Ձեր վստահելի աղբյուրը

2014թ-ին ՀՀ նախագահի ստորագրմանն է ներկայացվել 489 օրենք, իսկ 2013թ-ի դրանց թիվը եղել է 228-ի: Այս մասին այսօր Ազգային ժողովում «Հայաստանի Հանրապետության 2014թ. պետական բյուջեի կատարման մասին» տարեկան հաշվետվությունթյան ժամանակ ասաց ՀՀ նախագահի աշխատակազմի ղեկավար Վիգեն Սարգսյանը՝ հավելելով, որ ՀՀ նախագահի աշխատակազմի ստորաբաժանումների, պաշտոնատար անձանց գլխավոր խնդիրներից մեկն է եղել մասնակցությունը օրինաստեղծ աշխատանքին, մասնավորապես՝ օրենքների նախագծերի իրավական, մասնագիտական լեզվաոճական փորձաքննության ապահովումը, այնուհետև ԱԺ-ի կողմից օրենքներն ընդունելուց հետո սահմանված կարգով ՀՀ նախագահի ստորագրմանը դրանց ներկայացնելը:

2014թ-ին, ըստ Վ.Սարգսյանի, աշխատակազմի պատասխանատու մասնագետները մասնակցել են օրենքների նախագածերի քննարկումներին, ներկայացրել առաջարկություններ, կարծիքներ, դիրքորոշումներ այդ փաստաթղթերի վերաբերյալ: Արդյունքում՝ 2014 թ-ին նախապատրաստվել և ներկայացվել են շուրջ 450 տեղեկանքներ, եզրակացություններ, իսկ 2013թ-ին դրանց թիվը եղել է 228:

Վ.Սարգսյանը նշեց, որ գրեթե նույն ընթացակարգն է գործել ՀՀ միջազգային պայմանագրերի նախագծերի դեպքում: Այսպիսով՝ հաշվետու ժամանակահատվածում փորձաքննության է ենթարկվել 170 պայմանագիր, նախապատրաստվել նույնքան տեղեկանք: 2013թ-ին այդ պայմանագրերի թիվը եղել է 130:

Նրա խոսքերով՝ ՀՀ նախագահի աշխատակազմի կարևորագույն ուղղություններից է Նախագահի իրավական ակտերի նախապատրաստությունը: Արդյունքում, ըստ նրա, 2014թ-ին նախապատրաստվել և ՀՀ նախագահի ստորագրմանն է ներկայացվել 687 հրամանագիր (2013թ-ին դրանց թիվը եղել է 375), 226 կարգադրություն (2013թ-ին՝ 241), ինչպես նաև այլ փաստաթղթեր՝ 911 ուղերձ, 121 լիազորագիր, նամակ և այլն:

Վ.Սարգսյանի փոխանցմամբ՝ աշխատակազմի համապատասխան ստորաբաժանումներում մասնագիտական փորձաքննության են ենթարկվել արտաքին քաղաքականության, պաշտպանության և ազգային անվտանգության հարցերին վերաբերող կառավարության 1369 որոշումների նախագծեր, մինչդեռ 2013թ-ին դրանց թիվը եղել է 815:

ՀՀ նախագահի աշխատակազմի ղեկավարը հայտնեց, որ մեծածավալ և պատասխանատու աշխատանքն է պահանջում նաև ՀՀ նախագահի այցերի, արտերկրից ժամանող նախագահների, բարձրաստիճան պետական պաշտոնյաների, պաշտոնական պատվիրակությունների ընդունելությունների նախապատասրատումը: Ըստ նրա՝ 2014թ-ին ՀՀ նախագահը կատարել է 22 պետական պաշտոնական և աշխատանքային այց արտերկիր, հյուրընկակել Վրաստանի, Ֆրանսիայի, Հունաստանի, Սերբիայի նախագահներին, Շվեյցարիայի Համադաշնության նախագահին, ԵԱՀԿ գործող նախագահին:

Բացի այդ, նախորդ տարի հանրապետության ղեկավարը ընդունել է Հայաստանում այցով գտնվող ավելի քան 20 բարձաստիճան պաշտոնատար անձանց: Նշվեց նաև, որ 2014թ-ին Նախագահը ՀՀ այցելած օտարերկրյա այլ նախարարների, պաշտոնատար անձանց, մշակութային գործիչների հետ ունեցել է 40 հանդիպում, ընդունել 15 հավատարմագրվող դեսպանների, հրաժեշտի հանդիպումներ է անցկացրել 3 մեկնող դեսպանների հետ: Սփյուռքի կառույցների ներկայացուցիչների, հայտնի սփյուռքահայերի հետ էլ ունեցել է 20 հանդիպում:

Վ.Սարգսյանը նշեց, որ աշխատակազմում աշխատանքներն են կատարվել ՀՀ նախագահի մարզեր կատարած այցելությունների կազմակերպման ուղղությամբ: 2014թ-ին երկրի ղեկավարը այցելել է Հայաստանի բոլոր մարզեր, մասնակցել տարբեր միջոցառումների, հանդես եկել եկույթներով:

Վիգեն Սարգսյանը նաև նշեց, որ 2014թ-ին Վերահսկողական ծառայությունը ՀՀ նախագահի կողմից հաստատված պլանի համաձայն, տարբեր պետական կառույցներում կատարել է ուսումնասիրություններ, ամփոփել արդյունքները, նախապատրաստել համապատասխան առաջարկություններ:

Ինչ վերաբերում է դիմումներին, ապա 2014թ-ին ՀՀ նախագահի աշխատակազմի քաղաքացիների ընդունելության դիմումների, բողոքների, առաջարկությունների բաժինը ստացել է 6988 դիմում-բողոք, ընդունել 7300 քաղաքացու:

Նախագահի և աշխատակազմի գործունեության լուսաբանման վերաբերյալ նախապատրաստվել է 605 հաղորդագրություն ԶԼՄ-ների համար, լրատվական դաշտի 501 վերլուծություն, Նախագահի պաշտոնական կայքում տեղադրվել է 937 նյութ, իսկ կայքի այցելությունների թիվը 2014թ-ին կազմել է 1 մլն 873 հազար 448:

Վ.Սարգսյանը նաև հայտնեց, որ ՀՀ Նախագահի կողմից շքանշաններով ու մեդալներով պարգևատրվել է 573 անձ, Նախագահի մրցանակներ են շնորհվել 15 անձի, երիտասարդական մրցանակ՝ 8 անձի, պատվավոր կոչումներ՝ 98 անձի, շնորհակալագրերով պարգևատրվել է 2 անձ, 15 մրցանակ է շնորհվել լավագույն մարզական ընտանիքներին, ֆիզիկական կուլտուրայի և սպորտի բնագավառում շնորհվել է ՀՀ նախագահի 9 մրցանակ:

Նշվեց նաև, որ ՀՀ քաղաքացիություն է ստացել 13266 անձ, որից 3613-ը սիրիահայեր են, իսկ քաղաքացիությունից դուրս է եկել 2200 անձ: Վ.Սարգսյանը նաև ասաց, որ հատուկ կացության կարգավիճակ է շնորհվել 705 անձի: