վիտամինների անբավարարության հետևանքով առաջացող հիվանդությունների, մասնավորապես` երկաթի և ֆոլաթթվի անբավարարությամբ պայմանավորված` երեխաների և կանանց սակավարյունության, երեխաների ճանաչողական զարգացման դանդաղման և իմունային մեխանիզմների խաթարման, կանանց շուրջծննդաբերական բարդությունների, նորածինների բնածին արատների (ողնուղեղային ճողվածք, ուղեղի ջրգողություն), մեծահասկաների ֆիզիկական աշխատունակության վատթարացման, սրտանոթային հիվանդացության ու մահացության և այլ անբարենպաստ երևույթների առաջացումը: Օրենքի հեղինակների բնորոշմամբ` ալյուրի հարստացումը ոչ թե բուժիչ, այլ հանրային առողջապահական, կանխարգելիչ ծրագիր է:
 

Նախորդող`
Կոչ` ԱՆ-ին. Ինչո՞ւ եք պարտադրում, ում անհրաժեշտ է, կարող է դեղորայքի տեսքով օգտագործել ֆոլաթթու
Ալյուրի հարստացումը հետաձգվեց մեկ տարով
ԱՆ. Ցորենի ալյուրի հարստացման ծրագիրը միտված է հիվանդությունների կանխարգելմանը