Ձեր վստահելի աղբյուրը

Ամերիկյան «The New York Times» պարբերականը հրաժարվել է հրապարակել թուրքական կառույցի հայտարարությունը 1915թ-ի դեպքերի վերաբերյալ` դրանում Ցեղասպանություն եզրույթը չլինելու և Հայոց ցեղասպանության փաստը հերքվելու համար. հաղորդում է «Daily Sabah»-ը` հղում անելով կառույցի և պարբերականի գովազդի բաժնի պատասխանատուի նամակագրությանը:

Աղբյուրի փոխանցմամբ` թուրք-ամերիկյան հաշտեցման հանձնախումբը Վաշինգթոնում անցկացվելիք 1915 թվականի դեպքերին վերաբերող միջոցառման հայտարարություն է ուղարկել «The New York Times» խմբագրություն, սակայն հայտարարությունը պարբերականի էջերում տեղ չի գտել:

Մասնավորապես` ամերիկյան պարբերականի խմբագրությունը պահանջել է թուրքական կառույցից, որպեսզի վերջիններս հանեն հայտարարության 5 պարբերություններից 3-ը, քանի որ այդ պարբերություններում 1915 թվականին տեղի ունեցած հայերի ջարդերը նկարագրված են եղել որպես ոչ թե Ցեղասպանություն, այլ քաղաքացիական պատերազմ, որին բացի հայերից զոհ են գնացել նաև Օսմանյան կայսրության այլ քաղաքացիներ:

«The New York Times»-ի գովազդային պատասխանատուն թուրքական կառույցին տեղեկացրել է, որ պարբերականի խմբագրությունը և հատկապես իրավաբանական վարչությունը ունի հստակ սահմանված քաղաքականություն, համաձայն որի, պարբերականի էջերում չեն կարող տեղ գտնել այնպիսի հրապարակումներ, որոնք հերքում կամ չեն ընդունում հաստատված պատմական իրողությունները և փաստերը, ինչպես օրինակ այս դեպքում Հայոց ցեղասպանությունը, իսկ առհասարակ, օրինակ Հոլոքոստը կամ Առևտրի համաշխարհային կազմակերպության շենքի պայթյունի դեպքը:

«The New York Times»-ի խմբագրությունը նաև իր անհամաձայնությունն է հայտնել թուրքական կառույցի հայտարարության կարգախոսի հետ, որը եղել է հետևյալ ձևակերպմամբ` «Միավորեք և ոչ թե բաժանեք մեզ»: