Ձեր վստահելի աղբյուրը

ԱՄՆ-ում ոստիկանությունը ձերբակալել է մի ադրբեջանցու, որը վեճի էր բռնվել հայերի հետ Վաշինգտոնում Օսմանյան կայսրությունում Հայոց ցեղասպանության հիշատակման արարողության ժամանակ: Միջադեպն արձանագրվել է Թուրքիայի դեսպանատանը կից, որտեղ հայերի խումբն արգելակել է մեքենան, որի մեջ Ադրբեջանի քաղաքացի էր՝ թուրքական դրոշով: Դեպքի վայր ժամանած անվտանգության աշխատակիցները ձերբակալել են ադրբեջանցուն: Այս մասին հաղորդում է 1news.az ադրբեջանական կայքը:

Իր հերթին, KTLA 5 հեռուստաալիքը հաղորդում է, որ ապրիլի 24-ին Նյու Յորքում Թուրքիայի հյուպատոսարանի մոտ «Հանուն արդարության» բողոքի ակցիա է անցկացվել՝ ի հիշատակ Հայոց ցեղասպանության 100-րդ տարելիցի: Թուրք ցուցարարներին խնդրել են ցույցի տարածքից հեռանալ, սակայն թուրք ակտիվիստը հարձակվել է հայ ցուցարարի վրա, մարմնական վնաս հասցրել, ապա ոստիկանությունը ձերբակալել է նրան:

Բացի այդ, Լոս Անջելեսի ոստիկանությունը հեռացրել է 13-30 թուրք ցուցարարների, որոնք կանգնել են շուրջ 130 հազար հայ ցուցարարների ճանապարհին, որոնք ուղղվում էին դեպի Թուրքիայի հյուպատոսարան: 6 կմ ձգվող քայլերթի մասնակիցները կոչ են արել ճանաչել Հայոց ցեղասպանությունը:

Նշենք, որ 2015 թվականի ապրիլի 24-ին նշվում է 1915 թվականին Օսմանյան կայսրությունում Հայոց ցեղասպանության 100-րդ տարելիցը՝ 20-րդ դարի առաջին ցեղասպանությունը: Անմեղ զոհերի հիշատակը հարգելու նպատակով Հայաստան էին ժամանել արտասահմանյան ավելի քան 60 բարձրաստիճան պատվիրակություններ:

Հայտնի է, որ 1915 թվականին Օսմանյան կայսրությունում իրականացված Հայոց ցեղասպանության փաստը ճանաչել և դատապարտել են շատ պետություններ: Առաջինը եղել է Ուրուգվայը` 1965 թվականին, որի օրինակին հետևել են Կիպրոսի Հանրապետությունը (1982թ.), Արգենտինան (1993թ.), Ռուսաստանի Դաշնությունը (1995թ.), Կանադան (1996թ.), Հունաստանը (1996թ.), Լիբանանը (1997թ.), Բելգիան (1998թ.), Իտալիան (2000թ.), Վատիկան (2000թ.), Ֆրանսիան (2001թ.), Շվեյցարիան (2003թ.), Սլովակիան (2004թ.), Հոլանդիան (2004թ.), Լեհաստան (2005թ.), Գերմանիան (2005թ.), Վենեսուելան (2005թ.), Լիտվիան (2005թ.), Չիլին (2007թ.), Շվեդիան (2010թ.), Բոլիվիա (2014), Ավստրիա (2015), Չեխիա (2015): Հայոց Ցեղասպանությունը ճանաչել են նաև Վատիկանը, Եվրախորհուրդը և Եկեղեցիների համաշխարհային խորհուրդը: ԱՄՆ 50 նահանգներից գերակշիռ մասն ապրիլի 24-ը ճանաչել է Հայոց ցեղասպանության զոհերի հիշատակի օր: Եվրոպական մի քանի երկրների խորհրդարանների կողմից ընդունվել են քրեական պատասխանատվության ենթարկող օրենքներ Հայոց ցեղասպանությունը ժխտելու համար: Սակայն, Թուրքիան, ինչպես նախկինում, շարունակում է ժխտել Առաջին համաշխարհային պատերազմի տարիներին Օսմանյան կայսրությունում հայերի զանգվածային բնաջնջումը (Առաջին համաշխարհային պատերազմի տարիներին Օսմանյան կայսրությունում բնակվում էին երկու միլիոն հայեր, որոնցից շուրջ 1,5 միլիոն հայեր 1915-1923 թվականներին բնաջնջվեցին, իսկ մնացած կես միլիոն հայերը սփռվեցին ամբողջ աշխարհով մեկ):