Ձեր վստահելի աղբյուրը

ԱԺ նախագահ Գալուստ Սահակյանն այսօր ընդունել է «Բոլոնյան համակարգի ապագան» խորագրով սեմինարի և Եվրոպական ուսանողական միության կառավարման խորհրդի 68-րդ համաժողովի մասնակիցներին:

ԱԺ հասարակայնության հետ կապերի վարչության հաղորդմամբ, ԱԺ նախագահը կարևորել է երիտասարդների դերն ու մասնակցությունը աշխարհում տեղի ունեցող տարբեր գործընթացներում: Գալուստ Սահակյանը գոհունակություն է հայտնել այն փաստի կապակցությամբ, որ Հայաստանում հյուրընկալված երիտասարդները մասնակցում են այս օրերի տոնական միջոցառումներին:

Անդրադառնալով Հայոց ցեղասպանության 100-րդ տարելիցին՝ Գալուստ Սահակյանը երիտասարդներին տեղեկացրել է, որ այդ օրերին անցկացվել է գլոբալ ֆորում՝ «Ընդդեմ ցեղասպանություն հանցագործության» և այդ համատեքստում ՀՀ Ազգային ժողովն առաջիկայում կոչով դիմելու է բոլոր խորհրդարաններին՝ կազմելու հանձնախմբեր՝ ընդդեմ ցեղասպանությունների դեմ պայքարի:

ԱԺ նախագահը նշել է, որ անցած 100 տարվա ընթացքում Հայաստանը կարողացել է միջազգային հանրությանը ներկայացնել ցեղասպանությունների վտանգավորությունը՝ շեշտելով, որ այսօր էլ աշխարհում նկատվում են ցեղասպանության և ահաբեկչության միտումներ:

ԱԺ նախագահի խոսքով՝ ցանկացած քաղաքականություն պետք է հետևանք լինի քաղաքակրթության: Գալուստ Սահակյանի կարծիքով՝ երիտասարդները պետք է համախմբեն իրենց ջանքերը՝ 21-րդ դարում նպաստելու խաղաղությանը, պետությունների բարգավաճմանը և զարգացմանը:

Հանդիպման ընթացքում ԱԺ նախագահը պատասխանել է երիտասարդների հարցերին, որոնք հիմնականում վերաբերել են Բոլոնյան գործընթացի նոր մարտահրավերներին, բարձրագույն կրթության առավել հրատապ և կարևոր խնդիրներին, Հայաստանի խորհրդարանի մասնակցությանը կրթական ծրագրերին, Հայաստանի գիտական և կրթական ներուժին և այլն: