Ձեր վստահելի աղբյուրը

ՀՀ կառավարության հունիսի 4-ի նիստում փոփոխություններ կկատարվեն «Պետական կենսաթոշակների մասին» ՀՀ օրենքի նախագծում:

Փոփոխությունների համաձայն՝ նախատեսվում է, որ հակառակորդի հետ շփման գծում զինվորական ծառայություն իրականացնող սպաներն ու ենթասպաներն ավելի բարձր թոշակ կստանան:

Օրենքի նախագծի ընդունման անհրաժեշտությունը պայմանավորված է այն հանգամանքով, որ առաջնագծում մարտական հերթապահություն իրականացնող ՀՀ զինված ուժերի սպայական, ենթասպայական և պայմանագրային շարքային կազմի զինծառայողների համար ՀՀ օրենսդրությամբ սահմանված չեն համարժեք և նշանակալի արտոնություններ:

«Առաջարկվող օրենսդրական փոփոխությունը լինելով հասցեական` ուղղված լինելով զինծառայողների կոնկրետ խմբի համար լրացուցիչ արտոնություններ սահմանելուն, խթանիչ ուժ կհանդիսանա մարտական հերթապահություն իրականացնող զորամասերը սպայական, ենթասպայական և պայմանագրային շարքային կազմի զինծառայողներով համալրման գործընթացը արդյունավետ կազմակերպելու համար, որով մեկ անգամ ևս կբարձրանա Հայաստանի Հանրապետության անվտանգությանը, պաշտպանությանը և տարածքային ամբողջականությանը, նրա սահմանների անձեռնմխլիությանը ուղղված, ՀՀ օրենսդրությամբ սահմանված, Հայաստանի Հանրապետության զինված ուժերի գործընթացի որակը»,- նշված է կառավարության հիմնավորման մեջ:

Առաջարկությունը համահունչ է նաև ՀՀ պաշտպանության բարեփոխումների 2010-2015թթ. ծրագրի դրույթներին, որը միտված է զինծառայողների զինծառայությունից զորացրված անձանց սոցիալական պաշտպանության համակարգի զարգացմանը:

Հիմնավորումում նշվում է նաև, որ օրենքի նախագծի ընդունումը կնպաստի նաև մարտական հերթապահություն իրականացնող զորամասերում պայմանագրային հիմունքներով շարքային կազմի զինծառայողներով համալրման գործընթացի արդյունավետ կազմակերպմանը: