Ձեր վստահելի աղբյուրը

«Շնորհակալ ենք Հայաստանին ասորիների ցեղասպանությանն անդրադառնալու համար»,-այդ մասին իրանահայ համայնքի «ԱԼԻՔ» օրաթերթի հաղորդմամբ` հայտարարել է Իրանի Մեջլիսի ասորի պատգամավոր Իվնաթան Բեյթ Քոլիան:

Ասորի պատգամավորն Իրանի Մեջլիսում ունեցած ելույթի ընթացքում, անդրադառնալով Հայոց ցեղասպանության 100-րդ տարելիցին, մասնավորապես նշել է. «Ահավասիկ հարյուր տարի է անցնում օսմանցիների ձեռքով ասորիների, հայերի և հույների դեմ իրագործված ահավոր ցեղասպանությունից, սակայն ոչ միայն դեռ չեն բավարարվել զոհերի ժառանգների իրավացի պահանջները, այլ ներողության որևէ բառ անգամ չի հնչեցվել: Այսօր, հարյուր տարի անց նրանք դեռ նոր ասում են՝ պետք է ուսումնասիրել, թե արդյոք այդ անմարդկային աղետը ցեղասպանություն է եղել, թէ ոչ: Ինչ մանկամտություն»:

Շարունակելով խոսքը` ասորի պատգամավորը հավելել է. «Այսօր միայն Հայաստանն ու Եվրախորհրդարանն են անդրադառնում 1915թ. ասորիների Ցեղասպանությանը, որի համար շնորհակալ ենք»:

Ինչպես նշել ենք, Հայոց ցեղասպանության 100-րդ տարելիցի առթիվ Իրանի Մեջլիսում ելույթ են ունեցել նաև հայազգի պատգամավորներ Ռոբերտ Բեգլարյանն ու Կարեն Խանլարյանը:

Ռոբերտ Բեգլարյանն իր ելույթում մասնավորապես նշել էր. «Կառավարությանը, հատկապես նախագահ Ռոհանիին կոչ ենք անում իրական երևույթները կոչել իրենց անունով, այդ կերպ հնարավոր կլինի նաև աջակցել տարածաշրջանի անվտանգության հաստատմանը»:

Նախորդ հրապարակումներ`
Հայոց ցեղասպանության հարցում Իրանի դիրքորոշումը
Իրանական կայք. Օսմանյան թուրքերը բացի հայերից՝ կոտորել են նաև իրանցի ազարիներին
Իրանցի թյուրքախոս ազարիները Հայոց ցեղասպանությունը չճանաչելու համար դատապարտել են Թուրքիայի կառավարությանը