Ձեր վստահելի աղբյուրը

Այս տարի Հայաստանը պատվավոր երկրի կարգավիճակով  հանդես կգա MIDEM-ում՝ հեղինակավոր միջազգային երաժշտական ինդուստրիայի փառատոնում, որը տեղի կունենա Ֆրանսիայի Կանն քաղաքում հունիսի 5-8-ը: Այս առիթով Panorama.am-ը ներկայացնում է բացառիկ հարցազրույց Reed MIDEM ընկերության մշակութային ծրագրերի տնօրեն Կորնելիա Մուխի հետ:

- Տիկին Մուխ, ինչպես հայտնի է, Հայաստանը պատվավոր հյուրի կարգավիճակով մասնակցելու է 2015թ.-ի MIDEM փառատոնում: Կարո՞ղ եք մի քանի խոսքով ներկայացնել MIDEM փառատոնն ու նրա առաքելությունը:

- MIDEM-ը միջազգային ինդուստրիայի փառատոն է, որը կազմակերպվում է Reed MIDEM-ի կողմից. վերջինս հանդիսանում է ամենախոշոր փառատոնների կազմակերպիչն աշխարհում՝ ունենալով մոտ 500 ցուցահանդեսներ և շոուներ ողջ աշխարհում: MIDEM փառատոնն ամբողջությամբ նվիրված է երաժշտությանը:

MIDEM-ում ընդգրկված է ավելի քան 6000 մասնակից 80 երկրներից: Մենք նաև ունենք միջոցառումների մեծ բազմազանություն և ներկայացնում ենք բոլոր երաժշտական ոճերը՝ սկսած դասական երաժշտությունից և ջազից, մինչև ռոք և հիփ-հոփ. մի խոսքով՝ ամեն ինչ: Մենք աջակցում ենք ինչպես կայացած, այնպես էլ սկսնակ երաժիշտներին և կազմակերպություններին մեր հատուկ ծրագրերի միջոցով. այդպիսով մենք ընդգրկում ենք երաժշտական ողջ համայնապատկերը: Այս տարի Reed MIDEM-ը նշում է իր 49-րդ տարելիցը Կաննում, որտեղ Հայաստանը կներկայացվի որպես պատվավոր երկիր:

- MIDEM-ը մի հարկի տակ է բերում ինչպես երաժիշտներին, այնպես էլ խոշոր բիզնեսներին: Ինչպե՞ս է այն համադրում երաժշտությունն ու բիզնեսը:

- MIDEM-ը ներկայացնում է երաժշտության ոլորտի ամբողջ էկոհամակարգը: Մի կողմից մենք ներկայացնում ենք երաժշտության ոլորտի հիմնական, ավանդական բիզնեսները, որոնց թվում են պրոդյուսերները, ձայնագրման ստուդիաները և այլոք, մյուս կողմից մենք ներկայացնում ենք այդ հիմնական բիզնեսին շրջապատող համակարգը, որը ներառում է համապատասխան տեխնոլոգիական ասպեկտները (համացանցը, երաժշտական պլատֆորմները). այս կատեգորիայում ներկայացված կազմակերպությունների թվում են օրինակ Google-ը և YouTube-ը: Միևնույն ժամանակ MIDEM-ն ընդգրկում է նաև բոլոր խոշոր բրենդները, օրինակ՝ մեքենաների հայտնի բրենդները (Opel, BMW, Ford, Fiat և այլն) կամ Coca-Cola-ն, Red Bull-ը և նման բազմաթիվ այլ ընկերություններ:

Այս տարբեր ոլորտների ներկայացուցիչներին մեկտեղ բերելը կարևոր է հայտնի բրենդների և երաժշտական բիզնեսի միջև կապեր հաստատելու համար: Նրանք բոլորը շահագրգռված են MIDEM-ում մասնակցությամբ, քանի որ այստեղ նրանք գտնում են իրենց հետաքրքրող նյութեր մատուցող անձանց և կազմակերպություններին: Այսպիսով MIDEM-ը բազմաթիվ հնարավորություններ է ստեղծում բոլոր մասնակիցների համար:

- Ինչպե՞ս եք Դուք ծանոթացել Հայաստանի հետ, և ինչպե՞ս է Հայաստանն ընտրվել որպես այս տարվա փառատոնի պատվավոր հյուր:

- Ես անձամբ երկար տարիներ է, ինչ գիտեմ Հայաստանը: Առաջին անգամ ես ծանոթացա Հայաստանի հետ Էլժբիետա Պենդերեցկայի՝ հայտնի կոմպոզիտոր Քշիշտոֆ Պենդերեցկու կնոջ միջոցով (Պենդերեցկին, ինչպես հայտնի է, ունի հայկական արմատներ): Էլժբիետա Պենդերեցկան կազմակերպում է հայտնի Բեթհովենի փառատոնը Վարշավայում, որում ես նույնպես ներգրավված եմ: Այդ փառատոնի ժամանակ ես առաջին անգամ հանդիպեցի հայերի, և նրանք ինձ հրավիրեցին Արամ Խաչատրյան միջազգային մրցույթին որպես պատվավոր հյուր: Այնտեղ ես ծանոթացա ՀՀ մշակույթի նախարար Հասմիկ Պողոսյանի հետ: Նրան շատ դուր եկավ MIDEM-ի գաղափարը, և մենք սկսեցինք համագործակցել:

Հայաստանն առաջին անգամ մասնակցեց MIDEM-ում 2014թ.-ին փոքր ստենդով՝ ներկայացնելով մի քանի կազմակերպություններ և հայկական երաժշտության CD-ներ: Այդ նույն տարի Հայաստանը դիմեց MIDEM 2015-ին որպես պատվավոր հյուր ներկայանալու համար: Մենք ընտրեցինք Հայաստանը, քանի որ Հայաստանը 2015 թվականը հայտարարել էր մշակութային տարի. մենք մտածեցինք սա լավ առիթ կլինի:

- Իսկ ի՞նչ է իրենից ներկայացնում «պատվավոր երկիր» կարգավիճակը: Ի՞նչ հնարավորություններ է այն ընձեռում:

- Պատվավոր երկիրն ունի փառատոնի ամենատարբեր մակարդակներում և բազմաթիվ միջոցառումներում իրեն ներկայանալու լայն հնարավորություն: Այն կարող է կազմակերպել համերգներ և երիտասարդ երաժիշտների, և հանրահայտ աստղերի ներգրավմամբ, ներկայացվել կոնֆերանսներում, հանդես գալ մամուլի ասուլիսով, մասնակցել VIP ընթրիքին և շատ ուրիշ միջոցառումների. սա շատ լավ հնարավորություն է երկրի երաժշտական կյանքի ողջ բազմազանությունը ներկայացնելու համար:

- Ովքե՞ր են ներկայացնելու Հայաստանը MIDEM-ում այս տարի: Կարո՞ղ եք մի քանի անուններ նշել:

- Հայաստանից լինելու է բարձրաստիճան պաշտոնական պատվիրակություն՝ ՀՀ նախագահի գլխավորությամբ, որում ընդգրկված են լինելու մի քանի նախարարներ, այդ թվում՝ ՀՀ մշակույթի նախարարը: Ներկա կլինեն նաև հանրաճանաչ աստղեր:

MIDEM-ում ներկայացվելու է հայ երաժիշտների շատ լավ կազմ, այդ թվում՝ Երևանի պետական երիտասարդական նվագախումբը Սերգեյ Սմբատյանի ղեկավարությամբ, հայտնի թավջութակահար Նարեկ Հախնազարյանը, Հովեր երգչախումբը, որը համերգ է տալու երեկեցում և Հայաստանի պետական ջազ նվագախումբը, որը ջազի մեծ երեկո է անցկացնելու: Այլ ջազ խմբեր, ինչպիսին են «Կատուներ»-ը, «Ակուստիկ գույներ» քառյակը, «Միքայել Ոսկանյան և ընկերներ» էթնիկ ջազային խումբը, ինչպես նաև Դորիանս ռոք խումբը, Ambassador խումբը՝ հայտնի ջութակահար Վարազդատ Խաչումյանի ղեկավարությամբ, DJ Beatman-ը և բազմաթիվ այլ փայլուն երաժիշտներ:

Մենք նաև հրավիրել ենք մի քանի հայ նկարիչների: Տիգրան Ձիթողցյանը ներկայումս նկարում է երկու մեծ կտավ հատուկ MIDEM-ի համար, որոնք ցուցադրվելու են փառատոնի ժամանակ: Ներկայացված են լինելու նաև հայկական ազգային երաժշտական գործիքները, օրինակ՝ դուդուկը: Հայաստանից հրավիրված են նաև տաղանդավոր մոդելավորողներ, ինչպիսին է Վահան Խաչատրյանը, ով մոդելավորելու է VIP կազմակերպիչների զգեստները, այդ թվում և իմ հագուստը: Ես ներկայանալու եմ MIDEM-ում հայկական ոճի նորաձև հագուստով:

Բացման արարողության և VIP ընթրիքի ժամանակ հայ խոհարարը պատրաստելու է հայկական ճաշատեսակներ: Մատուցվելու է նաև հայկական Արարատ կոնյակը և հայկական գինիներ. այսպիսով մենք կներկայացնենք հայկական մշակույթի խճանկարը ողջ աշխարհին: Discovery Zone կոչվող մեր նոր ծրագրի շրջանակներում, որով փառատոնը իր դռներն է բացում ժողովրդի առաջ, մենք կունենանք հայկական բուտիկ, որտեղ կվաճառվեն տիպիկ հայկական իրեր. Սա շատ հետաքրքիր կլինի և մասնակիցների, և ընդհանուր ժողովրդի, և կարծում եմ Ֆրանսիայի հարավում ապրող մեծ հայկական համայնքի համար:

- Տիկին Մուխ, Դուք Հայաստանում էիք ապրիլ ամսին և մասնակցում էիք Հայոց ցեղասպանության 100-րդ տարելիցին նվիրված միջոցառումներին: Կցանկանա՞ք կիսվել Ձեր տպավորություններով:

- Այո, ես Հայաստանում էր վերջերս. ինձ հրավիրել էին «Ընդդեմ ցեղասպանության հանցագործության» գլոբալ ֆորումին: Պետք է ասեմ, որ ես ինձ շատ մոտ եմ զգում Հայաստանին, քանի որ երկար տարիներ է, ինչ ճանաչում եմ այս երկիրը, և սա լավ առիթ էր ավելի մոտիկից այն զգալու համար: Երբ ես աշխատում եմ որևէ երկրի հետ, անձնապես ինձ համար կարևոր է, որ ավելի շատ բան իմանամ այդ երկրի մասին և որ կիսեմ իր ժողովրդի հետ (որին ես հարգում և սիրում եմ) ոչ միայն նրա ուրախ պահերը, այլև տխուր պահերը:

Պետք է ասեմ, որ հիշատակման այս արարողություններին մասնակցելը շատ հուզիչ էր ինձ համար: Պաշտոնական արարողությունը, ինչպես նաև սրբադասման արարողությունը շատ տպավորիչ էին և շատ հուզիչ: Ես նաև ներկա էի «24/04» սիմֆոնիկ նվագախմբի համերգին, որը հատուկ այս առիթի համար էր կազմավորվել: Համերգը, որում 43 երկրներից 100 երաժիշտներ նվագում էին հայ կոմպոզիտորների ստեղծագործությունները, շատ հզոր էր: Համերգի ընթացքում ցուցադրվող տեսաժապավեններն ու լուսանկարները, որոնք պատկերում էին անցյալի դաժանությունները, ինչպես նաև ժամանակակից Հայաստանը, շատ լավ լրացնում էին երաժշտությանը:

Հայոց ցեղասպանության 100-ամյակի համար ընտրված «հիշում եմ և պահանջում» կարգախոսը իմ լսած ամենալավ կարգախոսներից է. այն շատ ուժեղ է և ճիշտ ազդանշան է փոխանցում՝ մի կողմից այն ասում է, որ պետք է հիշել ցեղասպանությունը և պահանջել ճանաչում, իսկ մյուս կողմից այն պահանջում է, որ Հայաստանն ունենա ապագա: Եվ ակնհայտ է, որ Հայաստանն ունի շատ լավ երիտասարդ սերունդ, շատ տաղանդավոր ժողովուրդ, և բավականին շատ իրադարձություններ են տեղի ունենում երկրում՝ չնայած խնդիրներին:

Ես ուրախ եմ, որ գնալով մեծանում է Հայոց ցեղասպանությունը ճանաչող երկրների թիվը: Ես ուրախ եմ նաև, որ իմ հայրենի Գերմանիայում քայլեր են արվում այդ ուղղությամբ և որ Գերմանիայի նախագահը, ինչպես նաև Գերմանիայի խորհրդարանի նախագահը ճիշտ ժամանակին արտասանեցին ցեղասպանություն բառը: Կարծում եմ՝ շատ կարևոր է, որ յուրաքանչյուր երկիր պատշաճ կերպով առերեսվի իր պատմությունը:

 

Հարցազրույցը վարեց Նվարդ Չալիկյանը