Ձեր վստահելի աղբյուրը

«Ես հրապարակային ու պատասխանատու կերպով հայտարարում եմ, որ գոյություն չունի որևէ ապացույց, որը հիմք հանդիսանար Գոհար Ենոքյանին նման մեղադրանք առաջադրելու համար»,-Panorama.am-ին ասաց «Բարգավաճ Հայաստան» կուսակցության անդամ Գոհար Ենոքյանի փաստաբան Գեղամ Հակոբյանը` մեկնաբանելով Ազգային ժողովում Ենոքյանի գործի մասին Գլխավոր դատախազ Գևորգ Կոստանյանի հայտարարությունը:

Նշենք, որ դատախազը հայտարարել էր, որ ունեն բավարար հիմքեր Գոհար Ենոքյանին որպես կասկածյալ ու մեղադրյալ ներգրավելու համար. «Բայց ես չեմ հրապարակի, թե ինչ ցուցմունք ունեմ, ում ցուցմունքն է, ինչով է այն հիմնավորվում կամ հերքվում, դա նախաքննության գաղտնիք է: Հետո կխոսենք այդ մասին»:

«Չբացահայտելով «ապացույց» կոչվածի բովանդակությունը, եթե օբյեկտիվ մոտեցում լիներ և դիմումի կապակցությամբ հետաքննություն իրականացվեր, ապա տվյալ փաստական տվյալները՝ «ապացույցները», անգամ քրեական գործ հարուցելու հիմք հանդիսանալ չէին կարող, էլ ինչ մնում է՝ ձերբակալման, մեղադրանքի առաջադրման ու խափանման միջոց կիրառելու հիմք դառնային: Այսքանից հետո դեռ խոսում են օրենքի առջև հավասարության մասին: Ձեզ հավաստիացնում եմ, եթե իրականության մեջ վերագրվող դեպքը տեղի ունեցած լիներ և ՀՀ գլխավոր դատախազությունն ունենար գոնե մեկ ապացույց, կրկնում եմ՝ գոնե մեկ ապացույց, ապա շուրջ մեկ տարի նախաքննություն չէր իրականացնի, այլ վաղուց քրեական գործը մեղադրական եզրակացությամբ կուղարկվեր դատարան», -հակադարձեց Գեղամ Հակոբյանը:

Փաստաբանի խոսքով, այս գործում մեկ նպատակ կա` «Գոհար Ենոքյանին ներքաշել հորինված պատմության մեջ՝ գույքային խնդիրներ լուծելու նպատակով»: Իսկ դա, նրա պնդմամբ, կատարվում է «օրինականություն ապահովող գլխավոր մարմնի ղեկավարի գիտությամբ, ու ելույթից դատելով՝ ենթադրում եմ՝ անմիջական հանձնարարությամբ»:

Նա տեղեկացրեց, որ թեպետ գլխավոր դատախազը հայտարարել է, թե Գոհար Ենոքյանից բողոք չի ստացել, բայց իրենք հենց ձերբակալման հաջորդ օրը գրավոր բողոք է ներկայացվել այս գործում առկա ապօրինությունների դեմ:

«Սակայն մինչ օրս որևէ պատասխան չկա, այսինքն՝ ՀՀ գլխավոր դատախազությունը ցուցաբերել է անգործություն: Առաջադրված մեղադրանքի առնչությամբ Գոհար Ենոքյանն իր դիքորոշումը հայտնել է ցուցմունքով, որով իրեն մեղավոր չի ճանաչել առաջադրված մեղադրանքում և այդ ամենը որակել ապօրինություն` իր գույքը հափշտակելու նպատակով», -հավելեց Հակոբյանը:

Բացի այդ, ապօրինի քրեական հետապնդում իրականացնելու դեմ է փաստաբանը գրավոր բողոք ներկայացրել ՀՀ գլխավոր դատախազին:

«Անկեղծ ասած, ՀՀ գլխավոր դատախազին ուղղված բողոքներն իմաստազրկվում են, քանի որ նշված քրեական գործով շուրջ մեկ տարի տևող նախաքննության ընթացքում բազմաթիվ բողոքներ են ներկայացվել ՀՀ գլխավոր դատախազին, որոնք անհիմն կերպով մերժվել են, որոշ դեպքերում՝ քննարկումը հետաձգվել: Միայն այն հանգամանքը, որ ապօրինի մեղադրանքն առաջադրվել է հենց ՀՀ գլխավոր դատախազության դատախազի կողմից, արդեն իսկ բացահայտվել էր ապօրինությունների ծագումը», -նկատեց Գեղամ Հակոբյանը` դիմելով գլխավոր դատախազությանը դադարեցնել Ենոքյանի դեմ «անհիմն քրեական հետապնդումը»:

Հարակից հրապարակումներ`
Գոհար Ենոքյանի հետ քննչական գործողություն իրականացնելու մասին ծանուցում պաշտպանական կողմը չի ստացել. Փաստաբան
Գոհար Ենոքյանը բաց նամակով դիմել է հասարակությանը