Թուրքիայի պետական հեռուստաալիքն Իրանի Արևելյան Ատրպատականը ներկայացրել է որպես անկախ երկիր

Հասարակություն 14:19 14/05/2015

Թուրքիայի պետական հեռուստաալիքն Իրանի Արևելյան Ատրպատականը ներկայացրել է որպես անկախ երկիր

«Թուրքիայի պետական հեռուստաալիքն Իրանի Արևելյան Ատրպատական նահանգը ներկայացրել է որպես անկախ երկիր»,-այդ մասին նշված է իրանական «Վաթանխահան.քոմ» կայքում թողարկված հոդվածում:

Հոդվածի հեղինակը, ընդգծելով Թուրքիայի կողմից Իրանի պանթյուրքիստական, անջատողական գաղափարախոսություն ունեցող խմբավորումներին աջակցելու փաստը, գրում է. «Թուրքիայի պետական «TRT» հեռուստաալիքն Իրանի Արևելյան Ատրպատական նահանգի «Տրակտորսազի» և Թեհրանի «Էսթեղլալ» ֆուտբոլային թիմերի խաղը լուսաբանելիս Ատրպատական նահանգը ներկայացրել է որպես անկախ երկիր` Իրանից անջատ»:

«Թավրիզի «Տրակտորսազի» ֆուտբոլային թիմպանթյուրքիստ երկրպագուները նույնիսկ հաջողացրել են խաղի ժամանակ մարզադաշտի տրիբունաներում պարզել Թուրքիայի դրոշը, և սա այն դեպքում, երբ անվտանգության աշխատակիցներն արգելում են «Տրակտորսազիի» երկրպագուներին խաղին ներկայանալ Իրանի դրոշներով»,-իր զարմանքն է արտահայտում իրանական կայքի մեկնաբանը:

Հիշեցնենք, որ «Վաթանխահան.քոմ» կայքը, օրերս անդրադառնալով` Թուրքիայի կողմից Իրանի պանթյուրքիստական գաղափարախոսություն ունեցող խմբերին տրամադրվող աջակցությանը, մտահոգություն էր հայտնել, որ Թուրքիայի նպատակն Իրանի թյուրքալեզու ազարիներով բնակեցված քաղաքների հետ սերտ հարաբերություններ հաստատելն ու այդ տարածքներում թուրքական մշակույթը տարածելն է:

Ըստ իրանական աղբյուրի` Թուրքիայի ցանկությունն Ատրպատական նահանգը տնտեսական գաղութ դարձնելն է:

Թեմայի առնչությամբ նախորդ հրապարակումները`
«Ջորջ Թաուն»-ի դասախոս. Ինչո՞ւ է Թուրքիան ներդրումներ անում միայն Իրանի թյուրքալեզու նահանգներում
Իրանական կայք. Իրանը չպետք է թույլ տա, որ Ատրպատականը դառնա Թուրքիայի տնտեսական գաղութը

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: