Ռեֆերենս լաբորատորիան հայկական կողմին կհանձնվի եկող տարի

Առողջություն 19:32 03/06/2015

Ռեֆերենս լաբորատորիան հայկական կողմին կհանձնվի եկող տարի

Հիվանդությունների վերահսկման և կանխարգելման ազգային կենտրոնի Ռեֆերենս լաբորատոր կենտրոնի վերանորոգման աշխատանքները հարթ ընթանում են և կավարտվեն նախանշված ժամկետում: Այս մասին հայտարարել է և ԱՄՆ Պաշտպանության դեպարտամենտի Սպառնալիքների նվազեցման գործակալության Սպառնալիքների համատեղ նվազեցման ծրագրի տնօրեն Էլիզաբեթ Ջորջը ՀՀ առողջապահության նախարար Արմեն Մուրադյանի ղեկավարած թիմի հերթական հանդիպման ժամանակ:

«Հուսով եմ, որ 2016թ. մարտին մենք լաբորատորիան պաշտոնապես կփոխանցենք հայկական կողմին»,-ասաց նա` հավելելով, որ ծրագրի երկրորդ փուլում կիրականացվի Սյունիքի, Գեղարքունիքի և Լոռու մարզի լաբորատորիաների վերանորոգումն ու արդիականացումը,-ասել է Էլիզաբեթ Ջորջը:

Առողջապահության նախարարության հասարակայնության հետ կապերի վարչությունից մանրամսնում են, որ ծրագրի առաջին փուլում վերանորոգվում և արդիականացվում են Շիրակի և Տավուշի մարզերի լաբորատորիաները։ Էլիզաբեթ Ջորջը միաժամանակ շեշտել է, որ տպավորված է գիտահետազոտական աշխատանքների ձեռքբերումներով։

«Ծրագրի բոլոր բաղադրիչներով արձանագրվող հաջողությունները պայմանավորված են նաև Հայաստանի Հանրապետության կառավարության աջակցությամբ»,-ասաց տիկին Ջորջը։

Արմեն Մուրադյանը հույս է հայտնել, որ ԱՄՆ Պաշտպանության դեպարտամենտի Սպառնալիքների նվազեցման գործակալության Սպառնալիքների համատեղ նվազեցման ծրագրի շրջանակում աջակցություն կցուցաբերվի նաև կլինիկական ռեֆերենս լաբորատորիայի ստեղծման գործում։

«Մեր նպատակը կլինիկական լաբորատորիաների հավատարմագրումն է, և այս ենթատեքստում շատ կարևոր է կլինիկական ռեֆերենս լաբորատորիայի առկայությունը»,-ասել է նախարարը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: