Ձեր վստահելի աղբյուրը

«Մեզ համար, ինչպես երբեք շատ կարևոր է մասնագիտական միավորումների կայացման գործընթացը և մենք մեր պատրաստակամությունն ենք հայտնում աջակցել նրանց աշխատանքներին, ձեռք մեկնել»,- ողջունելով այսօր Երևանի «Իզմիրլյան» բժշկական կենտրոնում մեկնարկած միջազգային առաջին գիտագործնական երկօրյա համաժողովի մասնակիցներին՝ ասել է ՀՀ առողջապահության նախարար Արմեն Մուրադյանը:

ԱՆ մամուլի ծառայությունից հայտնում են, որ համաժողովը նվիրված է Հայաստանում մաշկավեներաբանական ծառայության հիմնադրման 90-ամյակին։

Նա բժշկական հանրությանը, համաժողովին հյուրերին ներկայացրել է վերջին շրջանում առողջապահական համակարգում կատարվող փոփոխությունները: Մասնավորապես անդրադարձել է ՀՀ Ազգային ժողովում առաջին ընթերցմամբ անցած «Բնակչության բժշկական օգնության և սպասարկման մասին ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծին, որը վերաբերում է վերջին տարիներին երկար քննարկված և իր հաստատուն տեղը գտած չափորոշիչներին, շարունակական մասնագիտական զարգացման կրեդիտային համակարգին:

«Մեծ հույսեր ենք կապում այս փոփոխությունների հետ, որոնք ուղղակիորեն կապված ենք բժշկական հանրության հետ: Մասնագիտական միավորումները իրենց աշխատանքով կնպաստեն այս բարեփոխումների իրականացմանը»,- ընդգծել է Արմեն Մուրադյանը` հավելելով, որ յուրաքաչյուր ոլորտում այս փոփոխությունները թույլ կտան ստանալ առկա բազմաթիվ հարցերի պատասխաններ:

Նա երախտագիտություն է հայտել համաժողովի կազմակերպիչներին` մաղթելով արգասաբեր աշխատանք:
Համաժողովին ելույթներ են ունեցել նաև ՀՀ ԱՆ «Մաշկաբանության և սեռավարակաբանության բժշկակագիտական կենտրոնի» տնօրեն Միքայել Սահակյանը և Երևանի Մխիթար Հերացու անվան պետական բժշկական համալսարանի ռեկտոր Միքայել Նարիմանյանը:

Համաժողովի աշխատանքներին մասնակցում են բազմաթիվ անվանի գիտնականներ, փորձառու մաշկավեներաբաններ, առողջապահության կազմակերպիչներ, կլինիկական օրդինատորներ՝ ինչպես Հայաստանի Հանրապետությունից, այնպես էլ Ռուսաստանի Դաշնությունից, Վրաստանից, Ուկրաինայից, Բելառուսից, Իսրայելից։

Դասախոսություններով և զեկուցումներով հանդես են եկել աշխարհահռչակ գիտնականներ։ Պրոֆ Է.Ե.Դանիելյանը կներկայացնի Հայաստանում մաշկավեներաբանական ծառայության անցած ուղին, Ռուսաստանի սեռավարակաբանների գիլդիայի (IUSTI RU) նախագահ պրոֆեսոր Մ.Ա. Գոմբերգը կխոսի որոշ սեռավարակների վարման ժամանակակից մոտեցումների մասին, «Մաշկային և վեներական հիվանդությունների ռուսական ամսագիր» և «Կլինիկական մաշկաբանություն և վեներաբանություն» ամսագրերի խմբագիր պրոֆեսոր Ն.Գ. Կոչերգինը կներկայացնի 21-րդ դարի ամենատարածված մաշկային հիվանդություններից մեկի՝ ատոպիկ մաշկաբորբի ռացիոնալ բուժման մեթոդները։ Ելույթներ կունենան Վրաստանի գլխավոր մաշկավեներաբան, պրոֆ. Գ.Գալդավանը, պրոֆ. Տ.Սոկոլովան՝ Ռուսաստանից, պրոֆ. Տ.Սվյատենկոն՝ Ուկրաինայից, Ի.Ցիրուլնիկովը՝ Իսրայելից, Լ.Կորնևան՝ Բելոռուսից և այլոք։

Համակողմանի կլուսաբանվեն մաշկաբանության, սեռավարակաբանության, բժշկական կոսմետոլոգիայի, հարակից այլ մասնագիտությունների արդիական հիմնախնդիրները, բժշկագիտության այս ճյուղի ժամանակակից նվաճումները և ձեռքբերումները։ Նախատեսվում է անցկացնել նաև հովանավոր ընկերությունների («Հելիոս» ԲԿ, «Աստելլաս Ֆառմա Յուռոպ» և այլն) ցուցահանդեսներ։