Ձեր վստահելի աղբյուրը

«Կեղծ դեղեր հիմնականում արտադրվում են Ռուսաստանում և Ուկրաինայում, որտեղից, անկասկած, թափանցում է նաև հայկական շուկա: Մեր շուկան փոքր է, 100-110 միլիոն դոլար է կազմում: Բավականին բարդ է Հայաստանում կեղծ դեղի շրջանառությունը, քանի որ հակազդման բավականին մեխանիզմներ են առկա»,- «Եվրասիական տարածաշրջանում կեղծ դեղամիջոցների դեմ պայքարի արդի ասպեկտներ» խորագրով գիտաժողովի ժամանակ լրագրողների հետ զրույցում ասաց ՀՀ դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը:

Ըստ նրա, այն ճանապարհով, որ սովորաբար դեղը մի երկրից տեղափոխվում է Հայաստան՝ մաքսային գոտիներով և այլն, կեղծ դեղի ներմուծում հնարավոր չէ:

«Եթե մյուս հանրապետություններում բացահայտումը տեղի է ունենում շուկայում, այլ ոչ թե սահմանի վրա, մեզ մոտ ներմուծվող դեղերը նախ ենթարկվում են լաբորատոր փորձաքննության, նույնականացման, նմուշառման, հատկապես այն երկրներից ներմուծվողները, որոնք ռիսկային են»,- ասաց Հ. Թոփչյանը՝ հավելելով, որ Հայաստանում տարեկան 4-5 կեղծ դեղ է հայտնաբերվում:

Նա միաժամանակ ընդգծեց, որ դա չի նշանակում հայկական շուկայում հենց այդքան կեղծ դեղ կա, ավել չէ. «2013-ից ստեղծվել է Առողջապահության տեսչություն, որի հիմնական գործառույթն է շուկայում կատարել ուսումնասիրություն, դիտարկումներ, որի արդյունքում կպարզվի, թե Հայաստանում շատ են կեղծ դեղերը, թե ոչ»,- ասաց ՀՀ դեղերի և բժշկական տեխնոլոգիաների փորձագիտական կենտրոնի տնօրենը:

Հ. Թոփչյանի խոսքով, առողջապահության նախարարությունը բոլոր օղակներով հետևում է մի փաստի՝ շրջանառության մեջ գտնվող դեղերի որակն ապահոված լինի: