Ձեր վստահելի աղբյուրը

Ստեփանավանի շրջանի Ագարակ, Լեջան ու մի քանի այլ գյուղերի բնակիչներին զգուշացրել են՝ վաղվանից մթերվող կաթի գինը նվազելու է: Մեկ լիտր կաթի համար գյուղացիներին վճարելու են 100 դրամ: Ձմռանը գյուղացիներից կաթը մթերել են 150 դրամով, գարնանը՝ 110 դրամով: Գյուղացիները դժվար երկընտրանքի առաջ են՝ ոչ կարող են կաթը ջրի գնով, մի բան էլ էժան, վաճառել, ոչ էլ կարող են շոգին կաթը տնային պայմաններում վերամշակել:

Աշոցքի տարածաշրջանի գյուղերի բնակիչներն էլ սպառնում են փակել միջպետական ճանապարհը, եթե կաթի մթերման գինը տնտեսվարողները չբարձրացնեն:

Արագածոտնի մի քանի գյուղերում էլ արդեն երկու օր է կաթ չի մթերվում: Գյուղացիները չգիտեն էլ, ո՞րն է պատճառը, ե՞րբ կվերականգնվի մթերումը, մի քանի տասնյակ լիտր կաթ ամեն օր փչանում է:

Մթերողը՝ Ժորա անունով մի տղամարդ Panorama.am-ի հարցից խիստ զայրացավ, խիստ տոնով պահանջեց հայտնել, թե ով է համարձակվել իր համարը մեզ տրամադրել: Ասաց, իբր մեքենան «խարաբ էր եղել», դրա համար էլ մթերել չի կարողանում: Երբ կվերականգնվի մթերումը հարցին ի պատասխան էլ ասաց. «Աստված գիտի, էդքան բանը հերիք է ձեզ, ինչ նյութ ուզում ես պատրաստի, ինձանից գործ չունես: Եթե էդքանը հետաքրքում է, չեմ էլ մթերելու»:

Ստեփանավանում հիմնական մթերողը «Մարիանա» ընկերությունն է: Ընկերության տնօրեն Տիգրան Վարդանյանը Panorama.am-ի հետ զրույցում բացատրեց, որ համաշխարհային շուկայում այս պահին կաթի գները նվազել են, արտադրողին այս պահին շատ ձեռնտու է կաթի փոշի ներմուծել օրինակ Ուկրաինայից կամ Բելառուսից: Վարդանյանն ասում է, իրենք ամենից շատ գյուղացիներին նեղացնել չեն ուզում:

«Այնպիսի տպավորություն է, որ տեղական արտադրողները գյուղացիների թշնամիներն են, բայց այդպես չի: Կաթի գինը որոշում է շուկան, կաթի գնի նվազումը բերում է պանրի գների նվազման: Եթե նկատել եք, «Մարիանա»-ի արտադրության պանրի գինը բավականին նվազել է: Մենք պանիր արտադրում ենք սեզոնին, պատկերացրեք, մենք այդ մասնագետների կարիքն ունենում ենք տարվա մեջ մի քանի ամիս, բայց ընկերությունը 45 մասնագետի աշխատավարձ տալիս է ողջ տարվա ընթացքում, երեք ամսվա համար ես պահում եմ 45 մարդ, ամբողջ տարին վճարում եմ: Եթե աշխատանքից ազատեմ, մարդիկ կգնան երկրից»,-ասաց ընկերության տնօրենը:

Տ. Վարդանյանն ուշադրություն հրավիրեց փաստին, որ ձմեռվա ընթացքում հանրապետությունում ոչ մի անգամ կաթնամթերքի դիֆիցիտ չի ղել. «Դա նշանակում է, որ ավելացած կաթը պետք է ինչ-որ կերպ վերամշակվի: Կաթի փոշին մենք շատ չնչին քանակությամբ ենք բերել, հիմա ընդհանրապես չենք ներմուծում հիմնականում մթերված կաթով մենք պանիր ենք արտադրելու, արտահանելու, իսկ միջազգային շուկայում պանրի գները նվազել են: Բելառուսում պանրի գներն ընկել են, Ուկրաինայից էլ տարբեր ճանապարհներով պանիր է մտնում Ռուսաստան, մենք ի՞նչ գներով պանիր պիտի արտադրենք, որ մրցունակ լինի շուկայում: Համաշխարհային շուկայում կաթնամթերքի գների անկում կա»:

Վարդանյանն ասում է՝ հասկանում է գյուղացիներին. «Բայց եթե այդ գնով չվաճառեց, իրացման տեղ չունի: Ընենց աղմուկ են բարձրացնում, ոնց որ մենք արհեստական ձևով կաթի գին ենք իջացնում: Խնդիր չկա, ես կարող եմ կաթի գնին ընդհանրապես չկպնել, բայց մի քանի անգամ ավելացած կաթը մնալու է գյուղացու ձեռքը, այս պահին մթերման ծավալներն ավելացել են երեք անգամ, հիմա ո՞րն է ձեռնտու»:

Ընկերության տնօրենը նշեց, կաթի փոշու արտադրությունն իր համար ծախսատար բիզնես է, առավել ձեռնտու է ներկրելը. «Բայց որպեսզի գյուղացու ձեռքը կաթը չմնա, մենք փորձում ենք ինչ-որ ձևով արտադրել»:

Վարդանյանի կարծիքով, գյուղացին ծախսերն էլ սխալ է կազմակերպում, խոտը սեփական ձեռքերով հավաքելու փոխարեն այն գնում է. «Արտասահմանում դոնցենտ ֆերմերը բանվոր չէր պահում, տրակտորն ինքն էր աշխատեցնում: Իսկ մեր գյուղացիներն էսօր հինգ հատ կով են պահում, գնում են ապառիկով ջիպ են վերցնում, ասում են տոկոսի տակ ենք, պետք է պարտքերը փակենք: Հանրապետությունում շատ հողեր ամայի վիճակում են»:

Վարդանյանի խոսքով, մթերված կաթը մանրէաբանական աղտոտվածություն ունի, այն բազմաթիվ վերամշակումների է ենթարկվում, կորուստ են ունենում, բացի այդ էլ Ավելացված արժեքի հարկից գյուղացին ազատված է, նրա փոխարեն հարկը վճարում է արտադրողը:

ԳՆ Սննդամթերքի անվտանգության պետական ծառայությունից Panorama.am-ին հայտնեցին, որ այս տարվա առաջին հինգ ամիսներին նախորդ տարվա նույն ժամանակահատվածի համեմատ հանրապետություն ներկված կաթի փոշու ծավալը նվազել է ավելի քան 38 տոննայով:

«2014-ին ներկրվել 2 489 տոննա կաթի փոշի: Նախորդ տարվա առաջին հինգ ամիսներին ներկրվել է 726.9 տոննա, իսկ 2015-ի առաջին 688.3 տոննա: Նախորդ տարի կաթ բերվել է Բելառուսից, Ուկրաինայից, Գերմանիայից, Վրաստանից, Իրանից, Նիդերլանդներից, Իտալիայից, Լատվիայից: Այս տարվա ընթացքում կաթի փոշի ներմուծվել է Լիտվայից, Բելառուսից, Ուկրաինայից, Գերմանիայից, Նիդերլանդներից: Չեռնոբիլից ոչ մի գրամ կաթի փոշի չի բերվել»,-ասաց ծառայության մամուլի խոսնակ Նվարդ Առաքելյանը:

Կաթի մթերման գնի վերաբերյալ այլ հրապարակումներ՝
Բերբերյան. Կաթի մթերման գնի իջեցման հետևանքով ֆերմերները կրճատում են անասնագլխաքանակը«Լսեցի, օպերատիվ կզբաղվենք». փոխնախարարը խոստացավ բարձրացնել կաթի մթերման գինը
Ինչո՞ւ չի էժանանում կաթնամթերքը. Գյուղացիների հարցը
Կաթի մթերման գինը կրկին իջացրել են. «Ոնց որ գյուղացին աշխատի ուրիշի համար»
«Ոնց որ ասեն, դու գնա կործանվի». «Մարիաննա»-ի տնօրենը՝ գյուղացիների բողոքի մասին