Ձեր վստահելի աղբյուրը

ՀՀ առողջապահության նախարար Արմեն Մուրադյանն այցելել է Հայոց ցեղասպանության ականատես-վերապրած Սիլվարդ Ատաջյանին:

Առողջապահության նախարարության մամուլի ծառայությունից հայտնում են, որ 103-ամյա կինը 2015թ. փետրվարի սկզբին ՀՀ առողջապահության նախարարության աջակցությամբ ոսկրաբեկորների տեղաշարժով աջ ազդոսկրի վզիկի փակ կոտրվածքի վիրահատություն էր տարել: Հանձնաժողովային կարգով որոշում էր կայացվել աջակցել և պետության կողմից երաշխավորված բժշկական օգնության և սպասարկման շրջանակներում կատարել վիրահատությունը:

«Ձեր շնորհիվ ապաքինվեցի: Ճիշտ է, ոտքս մեկ-մեկ ցավում է, սակայն այժմ կարողանում եմ քայլել, ոտքի եմ կանգնել»,- ասել է Սիլվարդ Ատաջյանը:

Արմեն Մուրադյանը զրուցել է տիկին Սիլվարդի հետ` հավաստիացնելով, որ նրա ցանկացած առողջական խնդիր լուծում կստանա:

«Ձեր առողջությունը մեզ համար շատ թանկ է»,- ընդգծել է նախարարը` մաղթելով ականատես-վերապրածին ամուր առողջություն:

Տիկին Սիլվարդը պատմել է իր հայրենի Մուսա լեռից, անցյալից որոշ դրվագներ հիշել:

«Յոթ երեխա էինք` չորս քույր և երեք եղբայր, ես մնացի միակ ձնծաղիկ»,- կատակում է տարեց կինը:

Ականատես-վերապրածների առողջական խնդիրները նախարարության մշտական ուշադրության ներքո են: Հայոց ցեղասպանության 100-րդ տարելիցին նվիրված միջոցառումների շրջանակում ստեղծվել է համակարգող խորհուրդ, որը բժշկական օգնություն, դեղեր և բժշկական պարագաներ է տրամադրել 28 ականատես-վերապրածի: Երևանում և մարզերում մասնագիտական խմբերի համայցերի ընթացքում կատարվել են անհրաժեշտ բժշկական հետազոտություններ, որոնց հիման վրա ստեղծվել են ականատես-վերապրածների բժշկական անձնագրերը: ՀՀ առողջապահության նախարարությունում գործում է 055 05 86 26 շուրջօրյա հեռախոսահամարը, որով կարող են զանգահարել ականատես-վերապրածները կամ իրենց հարազատները և ստանալ անհրաժեշտ բուժօգնություն:

Նախորդող հրապարակումներ՝
Դեղեր և բժշկական պարագաներ` Հայոց ցեղասպանության մարզաբնակ ականատես-վերապրածներին
Բժշկական օգնություն և սպասարկում` Հայոց ցեղասպանությունը վերապրած Երևանի 8 բնակչի
Բժշկական օգնություն Հայոց ցեղասպանության ականատես-վերապրողներին