Բուհերը կենդանի օրգանիզմն են, և ոչ ոք չի կարող այն մի տեղից մյուսը տեղափոխել. Արմեն Աշոտյան

Կրթություն, գիտություն 13:05 25/05/2015

Բուհերը կենդանի օրգանիզմն են, և ոչ ոք չի կարող այն մի տեղից մյուսը տեղափոխել. Արմեն Աշոտյան

«Երևանից Գյումրի որևէ բուհ տեղափոխելու կոնկրետ նախագիծ այսօր չկա»,-լրագրողների հետ հանդիպման ժամանակ այսօր ասաց ՀՀ կրթության և գիտության նախարար Արմեն Աշոտյանը:

Ըստ նրա՝ իր համար անհասկանալի է, որ ԶԼՄ-ներով սկսել են բուռն քննարկել ոչ ոլորտային նախարարության կոլեգիայի նիստում մասնագետներից մեկի կարծիքը, մինչդեռ որևէ մեկի մտքով չի անցել հարցնել ԿԳ նախարարության կարծիքը:

Ա.Աշոտյանի խոսքերով՝ բուհերը շենքեր չեն, որ ուր ուզեն` տեղափոխեն. «Բուհերը կենդանի օրգանիզմն են, և ոչ ոք չի կարող այն մի տեղից մյուսը տեղափոխել: Այո, մենք քանի տարի է քննարկում ենք բուհական համակարգի կառուցվածքային արդիականացման հարցը, այդ թվում՝ Գյումրիին լրացուցիչ կրթական ծանրաբեռնվածություն տալու, բուհերի խոշորացման միջոցով: Բայց հիմա ասել, թե նման բան կա ու դա դարձնել քննարկման թեմա՝ առանց լիազոր մարմնի կարծիքը հարցնելու, անհասկանալի է»:

Նա միաժամանակ նշեց, որ օրինակ՝ Աբովյանում խորհրդային տարիներից մնացած շենքեր, տարածքներ կան, որտեղ տեսականորեն հնարավոր է մեկ-երկու բուհ տեղափոխել: Սակայն այդ առաջարկությունները, ըստ նախարարի, չի կարելի քննարկել՝ կոնտեքստից որևէ գործոն կտրելով. «Անգամ ամենափոքր բուհը տեղափոխելու համար լուրջ խնդիրներ կարող են առաջանալ: Օրակարգում միայն կրթական համակարգի արդիականացման հարցը կա, բայց չկա որևէ բուհ տեղափոխելու հարցը»:

Նախարարի խոսքերով՝ ակնհայտ է, որ Գյումրիում, Վանաձորում, նույնիսկ Երևանում որոշ բուհեր պետք է միացնել, սակայն դա այդքան էլ հեշտ գործ չէ:

Հարցին, թե նախարարությունները որտե՞ղ պետք է տեղափոխեն, Ա.Աշոտյանը կեսկատակ պատասխանեց. «Կարծում եմ, որ կարելի է մտածել ԿԳ նախարարությունը Մայր Աթոռ Սուրբ Էջմիածին տեղափոխելու մասին՝ տանելով դեպի ակունքներ»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: