ԻԼԻՊ-ին հաջողվել է գրավել հնագույն Պալմիրան

Աշխարհում 11:30 21/05/2015

ԻԼԻՊ-ին հաջողվել է գրավել հնագույն Պալմիրան

«Իրաքի և Լևանտի իսլամական պետության» գրոհայինները մեկշաբաթյա մարտերից հետո գրավել են Սիրիայի հնագույն Պալմիրա քաղաքը և մուտք գործել քաղաքի արժեքավոր ավերակներ: Այս մասին հայտնում է BBC-ն:

ԻԼԻՊ-ը վերահսկողություն է սահմանել նաև մոտակայքում գտնվող ռազմաօդային բազայի, բանտի և հետախուզական գրասենյակի նկատմամբ:

Լոնդոնում տեղակայված մարդու իրավունքների մոնիթորինգի սիրիական կենտրոնի տվյալներով` ավերածությունների մասին դեռ տեղեկություններ չկան: Ըստ կենտրոնի` մարտերի ընթացքում սպանվել է կառավարական բանակի ավելի քան 100 զինվոր:

Սիրիայի պետական հեռուստատեսությունը նույնպես հաստատել է այս լուրը` միաժամանակ նշելով, որ բանակը քաղաքի շրջակայքից տարհանել է բնակիչների մեծ մասին:

Սիրիայի հնությունների և գլխավոր թանգարանների տնօրեն Մամուն Աբդուլ Քարիմը հայտարարել է, որ Պալմիրայի հարյուրավոր արձաններ տեղափոխվել են ապահով վայրեր, սակայն հսկայական հուշարձանները անհնար էր տեղափոխել: Նա հույս է հայտնել, որ միջազգային հանրությունը կարձագանքի այս վայրագությանը և կպաշտպանի այն ահաբեկիչներից:

ՅՈՒՆԵՍԿՕ-ի գլխավոր տնօրեն Իրինա Բոկովան իր խորը անհանգստությունն է հայտնել կատարվածի կապակցությամբ:

«Մարտերը վտանգի տակ են դնում Մերձավոր Արևելքի ամենանշանակալի վայրերից մեկը ու նրա բնակիչներին»,-ասվում է Բոկովայի հայտարարության մեջ:

Նշենք, որ Սիրիայում ՅՈՒՆԵՍԿՕ-ի վտանգի տակ հայտնված համաշխարհային ժառանգության ցուցակում են հայտնվել Դամասկոսի հին քաղաքը, Հալեպի հին քաղաքը, Պալմիրայի հուշարձանները, Բոսրայի հին քաղաքը, Խաչակիրների Կրակ-դե-Շևալյե և Սալահ Ադ-Դին ամրոցները, ինչպես նաև Հյուսիսային Սիրիայի հնագույն գյուղերը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: