Ձեր վստահելի աղբյուրը

Վիշեգրադյան հիմնադրամի կողմից իրականացված և առաջիկայում նախատեսված բուհական մագիստրոսական և դոկտորական կրթաթոշակային նախագծերը միտված են անդամ և համագործակցող երկրների միջբուհական կապերի զարգացմանը: Այս մասին, ըստ  ԿԳՆ մամուլի ծառայության, ասել է աշխատանքային այցով Հայաստանում գտնվող Վիշեգրադյան միջազգային հիմնադրամի գործադիր տնօրեն Կարլա Վյուրստերովան՝ ՀՀ կրթության և գիտության նախարար Արմեն Աշոտյանի հետ հանդիպման ժամանակ:

Նախարար Ա. Աշոտյանը շեշտելով, որ Հայաստանի բուհերը ուսանողական շարժունության և միջազգային փոխանակման ծրագրերի ասպարեզում վերջին տարիներին մեծ փորձ են կուտակել, վստահություն է հայտնել, որ համագործակցությունը Վիշեգրադյան քառյակի անդամ երկների (Լեհաստան, Չեխիա, Սլովակիա և Հունգարիա) բուհերի հետ արդյունավետ կլինի: Օգտագործելով առիթը՝ նախարարը նաև տեղեկացրել է, որ այս շաբաթ Երևանում տեղի է ունենալու Եվրոպական բարձրագույն կրթական տարածքի նախարարական գագաթաժողովն ու Բոլոնիայի գործընթացի 4-րդ քաղաքական ֆորումը, որին ներկա են գտնվելու տարբեր երկրներում կրթության ոլորտի պատասխանա ուներ և պատվիրակություններ:

Կ.Վյուրստերովան, տեղեկացնելով, որ հանդիպումներ է ունեցել Հայաստանի բարձրագույն կրթական հաստատությունների ղեկավարների հետ՝ նշել է, որ ՀՀ բուհերը բավական ակտիվ մասնակցության հայտեր են ներկայացրել, որոնցից մասնավորապես ԵՊՀ առաջարկությունները դրական երաշխավորություններ են ստացել: Հիմնադրամի տնօրենը նաև տեղեկացրել է, որ Վիշեգրադյան կրթական ծրագրում մեծ է հետաքրքրությունը հատկապես հասարակական-քաղաքական և գյուղատնտեսական մասնագիտությունենրի նկատմամբ: