Ձեր վստահելի աղբյուրը

Հայաստանում ցիկլոնի ազդեցությունը կպահպանվի մինչև մայիսի 15-ը, ժամանակ առ ժամանակ անձրևները կշարունակվեն, կդիտվեն ամպրոպներ, օդի ջերմային ֆոնը և այսօր, և վաղը փոփոխություն չի կրի. սպասվում է մինչև 20 աստիճան տաքություն: Այդ մասին Panorama.am-ին տեղեկացրեց ՀՀ ՏԿԱԻՆ օդերևութաբանության կենտրոնի պետի տեղակալ Գագիկ Սուրենյանը:

Մայիսի 16-ին, նրա խոսքով, ցիկլոնը կհեռանա Հայաստանի տարածքից և մայիսի 16-ին կդիտվի առանց տեղումների եղանակ, ինչը երկար չի տևի և մայիսի 17-ից 19-ը դարձյալ նոր պրոցես է մոտենում:

«Հիմնականում Շիրակում, Լոռիում, Տավուշում, Գեղարքունիքում, Սյունիքում և Արցախում երեկոյան ժամերին կդիտվեն ամպրոպային բնույթի կարճատև անձրևներ, իսկ մյուս շրջաններում երեկոյան կնկատվեն ամպրոպներ և նույնպես կա կարճատև անձրևների հավանականություն»,-փոխանցեց Սուրենյանը:

Իսկ օդի ջերմաստիճանը կսկսի բարձրանալ մայիսի 16-ից ու արդեն մայիսի 18-ին, մայիսի 19-ին Երևանում կլինի մինչև 26-27 աստիճան տաքություն:

Հիմնականում երեկոյան ժամերին անձրևները կշարունակվեն մինչև մայիսի վերջ:

Ինչ վերաբերում է սպասվող ամռանը, Սուրենյանն ասաց, որ Հայաստանում շոգ ամառ չի սպասվում:

«Այս պահին չեմ կարող ասել, թե միջինում որքան կլինի ջերմաստիճանը, բայց հաստատ շոգ չի լինի», -ասաց օդերևութաբանության կենտրոնի պետի տեղակալը:

Հարակից հրապարակում`
Առատ տեղումները մտահոգում են գյուղատնտեսներին