Ձեր վստահելի աղբյուրը

«Այս երկու օրերը չափազանց կարևոր են: Բարձրագույն կրթությունը կարևորագույն արժեք է ժողովրդավարական պետության համար»,-Երևանի Կարեն Դեմիճյանի անվան Մարզահամերգային համալիրում մեկնարկած Եվրոպական բարձրագույն կրթական տարածքի նախարարական գագաթնաժողովի և Բոլոնիայի քաղաքականության 4-րդ համաժողովի ժամանակ ասաց Եվրոպական միության կրթության, մշակույթի, երիտասարդության և սպորտի հարցերով հանձնակատար Տիբոր Նավրաչիչը:

«Բոլոնիայի հռչակագրի ստորագրումից հետո շատ բան է փոխվել: Խոսքի ազատությունը և ակադեմիական միտքը հարձակման են ենթարկվել Եվրոպայում, դրա համար էլ պետք է միասին աշխատել: Հակամարտությունը բազմաթիվ վտանգներ է բերում, դրանցից մեկը մտքերի, գիտելիքի, փորձի փոխանակումը փակուղի մտցնելն է»,-նշեց հանձնակատարը:

Նրա դիտարկմամբ՝ ուսանողների նոր սերունդը նորամուծություններ է սիրում, ինչի համար էլ անհրաժեշտ է որակյալ բարձրագույն կրթություն ստանալու հնարավորություն տալ նրանց:

Տ. Նավրաչիչի խոսքով՝ երկրները նույն ուղղությամբ, բայց տարբեր արագությամբ են առաջ շարժվում. «Որոշ երկրներում, օրինակ, եվրոպական դիպլոմները չեն ընդունվում, ինչը սահմանափակում է ուսանողների շարժունակությունը»:

Նշենք, որ այսօր ավելի վաղ կրթության և գիտության նախարար Արմեն Աշոտյանը հանդիպում է ունեցել ԵՄ կրթության, մշակույթի, երիտասարդության և սպորտի հարցերով հանձնակատար Տիբոր Նավրաչիչի հետ:

Նախարարը շնորհակալություն է հայտնել Եվրոպական միությանը և անձամբ հանձնակատարին աջակցության համար` գագաթաժողովի կազմակերպչական, ֆինանսական և մե թոդաբանական օգնության հարցերում: Արմեն Աշոտյանը, խոսելով Բոլոնյան գործընթացի մասին ընդհանրապես և երևանյան գագաթաժողովի մասին մասնավորապես, բարձր է գնահատել կրթության և գիտության ոլորտում ընթացող ինտեգրացիոն գործընթացի ներկա զարգացումները:

Նախարարի խոսքով` հակամարտող երկրների համար կրթությունը կարող է դառնալ շատ կարևոր գործիք` տարածաշրջանային հակամարտությունների կարգավորման գործընթացներում: Արմեն Աշոտյանն ընդգծել է, որ հայ ուսանողների համար փակ սահմանների պայմաններում կրթությունը դառնում է ոչ մատչելի` այս համատեսքստում կարևորելով կրթության միջազգայնացման խնդիրը:

Հանձնակատարն իր հերթին նշել է, որ անհրաժեշտ է արդիականացնել եվրոպական բարձրագույն կրթության տարածքը` ընդգծելով ուսանողների շարժունության և փոխանակման ծրագրերը: Նա հույս է հայտնել, որ Երևանյան գագաթաժողովը կունենա վճռորոշ և պատմական նշանակություն` եվրոպական կրթական միասնական տարածքի ընդլայնման համար, նոր շունչ կհաղորդի ողջ տարածքում իրականացվող կրթական բարեփոխումերին: Հանձնակատարը նաև կարևորել է հարևանության գործընթացը` որպես կրթամշակութային կամուրջ հարևան երկրների միջև:

Նախարարն անդրադարձել է Tempus և Erasmus + ծրագրերին և դրանցում ՀՀ բուհերի ներգրավման խնդիրներին, շեշտել երկկողմ հորիզոնական կապերի խորացման անհրաժեշտությունը:

Հանդիպման ավարտին կողմերը կարևորել են Երևանի կոմյունիկե և Բոլոնիայի 4-րդ քաղաքական ֆորումի հայտարարագրի ընդունումը և դրանց հետագա նշանակությունը:

Հիշեցնենք, որ 2012թ.-ին Բուխարեստում կայացած նախարարական գագաթաժողովում Հայաստանը միաձայն ընտրվել է հաջորդ՝ 2015թ. նախարարական գագաթաժողովը հյուընկալող և քարտուղարության պարտականությունները ստանձնող երկիր: Մայիսի 14-15-ին կայանալիք 9-րդ գագաթաժողովին և Բոլոնիայի քաղաքականության 4-րդ ֆորումին մասնակցելու համար հրավիրվել են ավելի քան 140 երկրներ ու կազմակերպություններ: Բոլոնիայի քարտուղարության ղեկավարությունը Երևանից հետո ստանձնելու է Ֆրանսիան:

Նախորդող հրապարակումներ՝
Երևանում անցկացվում է Եվրոպական բարձրագույն կրթական տարածքի նախարարական գագաթաժողովը (Ուղիղ միացում)
Սերժ Սարգսյան. Բուհական համակարգում մենք ունենք առաջընթաց արձանագրող միտումներ
Երևանյան համաժողովը կլինի պատմական. Ա. Աշոտյան
Կրթությունը քաղաքակիրթ հասարակության հիմքն է. Իլուգի ԳունարսոնՀ կրթական համակարգը դարձել է ավելի ճկուն. Արամ Սիմոնյան