Ձեր վստահելի աղբյուրը

Էլեկտրաէներգիայի սակագինը բարձրացնելու «Հայաստանի էլեկտրական ցանցեր» ընկերության հայտը արդարացված չէ: Այս մասին Panorama.am-ի թղթակցի հետ զրույցում ասաց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը:

Ըստ նրա՝ էլեկտրաէներգիայի սակագնի ոչ թե թանկացման, այլ էժանացման ռեսուրսներ կան Հայաստանում. «Իրականում էլեկտրաէներգիայի ինքնարժեքը 2-3 դրամի սահմանում է, իսկ փոքր ՀԷԿ-երի արտադրած էլեկտրաէներգիան ավելի էժան է: Կարծում եմ, որ բոլոր այն ծախսերը, որոնք ներառվել են էլեկտրաէներգիայի սակագնի մեջ արդարացված չեն և դրանք ուսումնասիրության կարիք ունեն»:

Սակայն տնտեսագետը գտնում է, որ այդ ուսումնասիրությունները չպետք է ունենան նույն ճակատագիրը, ինչ եղավ ՀՀ գազամատակարարման համակարգի գործունեությունը ուսումնասիրող ԱԺ ժամանակավոր հանձնաժողովի հետ. «Իհարկե չէի ցանկանա, որ դա լիներ գազի ժամանակավոր Հանձնաժողովի նման, երբ բոլորը մի կողմ կանգնեցին, խոսացողներից որևէ մեկը չցանկացավ հետամուտ լինել և քրեական պատասխանատվության ենթարկել անուղղակի ծախսերի հեղինակներին»:

Թ.Մանասերյանը կարծում է՝ լռության հետևանքով է, որ այսօր ունենք գազի և էլեկտրաէներգիայի նման սակագին. «Մարդուն վիրավորում են այնքան, որքան ինքը թույլ է տալիս: Կարծում եմ, որ եթե ձայն չհանենք, այդպես էլ կշարունակվի: Մարդիկ պետք է ոտքի կանգնեն, Կառավարությունը պետք է մասնավոր ընկերությունից հաշվետվություն պահանջի»:

Տնտեսագետը անդրադարձավ նաև հելիոֆիկացիայի ծրագրին, որը սկսել է Պարիս Հերունին, իսկ այսօր շարունակում է պրոֆեսոր Վահան Համազասպյանը. «Այդ ծրագիրն իրականացնելու դեպքում` մեր հաշվարկները ցույց են տալիս, որ հատկապես գյուղական համայնքներում էլեկտրաէներգիայի նկատմամբ պահանջարկը կարող է իջնել կրկնակի, սակայն դա ձեռնտու չէ որոշ շրջանակների»:

Ինչ վերաբերում է «Հայաստանի էլեկտրական ցանցեր» ընկերության գործունեությանը, տնտեսագետը նշեց, որ երբեք էլ չի բավարարել այն պահանջները, որոնք դրված էին ՀՀ կառավարության և Համաշխարհային բանկի կողմից:

Թ.Մանասերյանը հիշեցրեց, որ պահանջներից մեկն այն էր՝ ընկերությունը պետք է փորձ ունենար, սակայն փորձ չուներ: Բացի այդ, պետք է ներկայացներ թափանցիկ ֆինանսական հաշվետվություն, որն այդպես էլ չներկայացրեց. «Ընկերությունը պայմանագրով ստանձնել էր, որ ներդրումներ է իրականացնելու, բայց այդ պարտավորությունը նույնպես չկատարեց: Նշեմ նաև, որ այն օֆշորային ընկերություն է, որը թաքցնում է իր եկամուտները, աղբյուրները և այլն: Սա խոսում է այն մասին, որ ի սկզբանե էր պետք զգուշանալ նման ընկերություններից»:

Նրա խոսքերով՝ իրենք առաջարկ են ներկայացրել, որի համաձայն՝ կարելի է բաշխիչ էլեկտրական ցանցերը մասնավորեցնել այլ կերպ, թողարկել բաժնետոմսեր և տեղաբաշխել բնակչության շրջանում. «Դա կարող է լինել ինչպես Հայաստանում, այնպես էլ երկրից դուրս: Կարծում եմ, որ դա լավագույն տարբերակն է՝ ռազմավարական նշանակության օբյեկտները, ձեռնարկությունները համապետականացնելու և պետական գույքը ճիշտ կառավարելու համար»:
 

Նախորդիվ`
Հայաստանում էլեկտրաէներգիայի թանկացումը մեծ վնասներ կհասցնի երկրի տնտեսությանը. ԱԺ նախագահ
Գագիկ Մակարյան. Զախարյանին խորհուրդ տվեք կարդալ կանոնադրությունը
Դժբախտաբար, ամեն ինչ մեզանից կախված չէ. Զախարյանը՝ էլէներգիայի սակագնի մասին
Էլեկտրաէներգիայի թանկացման դեմ փողոցային պայքարը միակ ճնշող ճանապարհն է. Հանրային քննարկում