Ձեր վստահելի աղբյուրը

«Հայաստանում վերջին տարիներին սոցիալ-տնտեսական վիճակը հանգեցրել է աղքատության մակարդակի բարձրացմանը, աշխատանքային միգրացիային, որն էլ թուլացնում է ընտանիքի հիմքերը: Այցելելով գիշերօթիկ դպրոցներ, հատուկ հաստատություններ, տեսա, որ այդտեղ մնացող երեխաների 90 տոկոսը ոչ թե որբացել են ու հայտնվել այնդտեղ, այլ ծնողները չունենալով երեխաներին պատշաճ ապահովելու միջոցներ, տարել են նման հաստատություններ»: Լրագրողների հետ հանդիպման ժամանակ ասաց ՄԱԿ-ի հատուկ զեկուցող Մոդ դե Բյոր-Բուքիքիոն, ով մայիսի 12-18-ը պաշտոնական այցով գտնվում է Հայաստանում՝ գնահատելու երկրում երեխաների վաճառքի, երեխաների մամնավաճառության և երեխաների պոռնոգրաֆիայի իրավիճակը:

Յոթօրյա առաքելության ընթացքում նա այցելել է նաև երեխաների խնամքի կենտրոններ:

Նա նշեց, որ հաշմանդամություն ունեցող երեխաների խնամքի կենտրոններում գտնվող երեխաներից շատերը կարող էին մնալ տանը՝ ծնողների խնամքի տակ, եթե կառավարությունը համապատասխան և բավարար օժանդակություն տրամադրած լիներ ծնողներին. «Օժանդակության բացակայության պայմաններում ծնողները չեն կարող այդ դժվարին իրավիճակից գլուխ հանել»:

Ըստ նրա` իշխանությունները պետք է ջանքեր գործադրեն հաշմանդամություն ունեցող երեխաների այլընտրանքային խնամքի ապահովման համար, հնարավորություն ընձեռեն ծնողներին լիովին պատասխանատվություն ստանձնել իրենց երեխաների համար՝ պահելով տանը:

Մոդ դե Բյոր-Բուքիքիոն Հայաստանում ունեցած հանդիպումների ընթացքում լսել է նաև այնպիսի դեպքերի մասին, երբ անչափահաս երեխաներին օգտագործել են մուրացկանության, մարմնավաճառության՝ ընտանիքի ապրուստն ապահովելու համար:

«Փողոցում հայտնված երեխաների խնդիրն ինձ մտահոգում է»,- ասաց նա՝ միաժամանակ հավելելով, որ ստացած տվյալների համաձայն, 2005-2008 թվականներին նրանց թիվը շատ ավել է եղել, կանխարգելիչ միջոցառումների, անչափահասների զբաղվածության տարբերակներ տրամադրելու, դպրոցներից դուրս մնալու երևույթը կանխելու միջոցով նրանց թիվը նվազել է:

«Երեխան գտնվելով փողոցում, անպայմանորեն չի նշանակում, որ թրաֆիքինգի, շահագործման, քրեական ցանցերի զոհ է, պարզապես հենց ծնողներն են նրանց մղում փողոց մուրալու, որպեսզի ընտանիքը օրվա ապրուստ ունենա: Սա ներառում է նաև մանկական մարմնավաճառությունը: Օրինակ բերեցին, որ մայրը երեխային մղել է մարմնավաճառության»,- ասաց Մոդ դե Բյոր-Բուքիքիոն:

Ըստ նրա, պետությունը պետք է միջոցների տրամադրման ժամանակ շեշտը դնի այս երևույթների կանխարգելման վրա. «Կարևոր է, որ կառավարությունը բացի ֆինանսական նպաստներից ընտանիքին սատարող ծրագրեր մշակի»:

Նախորդող հրապարակում՝
ՄԱԿ-ի հատուկ զեկուցող. ՀՀ-ում երեխաների շահագործման դեպքերը քիչ են, բայց կան բաղթողումներ