Ձեր վստահելի աղբյուրը

Այսօր ՀՀ սփյուռքի նախարարության նախաձեռնությամբ և Հայաստանի գրողների միության, Գրականության և արվեստի թանգարանի աջակցությամբ Գրողների միության դահլիճում կայացել է  իրանահայ գրող, հրապարակախոս, թարգմանիչ Խաչիկ Խաչերի կողմից կազմված և թարգմանված «Թռիչք Կռունկի հետ» 65 ժամանակակից հայ գրողների բանաստեղծությունների պարսկերեն անթոլոգիայի շնորհանդեսը: Այս մասին տեղեկացնում են սփյուռքի նախարարության մամուլի ծառայությունից:

Ողջույնի խոսքով հանդես են եկել ՀՀ սփյուռքի նախարար Հրանուշ Հակոբյանը: Նա մասնավորապես նշել է. «Խաչիկ Խաչերի անթոլոգիայի տպագրությունը կարևոր ձեռքբերում է հատկապես Հայոց Ցեղասպանության 100-րդ տարելիցին նվիրված միջոցառումների շրջանակներում: Իրանում մենք ունենք հայ գրողների մի ամբողջ աստղաբույլ, և նրանք բոլորն էլ ցանկանում են իրենց գրքերի շնորհանդեսները Հայրենիքում կազմակերպել: Նրանցից է Խաչիկ Խաչերը»:

«Խաչիկ Խաչերի թարգմանական այս աշխատանքը հայ ժողովրդի կենսունակության մի նոր ապացույց է եւ մշակութային կամուրջ Իրանի և Հայաստանի բարեկամական կապերը զարգացնելու ուղղությամբ»,- ընդգծել է գերատեսչության ղեկավարը:

Հեղինակի և նրան աջակից խմբագրական խազմի կողմից ընտրված և թարգմանված 65 ժամանակակից բանաստեղծներից 34-ը Հայաստանից են, 4-ը՝ Արցախից, իսկ մնացյալը՝ Լիբանանից, Սիրիայից, ԱՄՆ-ից Վրաստանից և այլ երկրներից:

Շնորհակալություն հայտնելով ՀՀ սփյուռքի նախարարությանը սփյուռքահայ գրողների ստեղծագործությունները տպագրելու և Հայրենիքում ճանաչելի դարձնելու գործում ներդրվող մշտական ջանքերի համար՝ Հայաստանի գրողների միության նախագահ Էդվարդ Միլիտոնյանը նշել է, որ Խաչիկ Խաչերի գիրքը հնարավորություն կտա պարսկական հասարակությանը՝ պատկերացում կազմելու ժամանակակից հայ գրականության մասին:

Եղիշե Չարենցի անվան գրականության և արվեստի թանգարանի տնօրեն Կարո Վարդանյանը նշել է, որ առաջիկայում Իրանում կայանալիք գրքի փառատոնի հայկական տաղավարում ներկայացված կլինի նաև Խաչիկ Խաչերի «Թռիչք Կռունկի հետ» անթոլոգիան:

Խաչիկ Խաչերի աշխատանքի մասին գնահատանքի խոսքով հանդես են եկել գրողներ և գրականագետներ Անդրանիկ Մանուկյանը, Արևշատ Ավագյանը, Հասմիկ Հակոբյանը, Կարինե Աշուղյանը և այլք: Իսկ բանաստեղծուհի Մետաքսեի դուստրը՝ Լիլիթը, Խաչիկ Խաչերին նվիրել է բանաստեղծուհու ընտրանին:

Այնուհետև շնորհակալական խոսքով հանդես է ելել հեղինակը՝ Խաչիկ Խաչերը՝ նշելով, որ ՀՀ սփյուռքի նախարարության մշտական հոգածության արդյունքում այսօր իրանահայ բանաստեղծները առավել լայնորեն են ներկայացված հայ հասարակությանը:

Հեղինակը շեշտել է, որ շարունակելու է հայ ժամանակակից հեղինակների ստեղծագործությունները թարգմանելու և պարսկախոս, գերմանախոս, անգլախոս հասարակությանը ներկայացնելու առաքելությունը: