Ձեր վստահելի աղբյուրը

 Մայիսի 14-ին «Իսլամական պետության» առաջնորդ Աբու Բաքր ալ-Բաղդադիի կողմից ձայնագրություն է տարածվել համացանցում: Այն բավական ուշագրավ է հատկապես վերջին շրջանում հաճախակի դարձած Աբու Բաքրի սպանության վերաբերյալ տեղեկությունների առումով: Դրանով իսլամականների կողմից ի ցույց է դրվում խալիֆի կենդանի լինելու հանգամանքը:

Հավանաբար ձայնագրությունն արվել է 2015 թ. ապրիլ ամսին, քանզի մոտ 30 րոպե տևող ձայնագրության ընթացքում Աբու Բաքր ալ-Բաղդադին անդրադառնում է վերջին շրջանի այնպիսի զարգացումներին, ինչպես օրինակ իրաքյան Բայջի նավթամշակման համալիրի, կամ Քիրքուքի մոտ իսլամականների ռազմական գործողություններին: Սակայն, ոչինչ չի հնչում Թիքրիթի մասին, որը 2015 թ. մարտի 31-ին իսլամականները զիջեցին իրաքյան կառավարական ուժերին:

Աբու Բաքրի ուղերձում ևս մեկ անգամ կոչ է հնչում աշխարհի բոլոր հատվածներում բնակվող մուսուլմաններին գալ Սիրիա և Իրաք ու «Իսլամական պետության» զինյալների կողքին ջիհադական պայքար մղել: Աբու Բաքրը ընդգծում է նաև մուսուլմանական աշխարհից դուրս իսլամականների պայքարը: Դրանով ևս մեկ անգամ շեշտվում է «Մերձավոր և Հեռավոր թշնամիների» դեմ ջիհադական պայքարի անհրաժեշտությունը:

Խալիֆի ուղերձում հայտարարվում է համընդհանուր մոբիլիզացիա, հրաման տրվում յուրաքանչյուր մուսուլմանին տեղափոխվել «Իսլամական պետություն» ջիհադական պայքար մղելու համար՝ ընդգծելով, որ «Իսլամական պետության» թուլության և անօգնական լինելու հանգամանքով չի պայմանավորված համընդհանուր մոբիլիզացիայի հայտարարումը: Խալիֆի կողմից նշվում է, որ իսլամը խաղաղության կրոն չէ, այլ, ընդհակառակը, պայքարի կրոն է՝ մեջբերելով Մուհամմադ մարգարեի և նրա զինակիցների օրինակները: Ղուրանից հատվածների և վաղիսլամական ժամանակաշրջանում մուսուլմանների վարած ճակատամարտերին մարգարեի անմիջական մասնակցության վերաբերյալ հիշատակումները բազմիցս են կիրառում իսլամականները տարածվող տեղեկություններին և ուղերձներին առավել ազդեցիկ բնույթ հաղորդելու համար:

Ուղերձում հստակ նշված են իսլամականների թիրախները՝ ամերիկացիներ, հրեաներ, քրիստոնյաներ, շիաներ, անհավատներ և այլն: Ընդգծվում է, որ իսլամականների թիրախում է Երուսաղեմը, Բաղդադն ու Քերբելան: Սա հստակ մեսիջ է ուղղված այն մուսուլմաններին, որոնք քննադատում են «Իսլամական պետությանն» այն բանի համար, որ վերջինի կողմից բավական ուշադրության չի արժանանում Իսրայելի և Իրանի դեմ պայքարը: Ձայնագրության մեջ զգալի հատված հատկացված է սուննիական երկրներին ու դրանց բնակչությանը: Մասնավորապես քննադատվում են Սաուդյան Արաբիայի իշխանությունները, որոնք բնորոշվում են անհավատներ և իսլամի ակունքներից հեռացածներ:

Աբու Բաքրը անդրադառնում է նաև այն սուննիներին, որոնք դեռևս կռվում են «Իսլամական պետության» դեմ և պատսպարվել են անհավատների մոտ՝ հնչեցնելով, որ նրանք ովքեր զղջացել են, կարող են վերադառնալ «Իսլամական պետություն»: Աբու Բաքրը չի մոռանում նաև նշել այն իսլամականներին, որոնք բացի Սիրիայից և Իրաքին, ջիհադական պայքար են վարում աշխարհի այլ հատվածներում՝ Հյուսիսային Աֆրիկայում, Կովկասում, Արաբական թերակղզում, Միջին Ասիայում, Հնդկաստանում, Չինաստանում և այլն:

Իչպես նախկինում ևս, Աբու Բաքր ալ-Բաղդադիի վերոհիշյալ ձայնագրությունն ուղեկցվեց իսլամականների ռազմական ակտիվ հարձակումներով: Պատահական չեն ուղերձին հաջորդած իսլամականների հաջող ռազմական գործողությունները Իրաքում և Սիրիայում: Ըստ վերջին ժամերին տարածվող տեղեկությունների՝ «Իսլամական պետության» զինյալները վերահսկում են իրաքյան ալ-Ռամադի քաղաքը, մարտեր են վարում սիրիական հանրահայտ հնավայրերից Պալմիրայի մատույցներում և այլն: Այնպես որ, «Իսլամական պետության», առավել ևս դրա առաջնորդի կողմից տարածվող ուղերձներն ու դրան հաջորդած ռազմական առաջխաղացումները փոխկապակցված են և ունեն հստակ հասցեատերեր ինչպես իսլամական աշխարհի ներսում, այնպես էլ՝ դրսում:

Արաբագետ՝ Սարգիս Գրիգորյան