Ձեր վստահելի աղբյուրը

Հայաստանը տուրիստական առումով մեծ պոտենցիալ, ներուժ ունի, սակայն այդ պոտենցիալն օգտագործվում է շատ չնչին չափով: Այս մասին այսօր լրագրողների հետ հանդիպման ժամանակ ասաց սոցիոլոգ Ահարոն Ադիբեկյանը՝ անդրադառնալով տուրիզմի խնդիրներին:

Նրա խոսքերով՝ Հայաստանի մասին դրսում չգիտեն, իսկ իմացությունն էլ սահմանափակվում է հիմնականում վանքերով. «Որպեսզի մենք ներկայացնենք մեր ինտելեկտուալ հսկայական ներուժը՝ պետք է լուրջ քայլեր արվեն: Մենք չգիտենք օտարերկրյա տուրիստին ինչն է դուր գալիս Հայաստանում, ինչը՝ ոչ»:

Ուստի, ըստ Ա.Ադիբեկյանի, պետք է պետության աջակցությունը, հատկապես, որ տուրիզմը մեր տնտեսության համար գերակա ճյուղ է համարվում. «Օրինակ՝ Կալիֆորնիայի բյուջեի 60 տոկոսը կազմվում է տուրիզմի հաշվին, Ֆրանսիան, Իտալիան, Հունաստանը, Իսպանիան տարեկան մեծ թվով տուրիստներ են ընդունում, որոնցից յուրաքանչյուրը ծախսում է ամենաքիչը 1000 դոլար: Դուք արդեն պատկերացրեք, թե քանի միլիարդի մասին է խոսք գնում»:

Ըստ Ա.Ադիբեկյանի՝ 2014թ-ին նախատեսվում էր, որ Հայաստան կայցելի 1 մլն զբոսաշրջիկ, սակայն Հայաստան է այցելել նախատեսվածից 20 տոկոսով ավելի զբոսաշրջիկ. «2014թ-ին Հայաստան է այցելել 1,2 մլն մարդ, սակայն դեռ հարց է՝ նրանք տուրիստ են, թե՞ ոչ: Մեր հայրենակիցները, որոնք ամառը գալիս են Հայաստան իրենց ազգականներին տեսնելու, ապրում են նրանց տանը ու համարվում են տուրիստ, բայց նրանց տուրիստ համարելն այդքան էլ ճիշտ չէ»:

Նրա խոսքերով՝ իրականում մեր հյուրանոցները չեն կարող տարեկան 100 հազար զբոսաշրջիկի ընդունել, քանի որ այդքան ռեսուրս չունեն. «Այսինքն՝ մենք չգիտենք, թե իրականում քանի տուրիստ է Հայաստան այցելում: Մեր խնդիրն այն է, որ լինի իրական տուրիզմ, այլ ոչ թե բարեկամական այցեր: Բացի այդ, տուրիզմը պետք է ունենա տեսնելու, համտեսելու, զգալու, լսելու համակարգ: Այսինքն ՝ տուրիզմը զարգացնելու համար պետք է նաև մեր օպերան, թատրոնները պրոպագանդել»:

Ա.Ադիբեկյանն ասաց նաև, որ Հայաստանը պետք է ունենա նորություններ, որ տուրիստներին ներկայացնի և հետաքրքրություն առաջացնի: Հետաքրքրություն առաջացնել պետք է ոչ միայն վանքերով, այլև հարմարավետ հյուրանոցներով, ռեստորանների ուտեստների տեսականիով, ու երկրում հանգիստը մատչելի լինելու հանգամաքով:

Բացի այդ, ըստ Ա.Ադիբեկյանի, տուրիզմը զարգացնելու համար պետությունը պետք է արտոնություններ տրամադրի ավիաընկերություններին, որպեսզի տոմսերը լինեն բավականին մատչելի, քանի որ տուրիստների զգալի մասը թոշակառուներ են: Նա նաև նշեց, որ հայաստանյան հյուրանոցները փոխզիջումների չեն գնում տուրիստների հետ, և սա ևս տուրիզմի զարգացման համար խթան չի հանդիսանում:

Ա.Ադիբեկյանը առաջարկում է տուրիստների համար հետաքրքիր խոհանոց ներակայացնել, մինչդեռ ռեստորաններն ու հյուրանոցները խորովածից, քյաբաբից ու խաշլամայից այլ բան չեն առաջարկում:

Տուրիստական ընկերության տնօրեն Մարինե Ավետիսյանն էլ նշեց, որ Վրաստանում էլ միայն խաչապուրի, խինկալի են առաջարկում, այնտեղ ինչ-որ յուրօրինակ բան չկա, որով առանձնանան, սակայն հայերը նախընտրում են իրենց հանգիստն անցկացնել Վրաստանում, քանի որ հանգիստն ավելի մատչելի է:

Թեմային առնչվող հրապարակում՝
Հայաստան ժամանած զբոսաշրջիկների թիվը նվազել է
«Սարսափելի բան չկա». Ապրեսյանը՝ զբոսաշրջիկների թվի նվազման մասին