Ձեր վստահելի աղբյուրը

«Լեզուն ոչ միայն հաղորդակցման միջոց է, այլև այն ինքնությունն է, անկախությունն է, բնավորությունն է, ազգային հպարտությունն ու արժանապատվությունն է: Այսօր ԱԺ հայտարարությունների ժամին ասաց ՀԱԿ խմբակցության քարտուղար Արամ Մանուկյանը՝ ընդգծելով, որ Հայաստանում պետական կառույցները, պաշտոնյաներն ու հեռուստաընկերություններն անընդհատ ոտնահարում են մայրենի լեզուն:

«Ոչ միայն լավանում, այլ տարբեր պետական ձեռնարկություններում վատանում է հայերենի վիճակը, գնալով այս գործընթացը ավելի վատ ձևեր է ընդունում»,- ասաց պատգամավորը՝ հավելելով, որ ավելի շատ այս խնդիրը վերաբերում է պաշտոնյաներին, որոնք խորհրդարանում միմյանց դիմում են հայրանունով, ինչը սխալ է:

«Քանի անգամ եմ ասել՝ «իչ»-ով մի՛ դիմեք խորհրդարանում, ես չգիտեմ, թե այդ ավանդույթը որտեղից եկավ այստեղ: Հայի ազգանունը ունի այնքան լավ ինֆորմացիա իր մեջ, դա ազգն է, տոհմն է, ընտանիքն է, իր ծագումնաբանությունն է; Այս հրաշք ազգանունը թողած ինչի՞ եք «իչ»-ով դիմում, դուք դրանով վիրավորում եք տվյալ մարդուն, ում դիմում եք «իչ»-ով»,-ասաց Ա.Մանուկյանը:

ՀԱԿ պատգամավորի խոսքով եթերային լեզուն ոչ միայն գրական չէ, այլև սխալները շատ են:

«Բաց լուսամուտներ նայեք, սերիալներ նայեք: Այդ աղբը երբ նայում ես, ֆիզիկական ցավ ես զգում: Մենք պետք է պայքարենք, ուրիշը չի պայքարելու: «Что, где, когда» եք խաղում, լավ եք անում, ինչո՞ւ եք այլազգի հաղորդումը եթեր տալիս, կրթության և գիտության նախարարն ի՞նչ իրավունք ունի եթերում խոսելու ռուսերեն, երբ օրենք կա՝ Հայաստանում հեռուստատեսության լեզուն հայերենն է»,- նշեց Արամ Մանուկյանը: