«Վերապրած մշակույթ». «Զարմանում ես՝ տեսնելով այդ ձեռագրերի մեծությունը, ծանրությունը ու թե ինչպես են կարողացել փրկել դրանք»

Հարցազրույցներ 12:21 28/04/2015

Հարյուր տարի առաջ Արևմտյան Հայաստանում բնակվող ոչ միայն հայ ժողովրդի համար սկսվեցին դժնդակ ժամանակներ, այլ նաև հայկական մշակութային ժառանգության համար էր կործանարար տարիներ: Թուրքերը ոչնչացրեցին հայկական մշակութային ժառանգության մի հսկայական մաս:

Ձեռագիր մատյաններն էլ նույն ճակատագրին արժանացան, սակայն շատ հայեր իրենց երեխաներին, կահ-կարասին փրկելուն զուգահեռ փրկեցին հազարավոր ձեռագրեր:

«Մեր բաժնում ձեռագրերից գրեթե ամեն երկրորդն անցել են Եղեռնի ճանապարհով, ապրել են նույն տառապանքները, ինչ որ մարդիկ են ապրել: Հիմա մենք վերականգնում ենք մեծադիր ձեռագրեր: Զարմանում ես՝ տեսնելով այդ ձեռագրերի մեծությունը, ծանրությունը ու թե ինչպես են մարդիկ իրենց երեխաներին, կահ-կարասին փրկելով, փրկել նաև ձեռագրերը, իրենց հետ տարել այդքան ճանապարհ»,-Մատենադրանում լրագրողների հետ զրույցում ասաց Մատենադարանի վերականգման բաժնի վարիչ Գայանե Էլիազյանը:

Նա հայտնեց, որ վերջին քսան տարվա ընթացքում նորոգել են Եղեռնը վերապրած 200-300 ձեռագիր: Ըստ նրա, նման ձեռագրերը շատ-շատ են, գտնվում են ոչ միայն Մատենադարանում, այլ նաև աշխարհի տարբեր երկրներում, որտեղ հայտնվել են հայերը Հայոց ցեղասպանությունից հետո՝ Երուսաղեմում, Սիրիայում, Անթիլիասում, Սուրբ Ղազարում, Վիենայում, Բեռնինի, Լոնդոնի ազգային գրադարաններում և այլուր:

Գայանե Էլիազյանն ասաց, որ իրենց բաժինը տարբեր տարիներին եղել են այն վայրերում, որտեղ պահվում են վերապրած հայկական ձեռնագրերը, կոնսերվացրել դրանք:

Նշենք, որ Մատենադարանում ընթանում է «Վերապրած մշակույթ» խորագրով Հայոց Ցեղասպանության 100-րդ տարելիցին նվիրված գիտաժողովը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: