Ձեր վստահելի աղբյուրը

Հատուկ քննչական ծառայությունը չի հրապարակում, թե «Բարգավաճ Հայաստան» կուսակցության անդամ Գոհար Ենոքյանին վերաբերող քրեական գործի շրջանակներում ինչ քննչական գործողություններ են կատարվել և արդյոք կատարվե՞լ են, թե՞ ոչ:

«Այս պահին ոչինչ ասել չեմ կարող նախաքննություն է ընթանում», -Panorama.am-ի հարցին ի պատասխան, ասաց ՀՔԾ մամլո խոսնակ Միքայել Ահարոնյանը:

Ինչ վերաբերում է տեղեկություններին, թե ՀՔԾ-ին չի հաջողվում կազմակերպել Գոհար Ենոքյանի և ԱԺ պատգամավոր Կարո Կարապետյանի (Յուվեցի Կարո) առերեսումը, ապա ՀՔԾ-ի ներկայացուցիչը ոչ հերքեց և ոչ էլ հաստատեց, ասելով. «Ոչինչ չեմ կարող ասել»:

Գոհար Ենոքյանը ձերբակալվել էր մայիսի 4-ին՝ 2014-ի հունիսի 10-ի ՀՀ ոստիկանության Քննչական գլխավոր վարչության հատուկ կարևորագույն գործերով քննության վարչությունում ՀՀ քրեական օրենսգրքի 35-104 հոդվածի 1-ին մասի հատկանիշներով (սպանության նախապատրաստություն) հարուցված քրեական գործի շրջանակներում: ՀՀ գլխավոր դատախազի որոշմամբ 2015 թվականի ապրիլի 3-ին քրեական գործն ուղարկվել էր ՀՀ հատուկ քննչական ծառայություն՝ նախաքննությունը շարունակելու նպատակով:

Ըստ պաշտոնական հաղորդագրության, քրեական գործի նախաքննության ընթացքում փաստական տվյալներ են ձեռք բերվել այն մասին, որ Գոհար Ենոքյանը Արայիկ Ենոքյանի հետ, շահադիտական դրդումներով, Խաժակ Բադալյանի միջոցով Կարո Կարապետյանից վերցրած գումարները հափշտակելու և չվերադարձնելու նպատակով, կատարել են ապօրինաբար Կարո Կարապետյանին դիտավորությամբ կյանքից զրկելու` սպանության նախապատրաստությանն ուղղված գործողություներ, սակայն Արայիկ Ենոքյանը 2012 թվականի մարտի 15-ին խարդախությամբ առանձնապես խոշոր չափի գումար հափշտակելու կասկածանքով ձերբակալվել է, և նրանց նախապատրաստած հանցագործությունն ավարտին չի հասցվել` իրենց կամքից անկախ հանգամանքներով: Կատարված հանցավոր արարքի համար մայիսի 7-ին այդ քրեական գործով որոշում էր կայացվել Գոհար Ենոքյանին ներգրավելու որպես մեղադրյալ ՀՀ քր. օր-ի 35-104-րդ հոդվածի 2-րդ մասի 7-րդ և 8-րդ կետերով:

Ենոքյանների պաշտպան ՀՀ Փաստաբանների պալատի անդամ Գեղամ Հակոբյանը ՀՔԾ քննիչից ստացել է ծանուցում այսօր Արայիկ Ենոքյանի հետ քննչական գործողություն իրականացնելու համար: Սակայն փաստաբանը մեկ ժամից ավելի մեկուսարանում սպասել է քննիչին, բայց նա չի ներկայացել:

«Գնացի մեկուսարան, սպասեցի մեկ ժամից ավելի, չեկավ, ես վերադարձա», -Panorama.am-ի թղթակցի հետ զրույցում փոխանցեց փաստաբանը:

Գոհար Ենոքյանի հետ քննչական գործողություն իրականացնելու մասին ծանուցում, Հակոբյանի խոսքով, իրենք չեն ստացել, հետևաբար Յուվեցի Կարոյի հետ առերեսում չէր կարող լինել:

Ինչ վերաբերում է այս գործով նախաքննությանը, ապա փաստաբանն ասաց, որ պաշտպանական կողմը քննության համար որևէ խոչընդոտ չի ստեղծում, իսկ քննությունն էլ տեղում դոփում է:

«Միանշանակ ապօրինի, հորինված գործ է, որևէ փաստ գոյություն չունի, ինչ առաջընթացի մասին կարող էր խոսք լինել», -փոխանցեց փաստաբանը: