Ձեր վստահելի աղբյուրը

Առաջին միջազգային «ԱՐվեսՏ Էքսպո 15»-ն մեկ հարկի տակ է հավաքելու աշխարհի մեկ տասնյակից ավելի երկրներ ներկայացնող 52 արվեստագետի մոտ 130 աշխատանք: Panorama.am-ի հետ զրույցում ասաց էքսպոյի կազմակերպիչ, գլխավոր համադրող Վակո Արմենո Խախամյանը:

Նշենք, որ էքսպոն բացվելու է մայիսի 19-ին Հայ Արտ մշակութային կենտրոնի պատկերասրահում։ Մասնագետ արվեստագետներն արտերկրից (Վրաստան, Իրան, Ճապոնիա, Բելառուս, Ղազախստան, Հոլանդիա, Շվեդիա, Պերու, ԱՄՆ, Միացյալ Թագավորություն) և Հայաստանից ցուցադրելու են իրենց գեղանկարները, գծանկարները, քանդակները, լուսանկարներն ու թվային վիդեո արվեստը:

«Շատերն են դիմել, մենք ընտրել են միայն պրոֆեսիոնալ արվեստագետների աշխատանքները: Արվեստագետների մի մասին մենք ենք հրավիրել, մի մասն էլ տեղեկանալով էքսպոյի մասին, իրենք են դիմել՝ մասնակցության համար»,- ասաց Վակո Արմենոն:

Ներկայացվելիք աշխատանքները, ըստ համադրողի, տարբեր ոճերի են, թեման էլ ազատ է եղել: Նա նշեց, որ ռեալիստական աշխատանքներ չկան, հիմնականում 20-րդ տարի տարբեր ուղղություններ ու դպրոցներ ներկայացնող արվեստագետների ստեղծագործություններ են: Օտարազգի արվեստագետներից ոմանք ներկա են լինելու էքսպոյի բացմանը:

«Ես երեք անգամ Եվրոպայում մասնակցել եմ նման ցուցահանդեսների: Որոշեցի Հայաստանում էլ կազմակերպել: Ինչո՞ւ ոչ: Իհարկե, բավական բարդ, դժվար աշխատանք է, բայց արդեն գրեթե պատրաստ ենք: Նպատակ ունենք այսպես նպաստել մշակույթի զարգացմանը, հայ և արտասահմանից արվեստագետների միջև կապի ամրապնդմանը, նաև հենց օտարազգի արվեստագետներին ծանոթացնել հայ արվեստի հետ»,- ասաց Վակո Արմենոն:

Նա նշեց, որ էքսպոն կանցկացվի ամեն տարի, հույս հայտնեց, որ առաջիկա տարիներին ավելի շատ մասնակիցներ կլինեն:

«Նպատակ ունեմ՝ էքսպոն ժամանակի ընթացքում վերածել բիենալեի: Երկու տարին մեկ կանցկացվի ու ավելի մեծ մասշտաբներով»,- ասաց 1-ին միջազգային «ԱՐվեսՏ Էքսպո 15»-ի կազմակերպիչը:

Վակո Արմենոյի կարծիքով, ցուցահանդեսը կհետաքրքրի արվեստասեր հայ հասարակությանը, քանի որ մեկ հարկի տակ ներկայացված են լինելու աշխարհի տարբեր երկրներ ներկայացնող հինգ տասնյակից ավելի արվեստագետների աշխատանքներ՝ տարբեր ոճեր, տարբեր մոտեցումներ, տարբեր թեմաներ, բայց նպատակը մեկը՝ ստեղծել արվեստի գեղեցիկ, մարդկանց գերող ստեղծագործություն: