Ձեր վստահելի աղբյուրը

Այս տարի փետրվարին կառավարության որոշմամբ ստեղծված Կոռուպցիայի դեմ պայքարի խորհուրդը ձևավորման ճանապարհին է: Մայիսի 13-ին խորհրդում հասարակական կազմակերպությունների մրցույթի դիմումների ընդունման վերջնաժամկետն է լրանում: Իսկ խորհրդի կազմում խորհրդարանական խմբակցությունների ներկայացուցիչներ ընդգրկելու համար կառավարության աշխատակազմը դիմել է խորհրդարանին:

Նկատենք, որ առայժմ որևէ Հասարակական կազմակերպություն չի դիմել մրցույթին մասնակցելու համար, իսկ խորհրդարանական խմբակցություններից Խորհրդի աշխատանքներին մասնակցելու պատրաստակամություն հայտնել է առայժմ «Բարգավաճ Հայաստան» խմբակցությունը` պայմանով, եթե դրա աշխատանքները ձևական չլինեն:

Կառավարությունում սպասում են, որ երբ այս տեխնիկական գործընթացներն ավարտվեն մայիսի վերջին կոռուպցիայի դեմ պայքարի խորհուրդը կսկսի աշխատել:

«Առաջին նիստը խորհուրդը կգումարի մայիսի վերջին: Խորհրդի հանդիպումները կլինեն պարբերական: Եվ հենց առաջին նիստում խորհուրդը կքննարկի 2015-18 թվականների հակակոռուպցիոն ռազմավարությունը»,-ծրագրերը կազմել ու Panorama.am-ի թղթակցի հետ զրույցում ներկայացնում է Արդարադատության նախարարի տեղական Սուրեն Քրմոյանը:

Փոխնախարարի խոսքով, այդուհանդերձ, Խորհրդի որոշման մեջ համապատասխան մեխանիզմ կա ամրագրված, որ եթե մրցույթը ինչ-ինչ պատճառներով չկայանա և որևէ խմբակցություն չցանկանա մասնակցել, ապա այդ պարագայում Խորհուրդն իր աշխատանքները կսկսի, բայց միևնույնն է` կշարունակի ջանքեր գործադրել խորհուրդը համալրելու համար:

Հայաստանում կոռուպցիայի դեմ պայքարի Խորհուրդը ղեկավարելու է վարչապետ Հովիկ Աբրահամյանը, ներգրավված են լինելու կռավարության աշխատակազմի ղեկավար-նախարարը, ֆինանսների նախարարը, արդարադատության նախարարը և գլխավոր դատախազն ու Բարձրաստիճան պաշտոնատար անձանց էթիկայի հանձնաժողովի նախագահը: Եթե մրցույթին մասնակցեն ու անցնեն կլինեն նաև հասարակական կազմակերպության, Համայնքների միության ներկայացուցիչ ու Հանրային խորհրդի ներկայացուցիչը: Քրմոյանը հույս ունի, որ Խորհուրդը ակտիվորեն կաշխատի ու կհամագործակցի տարբեր կազմակերպությունների հետ, կձևավորվեն առաջարկություններ, որոնք վարչապետի հանձնարարությամբ օրենքներ ու կառավարության որոշումներ կդառնան:

Հասարակական կազմակերպությունները սկզբունքորեն չեն մասնակցում Խորհրդի կազմում ընգրկվելու համար հայտարարված մրցույթին, քանի որ նրանց թիվը քիչ է լինելու այնտեղ և իրենց ձայնը լսելի չի լինի:

«Բայց կառավարության դիրքորոշումն այն է, որ ՀԿ-ների ձայնը լսելի կլինի, այսինքն` երկու ՀԿ-ներ կարող են նաև ներկայացնել, օրինակ` Հայաստանում գործող հակակոռուպցիոն կոալիցիային ու դրա տեսակետը, դիրքորոշումներն ու բարձրացված հարցերը ներկայացնել խորհրդում: Ի վերջո խնդիր դրված չէ, որ որևէ սուբյեկտ այնտեղ թե պետական, թե հասարակական կազմակերպություն վճռորոշ դեր ունենա, որովհետև ի վերջո հակակոռուպցիոն ծրագրերի քաղաքական պատասխանատովությունը կառավարությունն է կրում և կառավարությունն է իրականացնում այդ ծրագրերը: Բայց մենք ցանկություն ունենք,որ պարտադիր հասարակության ձայնը լսելի լինի, հաշվի առնել նրանց կարծիքը, որպեսզի հակակոռուպցիոն ռազմավարությունը արդյունավետ լինի»,-ասաց Քրմոյանը` նշելով, որ փորձել են Հակակոռուպցիոն ծրագրերի 2015-18 թթ ռազմավարության մեջ ընդգրկել ՀԿ-ների կարծիքների գերակշիռ մասը:

Քրմոյանը վստահ է` ընտրվել է կոռուպցիայի դեմ պայքարի «ապակենտրոնացված մոդել»:

«Այսինքն ոչ թե մեկ մարմին է ստեղծվելու, որը և՛ պայքարելու է, և՛ քննչական գործողություններ իրականացնելու, այլ խորհուրդը, որպես կոռուպցիայի դեմ պայքարի քաղաքականությունը մշակող և աջակցող է լինելու: Սա այն հարթակն է, որտեղ շահագրգիռ մարմինները պետք է իրենց կարծիքը ներկայացնեն: Բայց այդուհանդերձ, կոռուպցիայի դեմ պայքարի միջազգային ստանդարտներով ամրագրված գործառույթներ են վերագրված խորհրդին: Վերջինը աջակցում է ռազմավարության մշակմանը, հաստատելու է հակակոռուպցիոն ռազմավարությունը և մշտադիտարկման է ենթարկելու ծրագրերի իրականացումը նաև առաջարկություններ է ներկայացնելու պատկան մարմիններին փոխել օրենքները և այլն: Դա այն հարթակն է, որտեղ պետք է հակակոռուպցիոն ծրագրերը քննարկվեն»,-թվարկեց Քրմոյանը:

Կառավարության ներկայացուցիչը մտահոգիչ է համարում խորհրդի ու դրա կողմից իրականացվելիք ծրագրերի նկատմամբ հասարակության հավատի բացակայությունը:

«Մեզ համար ամենամտահոգիչը մարդկանց հավատն է հակակոռուպցիոն ծրագրերի նկատմամբ: Առանց մարդկանց հավատի, առանց յուրաքանչյուր անհատի մասնակցության, մենք հաջողության չենք կարող հասնել», -նշեց պաշտոնյան:

Ասաց, որ պատրաստ են ընդունել կառուցողական բնույթի ցանկացած քննադատություն և համապատասխան քայլեր ձեռնարկել. «Բազմաթիվ քայլեր ենք արել, որոնց արդյունքները առայժմ նկատելի ու գոհացուցիչ չեն: Ճիշտ է միջազգային կազմակերպությունները արձանագրում են, որ Հայաստանում կոռուպցիայի դեմ պայքարում առաջընթաց կա, սակայն միևնույնն է, մեզ համար գոհացուցիչ չեն արդյունքները, քանի որ քաղաքացին չի զգում տեսնում դա: Մեր խնդիրը քաղաքացու հավատն է. հաճախ քաղաքացին նախընտրում է վճարել 5000 դրամ ու ստանալ ասենք տեղեկանք: Բայց նա չի մտածում, որ դա ու տարբեր տեսակի «մաղարիչները» խնդիր են»:

Խորհրդարանում ներկայացված քաղաքական ուժերից «Ժառանգություն»-ը ներկայացրել էր առաջարկություններ, որոնք ընդունելու դեպքում իրենք համաձայն էին ընդգրկվել Խորհրդի կազմում, իսկ Հայ Ազգային կոնգրես, Դաշնակցություն և «Օրինաց երկիր» խմբակցությունները հրաժարվել են մասնակցություն ցուցաբերել Խորհրդի աշխատանքներին:

«Եթե որևէ մեկը ասում է` չէ, ավելի լավ է մենք կողքից նայենք ու քննադատենք, մեզ համար դա ընդունելի չէ: Մեզ համար ընդունելի է նստել կլոր սեղանի շուրջ, փորձենք քննարկել ու կոնկրետ լուծումներ տալ», -եզրափակեց արդարադատության նախարարի տեղակալը: