Ձեր վստահելի աղբյուրը

Ադրբեջանցի իրավապաշտպան, «Իրավական իրազեկման միության» ղեկավար Ինթիգամ Ալիևին դատապարտել են ազատազրկման 7 տարի և 6 ամիս ժամկետով: Ալիևը մեղադրվում է Ադրբեջանի Քրեական օրենսգրքի 213.1 (խուսափում հարկերի վճարումից), 308.2 (ծառայողական լիազորությունների չարաշահում՝ ծանր հետևանքներով), 192. 2 (ապօրինի գործունեություն) և 179.3.2 (խոշոր չափի գումարների յուրացում) հոդվածներով: Դատախազ Ֆարիդ Նագիևն առաջարկել էր Ալիևին դատապարտել 10 տարվա ազատազրկման ընդհանուր ռեժիմի կալանավայրում: Այս մասին հաղորդում է դրբեջանական «Հաքքին.ազ» լրատվական պորտալը:

«Ռադիո Ազատություն» ռադիոկայանի ադրբեջանական ծառայությունն իր հերթին հաղորդում է, որ Ալիևը, հանդես գալով եզրափակիչ խոսքով, հայտարարել է քրեական գործի` ամբողջովին խեղաթյուրված լինելու և իր հետապնդման քաղաքական դրդապատճառների մասին:

«Շուրջ չորս ամիս շարունակվող այս գործընթացը ևս մեկ անգամ ապացուցում է, որ այն հիմնվում է ոչ թե օրենքի, այլ ուրիշ նորմերի և կանոնների վրա: Ինձ զրկել են պաշտպանության համար բոլոր միջոցներից և փաստարկներից: Ինձ ձերբակալել են իմ իրավաբանական գործունեության պատճառով: Ես Մարդու իրավունքների Եվրոպական դատարան ավելի քանի 200 գործ եմ ներկայացրել, որոնցից ավելի քանի քառասունը կապված է խորհրդարանական ընտրությունների հետ»,- ասել է նա:

Նրա խոսքերով՝ կառավարությունը մեծ ջանքեր է գործադրել, որպեսզի այդ գործերը դատարան չհասնեն և լուծում չստանան: Եվրոպական դատարանը մի շարք հանձնարարականներ է տվել Ադրբեջանում ընտրությունների հետ կապված իրավիճակը կանոնավորելու համար: Բնականաբար, դա Ադրբեջանի ղեկավարության մոտ զայրույթ է առաջացնում: «Իմ ձերբակալության պատճառներից մեկն էլ իմ հասարակական գործունեությունն է: Ես քիչ թվով ելույթներ չեմ ունեցել եվրոպական և միջազգային կազմակերպություններում: Իմ ելույթներում ես նշել եմ, որ Ադրբեջանում մարդու իրավունքների ոլորտում իրավիճակն էլ ավելի է վատթարացել, հասարակության ազատությունը նվազել է: ԵԽԽՎ ամառային նստաշրջանից և նախագահ Իլևամ Ալիևի ելույթից հետո մեկնարկվել է արշավ Ադրբեջանում քաղաքացիական հասարակության դեմ», - հայտարարել է Ալիևը:

Իրավապաշտպանը նշել է նաև, որ հենց այդ ժամանակ սկզբում նախագահի աշխատակազմի ղեկավար, Ադրբեջանում երկրորդ ամենահզոր անձը՝ Ռամիզ Մեհտիևը, այնուհետև բոլոր պաշտոնական և իշխանամետ ԶԼՄ-ներում սկսել են օգտագործել «հինգերորդ շարասյուն» և «արևմուտքում աշխատող ուժեր» պիտակները:

«Եթե Արևմուտքը և Եվրոպան Ադրբեջանի թշնամիներն են, ապա ինչու է երկիրը շարունակում մնալ ԵՄ, ԵԱՀԿ-ի և այլ միջազգային կառույցների անդամ և կոնվենցիայի մասնակից: Ինչու են պետական բյուջեից հսկայական գումարներ ծախսվում թանգարանների, Եվրոպայի պատմական հուշարձանների վերանորոգման, ոչ պատմական հուշարձանների տեղադրման, «Եվրոպականի» ներքո տարբեր երաժշտական մրցույթների և սպորտային մրցաշարերի վրա: Ինչու՞ ենք մենք գազ և նավթ վաճառում Եվրոպային: Ինչու՞ է երկրի արտարժութային պահուստների զալի մասը պահվում եվրոպական բանկերում: Ինչ է ստացվում. երբ Եվրոպան, Արևմուտքը աջակցում են կեղծված ընտրությունները, ապա նրանք մեր ընկերներն են, իսկ երբ նրանք մեղմ կերպով արձագանքում են մարդու իրավունքների խախտումներին և քաղաքական ձերբակալություններին, ապա դառնում են թշնամիներ»,- ասել է Ինթիգամ Ալիևը:

Իր խոսքերով` ներկայումս հնարավոր է համոզված ասել, որ երկրում այլևս չկա անկախ քաղաքացիական հասարակություն, այն ոչնչացված է: Կան առանձին այլախոհներ, որոնք շարունակում են պայքարը` չնայած ամեն պահ ձերբակալվելու սպառնալիքի: «Ձերբակալությունները կարող են խլել մեզանից ազատությունը, սակայն ոչ ազատ լինելու ցանկությունը: Մեր ձերբակալությունը մեր պայքարի շարունակությունն է»,- ասել է Ալիևը:

Ավարտելով խոսքը` Ալիևը շնորհակալություն է հայտնել իր համախոհներին սատարելու համար` անկախ մամուլին, միջազգային կազմակերպություններին` մատնանշելով փաստաբանների անձնվիրությունը: Նաև ողջունել է բանտարկության մեջ իր գործընկերներին` Թոֆիգ Յաղուբլուին, Իլղար Մամեդովին, Լեյլա Յունուսին, Սեյմուր Խազիին, Խադիջա Իսմայիլովային, Իլքին Ռուսթամզադեին, Ռաշադաթա Ախունդովին: