Ձեր վստահելի աղբյուրը

Դեռևս մարտ ամսին Սյունիքի մարզի Կապան քաղաքում գրանցված բրուցելոզի դեպքի վերաբերյալ շատ հարցեր մնում են անպատասխան: Հիշեցնենք, որ բոլոր 19 հիվանդները Կապանի սպանդանոցի աշխատակիցներ էին, սպանդանոցը պատկանում է Մաքսիմ Հակոբյանին:

«Իրազեկ և պաշտպանված սպառող» ՀԿ-ն արձանագրում է. «Դեռևս մարտ ամսին Սյունիքի մարզի Կապան քաղաքում գրանցված բրուցելոզի դեպքից հետո, երբ մեծ աղմուկից հետո ի վերջո հայտնաբերվել էր 19 հիվանդ, բարձրաձայնել էինք, որ անհրաժեշտ է պարզել, թե ինչպես են հիվանդ կենդանիներին տրվել առողջությունը հաստատող փաստաթղթեր և ինչ ռիսկեր է պարունակում բրուցելոզի դեմ իրականացվող վակցինացիայի պիլոտային ծրագիրը, և ի վերջո, որ փուլում են հիվանդները վարակվել: Կոչ էինք արել նաև պարզաբանել, թե ինչու են լռել պատկան մարմինները՝ չբարձրաձայնելով և փորձելով թաքցնել դեպքը: Մինչ օրս նշյալ հարցերի պատասխաններն այդպես էլ չեն բարձրաձայնվել»:

ՀԿ տարածած հաղորդագրության համաձայն, բրուցելոզի վարակն այժմ էլ տարածվել է Կոտայքի մարզում: Ինչպես տեղեկացնում է Առողջապահության նախարարությունը՝ այս պահի դրությամբ Սոլակ համայնքում կա 9 հիվանդ, որից 7-ը հոսպիտալացված են:

«Հատկանշական է, որ մինչ օրս պատկան մարմինների կողմից չկա որևէ հայտարարություն առ այն, թե ի վերջո ինչն է հանդիսացել վարակի աղբյուր: Ուշագրավ է, որ վակցինացման աշխատանքներ են իրականացվում նաև Կոտայքի մարզի որոշ համայնքներում (գյուղերում), և զուգադիպություն է, թե ոչ, սակայն հիվանդության 2-րդ բռնկումը հենց Կոտայքի մարզում է:

Հիշեցնենք, որ «Իրազեկ և պաշտպանված սպառող» ՀԿ-ն մշտապես բարձրաձայնել է վակցինացման հնարավոր ռիսկերի և վտանգների մասին և դեմ է եղել բրուցելոզի նկատմամբ կենդանիների վակցինացմանը, քանզի գործող ենթակառուցվածքների պայմաններում, կենդանիների համատարած համակարակալման և հաշվառման համակարգի բացակայության, տեղաշարժի անվերահսկելիության, ինչպես նաև մի շարք անհրաժեշտ պայմանների բացակայության պարագայում, մասնավորապես այն, որ անհնար է լաբորատոր փորձաքննության միջոցով պարզել արդյոք կենդանին հիվանդ է, թե՝ վակցինացված, վակցինացում իրականացնելը նպատակահարմար չէ:

«Կոչ ենք անում պատկան կառույցներին ի վերջո պարզաբանել, թե ինչ աշխատանքներ են իրականացվել վարակի աղբյուրի հայտնաբերման ուղղությամբ, ինչն է հանդիսացել վարակի պատճառ, բրուցելոզի որ տիպն է ի վերջո ախտորոշվել մարդկանց մոտ, և ինչ գործողություններ են արվել վարակի հնարավոր հետագա տարածումը կանխելու համար»:

ԳՆ Սննդամթերքի անվտանգության պետական ծառայության մամուլի քարտուղար Նվարդ Առաքելյանը Panorama.am-ին ասաց, որ Կապանում գրանցված դեպքի առթիվ ուսումնասիրությունները շարունակվում են, ըստ փաստաթղթերի՝ ամեն ինչ նորմալ է:

«Այս պահին հատ-հատ բոլոր փաստաթղթերը ուսումնասիրվում են, համադրվում են գյուղի կենդանիների թվերի հետ, որպեսզի այդ հաշվարկի մեջ հասկանանք, կարո՞ղ է թղթի մեջ երևում է մաքուր, բայց ամեն դեպքում տեղաշա՞րժ է եղել»,-բացատրեց մամուլի քարտուղարը:

Հնարավո՞ր է, որ սպանդանոցի սեփականատիրոջ գործոնն ազդում է աշխատանքերի ընթացքի վրա: Հարցին ի պատասխան Ն. Առաքելյանն ասաց. «Չէ, չէ, բացարձակապես, չէ: Ընդհակառակը, մենք շահագրգռված պետք է լինեինք, որ այս դեպքում հատկապես մինչև վերջ գնանք: Ուղղակի ասում եմ, վերջին անգամ սպանդանոցում մորթ իրականացվել է հոկտեմբեր-նոյեմբերին, իսկ ահազանգ եղել է մարտին: Փաստաթղթերով բրուցելոզի դեպք չկա, բայց փաստը մնում է փաստ, որ եղել է: Հիմա հատիկ-հատիկ համադրվում են թղթերը»:

Հիշեցնենք, որ Կապանում հիվանդության մասին առաջին անգամ ահազանգեց «Իրազեկ և պաշտպանված սպառող» ՀԿ-ն, մինչ այդ Առողջապահության նախարարությունն ու ՍԱՊԾ-ն լռում էին դեպքի մասին:

Նախորդող հրապարակումներ՝
Սպանդանոցում աշխատել է ոչ թե 47, այլ 49 մարդ. Նոր մանրամասներ բրուցելոզից
ՍԱՊԾ-ն դեռ չի պարզել Կապանում բրուցելոզի տարածման պատճառները